Ձեր վստահելի աղբյուրը

«Ալաշկերտի» նորեկ Դենիս Թումասյանն ակումբի լրատվության բաժնի հետ զրույցում նշել է, որ թիմն իրեն շատ է դուր եկել, ֆուտբոլիստները որակական լավ հատկանիշներ ունեն, փորձառու են և հիանալի կոլեկտիվ է ձևավորվել: Պաշտպանը հավելել է, որ մարզչական շտաբը ևս իրեն գոհացրել է և մարզումներն անցնում են շատ հետաքրքիր:

«Անկեղծ ասած, երբ տեղափոխվեցի «Ալաշկերտ», չէի պատկերացնում, որ այսքան գրագետ մասնագետներ են աշխատում թիմում և մարզումային գործընթացն այսքան հետաքրքիր է անցնում: Ասեմ ավելին, Ռուսաստանում ավելի քիչ են այսպիսի մարզումներ անցկացնում, քան այստեղ: Ամեն ինչ պրոֆեսիոնալ մակարդակի վրա է: Ես ուղղակի մեծ ցանկությամբ եմ ժամանում մարզումներին և հաճույք եմ ստանում:

Թուրքիայում ընթացող ուսումնամարզական հավաքի ուղղվածությունն է տակտիկայի ամրապնդումը` առաջնության նախաշեմին: Ծանրաբեռնվածությունն ավելի քիչ կլինի, քան նախորդ հավաքի ժամանակ էր: Իհարկե, ցանկանում եմ, որ առաջնությունում թիմը գրավի առաջին տեղը, իսկ հետո հարկավոր է իրականացնել հայ երկրպագուների երազանքը` եվրագավաթային մրցաշարում դուրս գալ խմբային փուլ:

Կարծում եմ, մենք կարող ենք դա անել, պարզապես պետք է հավատալ սեփական ուժերին, ամեն օր մարզվել և դրական տրամադրվել այս հարցում: «Ուրալում» երկար տարիներ խաղացել եմ Էդգար Մանուչարյանի հետ: Հարմարվելու առումով նա ինձ շատ օգնեց: Լավ մարդ և հիանալի ֆուտբոլիստ է: Հուսով եմ նա դեռ իր գոլերով կուրախացնի «Ալաշկերտի» և Հայաստանի հավաքականի երկրպագուներին»,- ասել է Թումասյանը: