Ձեր վստահելի աղբյուրը

Ազգային ժողովում կառավարության ծրագրի քննարկման ժամանակ «Իմ քայլը» խմբակցության պատգամավոր Հովհաննես Իգիթյանը վարչապետ Նիկոլ Փաշինյանից հետաքրքրվեց դատական իշխանության անկախությունից։

«Երկար տարիներ ՀՀ-ում դատական իշխանության հետ կապված արձանագրումը եղել է այսպես՝  դատական իշխանության անկախության համար կան օրենսդրական պայմաններ, մնում է քաղաքական կամքը։ Մենք ուզում ենք քաղաքական կամք ցուցաբերել և դատական համակարգին թողնել ինքն իր յուղով տապակվի, տեսնենք ինչ բլյուդա կստացվի։ Եթե կտեսնենք, որ ստացված համակարգը սպասարկում է ժողովրդին, պետությանը, Սահմանադրությանը՝ կանենք մեր հետևությունը, եթե պարզվի, որ այդպես չէ, մենք միասին այս դահլիճում ունենք այդ բոլոր լծակները այդ հարցը լուծելու։ Առաջարկում եմ միշտ գնալ այն ճանապարհով, որ ունքը սարքելու փոխարեն աչքն էլ չտանք հանենք»,- ասաց Փաշինյանը։

Իգիթյանն էլ արձագանքեց, որ այդ հարցը պետք է լուծեն ոչ թե իրենք, չնայած որ ունեն այդ օրնեսդրական հնարավորությունը, այլ դա պետք է գա կառավարությունից։

«Լուսավոր Հայաստան» խմբակցության  պատգամավոր Անի Սամսոնյանը հարցրեց, թե արդյոք այս կառավարությունը դիտարկու՞մ է «Նուբարաշեն» ՔԿՀ-ի փակման և տեղափոխման հարցը։

Վարչապետը պատասխանեց, որ կառավարությունն ունի «Նուբարաշեն» քրեակատարողական հիմնարկը փակելու ծրագիր։

Այնուհետև Սամսոնյանը հետաքրքրվեց կառավարության ծրագրում տնտեսական ցուցանիշների սակավության մասին գործադիրի ղեկավարի դիտարկումներից։

«Դուք նշեցիք, որ այս ծրագրում տնտեսական ցուցանիշներ չկան, քանի որ տնտեսական ակտիվությունը կախված է քաղաքացիների վարքագծից և յուրաքանչյուրը պետք է դառնա տնտեսական ակտիվիստ։ Ուզում եմ հասկանալ, որ այս տարիների ընթացքում կառավարությունը չգրանցի տնտեսական շոշափելի արդյունքներ, չունենանք լավ ցուցանիշներ, պետք է ասենք, որ քաղաքացիները չցուցաբերեցի՞ն տնտեսական ակտիվություն և քաղաքացիները չեղան այն ակտիվիստները, որոնք կգրանցեին լավ ցուցանիշներ տնտեսության զարգացման գործում»,- հարցրեց պատգամավորը։

Ի պատասխան Փաշինյանն ասաց. «Նախ ես չասացի, որ տնտեսական ակտիվության ցուցանիշներ չկան, ես ասացի, որ հարուստ չեն ցուցանիշներով։ ՀՀ քաղաքացիները չեն կարող չցուցաբերել տնտեսական ակտիվություն, քանի որ նրանց այսօր ներկայացնող մարմինը ԱԺ մեծամասնությունը և կառավարությունը հռչակում են այդ ուղեգիծը և ստեղծելու են դրա հնարավորությունները։ 2018 թվականի դեկտեմբերի 9-ի խորհրդարանական ընտրություններին ՀՀ քաղաքացիները ակնհայտորեն և հստակ ցույց են տվել իրենց կամքը՝ իրականացնելու տնտեսական հեղափոխություն»։

Նրա խոսքով, եթե պարզվի՝ տեղի չի ունեցել այդ տնտեսական հեղափոխությունը, ՀՀ քաղաքացիները էլի իրենց կամքը կարտահայտեն և կլինեն դատավոր, ինչ է եղել, ինչու և ով է դրա մեղավորը։

«Կառավարությունը և ես անձամբ պատրաստ եմ կրել պատասխանատվությունը քաղաքական, տնտեսական, անվտանգային հետագա զարգացումների համար»,- հավելեց Փաշինյանը։