Ձեր վստահելի աղբյուրը

«Երբ մենք ասում ենք՝ վիճակը վատ է, պետք չի հասկանալ, որ այդ վիճակը Ձեզ է վերաբերվում, այստեղ բոլորս գիտենք՝ ում շնորհիվ է այդ վիճակը վատ, մենք ասում ենք՝ վատ է, հասկացանք, բա ի՞նչ եք անելու Դուք»,- խորհրդարանում Կառավարության ծրագրի քննարկման ժամանակ ասաց ԲՀԿ խմբակցության պատգամավոր Գևորգ Պետրոսյանը՝ դիմելով դահլիճում նստած ՀՀ վարչապետ Նիկոլ Փաշինյանին:

Նա վարչապետին խնդրեց հնչող քննադատությունները չընդունել  մեղադրանք իր հասցեին:
Այնուհետև պատգամավորը անդրադարձավ վարչապետի երեկվա ելույթին՝ նշելով, թե  ասում էր՝  մանկավարժները ստանում են 120 հազարի փոխարեն 20 հազար դրամ աշխատավարձ, քանի որ դրույթը վեց մասի են բաժանել: «Ենթադրենք մեկ դրույք է լինում, 120 հազարով ինչպե՞ս է դպրոցի դասատուն արժանապատիվ գոյություն ապահովելու»,-հարցրեց պատգամավորը:

Նա նաև անդրադարձավ Փաշինյանի այն հայտարարությանը, թե քաղաքացին թող հեղափոխություն անի, ոչ թե իրենք. «Քաղաքացին իր հեղափոխությունն արել է, էլ ի՞նչ անի, տնտեսական հեղափոխություն ո՞նց անի սոված մարդը: Ասում եք՝ մարդը նախ պետք է իր գլխում հաղթահարի աղքատությունը, հետո նոր իրականում: Կներեք, դուք հանդուրժողականության, փոխադարձ հարգանքի մթնոլորտում ասում եք՝ հեղափոխություն արեցիք, հիմա պայմանականորեն խնդրում եմ չանձնավորել, եթե ձեր քույրը կամ եղբայրը գա, ասի՝ աղքատ եմ, նման պատասխան կտա՞ք, ասեք, գնացեք, գլխում հաղթահարեք աղքատությունը, հետո իրականում տեսնենք ի՞նչ կլինի»:

Գևորգ Պետրոսյանը նշեց, որ Փաշինյանը շատ լավ պատասխանում է հարցերին, որովհետև իրազեկ ու գրագետ մարդ է: Նրա խոսքով՝  այս երկու օրերի ընթացքում վարչապետն ավելի շատ բան ասեց, քան գրված էր Կառավարության ծրագրում:   «Եթե էդ ամեն ինչը պիտի ասվեր՝ գրեիք:  Հակառակ դեպքում, եթե մտածում եք, որ ձեր ծրագիրը պետք է լակոնիկ լինի և քանի որ ժողովուրդը ձեզ շատ է վստահում, հավատում, գրեիք՝ դուխով ապրեք, վերջը լավ ա լինելու, դուք պրոբլեմ չունեք: Ուրիշ բան չգրեիք, հարգելի պարոն Փաշինյան», - դիմելով վարչապետին՝ ասաց ԲՀԿ պատգամավորը:

Այս խոսքերը ծիծաղեցրեցին նաև Փաշինյանին: