Ձեր վստահելի աղբյուրը

ՀՀ 7-րդ գումարման Ազգային ժողովում մեկնարկել է առաջին նստաշրջանի հերթական նիստը։ Խորհրդարանն այսօր քննարկում է Կառավարության ծրագիրը, որը ՀՀ կառավարությունը հաստատել է փետրվարի 8-ին կայացած կառավարության արտահերթ նիստում։

Կառավարության ծրագիրը խորհրդարանում ներկայացնում է ՀՀ վարչապետ Նիկոլ Փաշինյանը:

Մինչ բուն ծրագրին անցնելը, վարչապետը նախ պատգամավորներին շնորհավորեց  2018 թվականի դեկտեմբերի 9-ին տեղի ունեցող խորհրդարանական ընտրությունների կապակցությամբ:

«Այդ ընտրությունները բացառիկ էին երրորդ հանրապետության  պատմության մեջ, քանի որ տեղական և միջազգային բոլոր դիտորդական առաքելությունների, միջազգային կազմակերպությունների և ընդհանրապես միջազգային հանրության կողմից գնահատվեցին որպես ազատ, արդար, մրցակցային, թափանցիկ և ժողովրդավարական: Նույն գնահատականը տվեց նաև հայաստանյան հանրությունը»,- ասաց վարչապետը:

Նրա խոսքով՝  դեկտեմբերի 9-ի խորհրդարանական ընտրություններն առաջինն էին Երրորդ հանրապետության պատմության մեջ, որի արդյունքները չվիճարկեցին ոչ Սահմանադրական դատարանում, ոչ էլ հանրայնորեն:

«Հետևաբար, ունենք լեգիտիմության աննախադեպ բարձր աստիճան ունեցող խորհրդարան և լեգիտիմության աննախադեպ բարձր աստիճան ունեցող կառավարություն: Կարող ենք արձանագրել, որ նախորդ տարի դեկտեմբերին ունեցած խորհրդարանական արտահերթ ընտրություններով  ավարտվեց Հայաստանում տեղի ունեցած հեղափոխության քաղաքական փուլը, երկրում տեղի ունեցած փոփոխությունները դարձան անշրջելի»,- ասաց Նիկոլ Փաշինյանը:

Նա միաժամանակ նշեց, որ սա չի նշանակում, որ Հայաստանում այսօր հաստատված  քաղաքական համակարգն անթերի է և հտեագա կատարելագործման և լրջագույն բարեփոխումների կարիք  չունի. «Սա ընդամենը նշանակում է, որ քրեաօլիգարխիկ կառավարման նախորդ ռեժիմին վերադարձ այլևս չի կարող լինել և առաջիկայում մեզ մնում է մեր հայրենիքն ազատել քրեաօլիգարխիկ և կոռուպցիոն կառավարման վերջին բացիլներից» :

Երկրի տնտեսության զարգացման հեռանկարը արտահանումն է

Հայաստանի տնտեսության շարժիչ ուժը պետք է լինի առաջին հերթին մարդկային միտքը:  Այս մասին այսօր խոհրդարանում հայտարարեց ՀՀ վարչապետ Նիկոլ Փաշինյանը՝ ներկայացնելով ՀՀ կառավարության առաջիկա հինգ  տարիների գործունեության ծրագիրը:

Նա նշեց, որ կառավարության նպատակը ձևակերպված է ԱԺ ներկայացրած ծրագրի հենց առաջին պարբերությունում, որ առաջիկա հինգ տարիներին կառավարության գործունեությունը միտված է լինելու Հայաստանի Հանրապետությունում բարձր տեխնոլոգիական, արդյունաբերական, ինչպես նաև բնապահպանական բարձր չափանիշներին համապատասխանող, արտահանմանը միտված մրցունակ և ներառական տնտեսություն կառուցելուն:  

«Սա նշանակում է՝ կառավարության հիմնական խնդիրը ՀՆԱ-ի կառուցվածքը փոխելն է այնպես, որ հինգ տարի հետո մեր երկրի տնտեսության լոկոմոտիվը դառնան տեխնոլոգիաները և տեխնոլոգիական նորարարությունները: Խոսքն արդեն գոյություն ունեցող տեխնոլոգիաների ընդարձակ կիրառման, ինչպես նաև նոր տեխնոլոգիաների ստեղծման կամ դրանց ստեղծմանն էական մասնակցություն ունենալու, ինչպես բաև բարձր տեխնոլոգիական հմտությունների, արտադրանքի և ապրանքների թողարկման, արտահանման և կիրառման այնպիսի ծավալների հասնելու մասին է, որ այդ ոլորտները դառնան Հայաստանի տնտեսության հիմնական բնորոշիչը: Խոսքը բոլոր տեխնոլոգիաների մասին է՝ տեղեկատվական, պաշտպանական, անվտանգային, շինարարական, կրթական, գյուղատնտեսական, արդյունաբերական և այլն»,- ասաց վարչապետը:

Այսպիսով, ըստ Փաշինյանի, մարդկային բոլոր ընդունակություններից Հայաստանի տնտեսության շարժիչ ուժը պետք է լինի առաջին հերթին մարդկային միտքը, ինտելեկտը, նախաձեռնությունը:
Վարչապետի խոսքով՝ տնտեսության բոլոր ճյուղերը պետք է համապատասխանեն նաև էկոլոգիական բարձր չափանիշներին, էկոլոգիական նոր գիտակցումով պետք է համակված լինի Հայաստանի յուրաքանչյուր  քաղաքացի, որի էկոլոգիական վարքագծի հեղափոխությունը կարևոր նշանակություն ունի ապագայի համար. «Խոսքն այստեղ  վերաբերվում է ինչպես ծխող և ծխախոտը գետնին նետող, այնպես էլ շրջակայքի մաքրությունը  սեփական անելիքների տիրույթից դուրս դիտող քաղաքացուն»:

Նիկոլ Փաշինյանը:կաևորեց նաև բոլոր ոլորտներում տնտեսության արտահանմանը միտված լինելու հանգամանքը: Ըստ նրա՝ «Հայաստանի տնտեսության հիմնական ճյուղերի հայացքները պետք է ուղղված լինեն արտաքին շուկաներին»: Խոսքը վերաբերում է նաև միկրոբիզնեսին, փոքր և միջին բիզնեսին, որոնց արտահանման հիմնական և առանցքային խողովակը, ըստ վարչապետի, պետք է լինի զբոսաշրջությունը, ինչպես նաև ապրանքների արտահանումը ժամանակակից տեխնոլոգիաների, մասնավորապես ինտերնետ առևտրի միջոցով:

Նրա խոսքով՝ արտահանմանը միտված լինելու հրամայականը վերաբերում է գյուղատնտեսությանը, բարձր տեխնոլոգիական արդյունաբերությանը, տեղեկատվական տեխնոլագիաներին, թեթև արդյունաբերությանը : Նա նաև  հույս հայտնեց առաջիկայում ունենալ ծանր արդյունաբերություն, մետալուրգիայի լուրջ արտադրություն:

Այսպիսով, ըստ Նիկոլ Փաշինյանի, երկրի տնտեսության զարգացման հեռանկարը արտահանումն է: «Մենք այստեղ ունենք, ըստ էության, անսահմանափակ հնարավորություններ, քանի որ Հայաստանը հանդիսանում է Եվրասիական տնտեսական միության անդամ, մյուս կողմից ԵԱՏՄ-ն ազատ առևտրի համաձայնագրեր ունի մի շարք երկրների, ինչպես օրինակ՝ Իրանի և Վիետնամի հետ: Այս կարգի պայմանագրերի աշխարհագրությունն առաջիկայում կընդլայնվի: Հայաստանն օգտվում է Արևմտյան մի շարք երկրների հետ արտոնյալ GSP և GSP+ համակարգերից: Այնպես որ արտահանման չօգտագործված ներուժը հսկայական է»,- հայտնեց վարչապետը:

Նա նաև հավելեց, որ արտահանման ոլորտում հիմնական խնդիրը մեր ապրանքների համապատասխանեցումն է միջազգային ամենաբարձր որակի ստանդարտներին, համապատասխան ծավալների առկայությունը և մարքեթինգային խնդիրները:

«Մեր կառավարությունն ամեն ինչ անելու է այս հարցերում բիզնեսին աջակցություն ցուցաբերելու և նրանց համար շուկաների  իրական հասանելիություն ապահովելու համար»,- ասաց նա:

Փաշինյանը նաև նշեց, որ արտահանման ոլորտում մեր մեծագույն խնդիրը հանքանյութ արտահանող երկրից պատրաստի արտադրանք արտահանող երկիր դառնալն է. «Այդ կառուցվածքում բարձր տեխնոլոգիական ապրանքների արտահանման տեսակարար կշիռը լրջագույնս մեծացնելը մեր առանցքային ամբիցիան է: Նման խնդիր լուծելու համար էական է հայաստանյան ապրանքների և ծառայությունների մրցունակությունը:  Սա լինելու է կառավարության գործունեության հաջորդ կարևոր ուղղությունը, երբ հարկային հավասարակշռված համակարգի, աշխատանքի արտադրողականության շարունակական բարձրացման միջոցով  էականորեն պիտի աճի տնտեսության մրցունակությունը»:

Այս առումով նա կարևորեց վարկերի տոկոսադրույքների նվազումը, ֆինանսական կայունությունը և հույս հայտնեց, որ Կենտրոնական բանկը կկարողանա արդյունավետ կառավարել այս խնդիրը:

Վարչապետի ելույթն ամբողջությամբ՝ այստեղ։