Ձեր վստահելի աղբյուրը

Երևանի քաղաքապետարանը հունվարի կեսերին «ԿամԱԶ» ընկերությունից ձեռք էր բերել 9 ձնամաքրող և փողոցները լվացող  մեքենաներ։ Քաղաքապետարանի այս քայլին Երևանի ավագանու «Լույս» խմբակցության ղեկավար Դավիթ Խաժակյանն արդեն անդրադարձել էր, սակայն այսօր ֆեյսբուքյան ուղիղ եթերով նա կրկին խոսեց քաղաքապետարանի կողմից մեքենաների գնման մասին։ Նա հիշեցրեց, որ գնումն իրականացվել է մեկ անձից գնման ընթացակարգով, ինչը, բնականաբար, ռիսկեր է պարունակում։

«Այս ամենի մեջ ինձ մեկ գլխավոր հարց է հետաքրքրում՝ կամազների գնման արժեքին վերաբերող տվյալները։ Երկու պայմանագրով քաղաքապետարանը  կամազների համար վճարել էր 414 միլիոն դրամ։ Փորձում էի պարզել, թե որքանով էր այս արժեքն արդարացված, որովհետև  մեկ անձից գնում իրականացնելը նշանակում է  վճարում ես այնպիսի կազմակերպությանը, այնպիսի գնում ես անում, երբ վստահ ես, որ ավելի լավ արժեք որևէ մեկը չէր կարողանա ներկայացնել։

Հիմա մենք ուսումնասիրում ենք, պարզում ենք, որ այդ 414 միլիոն դրամանոց գործարքում «ԿամԱԶ Արմենիա» ընկերությունն ունեցել է 30 միլիոն դրամի շահույթ։ Որոշեցի այս հարցն ավագանու այսօրվա նիստում ոչ թե բարձրացնել որպես վիճահարույց հարց, այլ դիմել քաղաքապետին և հարցնել՝ արդյոք նորմալ է այդպիսի գնման մեջ 30 միլիոն դրամ բացարձակ շահույթը։

Քաղաքապետն, անկեղծ ասած, հստակ պատասխան չտվեց։ Այդտեղ ինձ զարմանալի է հետևյալը՝ իրականացվել է մեծ գնում, նախատեսվում է  իրականացնել ևս մի քանի մեծ գնումներ, շուրջ 30 կամազ նախատեսվում է  պատվիրել, ամենայն հավանականությամբ, պետք է իրականացվի «ԿամԱԶ Արմենիայից»։ Եթե այդ մրցույթը, գնումը պետք է իրականացվի մեկ կազմակերպությունից, ինչպե՞ս է հնարավոր չիմանալ, թե ինչ այլընտրանքներ կան, գուցե այլ կազմակերպությունից ավելի մատչելի լիներ։ Բնականաբար, բոլորն աշխատանքային հարցեր ենք, որոնք պետք է պարզվեն։

Ձեր դատին եմ թողնում՝ 30 միլիոն դրամը, որպես այդ կազմակերպության բացարաձակ շահույթ, նորմալ է, թե ոչ»,- ասաց Դ. Խաժակյանը։

Նա նաև անդրադարձավ փաստաթղթերում առկա անհամաձայնություններին։

Մանրամասները՝ տեսանյութում։