Ձեր վստահելի աղբյուրը

Կառավարությունն այս տարի  նախատեսում է գյուղատնտեսության ապահովագրության գործընթացի մեկնարկը՝ Արարատի և Արմավիրի մարզերում։ Այս մասին խորհրդարանում կառավարության ծրագրի քննարկման ժամանակ նշեց վարչապետ Նիկոլ Փաշինյանը՝ պատասխանելով «Իմ քայլը» խմբակցության պատգամավոր Գևորգ Պապոյանի հարցին։

«Ապահովագրության հնարավորություն կընձեռվի մի քանի մշակաբույսերի համար, մասնավորապես ծիրանի և խաղողի համար, և մի քանի դեպքերի համար, կարկտահարություն, ցրտահարություն և հրդեհներ։ Առաջին փուլի գործարկման արդյունքներով դրա հետագա ճակատագիրը կորոշենք»,- ասաց Փաշինյանը։

Պատգամավորը հետաքրքրվեց նաև օդային տրանսպորտի գների նվազման ուղղությամբ կառավարության անելիքներից, ինչին ի պատասխան վարչապետն ասաց. «Ավիատոմսերի գների հետ կապված Դավոսում մենք հանդիպում ունեցանք Մարտին Էռնեկյանի հետ և ուղիղ խոսակցություն ունեցանք։ Նա ինձ ասաց, որ այստեղ շան գլուխը թաղված է ավիավառելիքի գների և մատակարարաման համակարգի մեջ, և մենք շատ լրջորեն ուսումնասիրում ենք, թե այդ ոլորտում ինչ կարող ենք անել, որովհետև հնարավոր է, որ մենաշնորհային մեխանիզմների պատճառով է այդպես»։

«Իմ քայլի» պատգամավոր Արթուր Դավթյանը հարցրեց փաստաբանական համայնքի զարգացումից։

«Մենք գիտենք, որ փաստաբանական գործունեության մեջ հսկայական ստվեր կա։ Եկեք մտնենք «Դատալեքս» և կտեսնենք փաստաբանը, որը հարյուր հատ գործ ունի, բայց տեսեք՝ ինչքան եկամուտ է ցույց տվել ինքը, այդ հարյուր գործի եկամուտը ցույց տվե՞լ է, թե չի տվել։ Մենք ունենք խնդիր՝ չունենք գործուն մեխանիզմ՝ այդ եկամուտները հաշվառելու, ստվերը գնահատելու, կառավարելու»։