Փաշինյանն առաջարկում է գյուղատնտեսությունում ժամանակավոր աշխատողներին չզրկել աղքատության նպաստից
Գործադիրի այսօրվա նիստում վարչապետ Նիկոլ Փաշինյանը ՀՀ աշխատանքի և սոցիալական հարցերի նախարարին հանձնարարեց մշակել մեխանիզմներ, որ գյուղատնտեսությունում ժամանակավոր աշխատատեղերով զբաղված անձինք չզրկվեն աղքատության նպաստից:
«Գյուղատնտեսական աշխատանքի սեզոնն է բացվում, մոտենում է պտուղ-բանջարեղենի մթերման, արտահանման աշխատանքը, ժամանակավոր աշխատատեղեր են բացվում: Նախկինում մեր ունեցած շփումները բացահայտել են մի խնդիր, որ ընտանեկան և սոցիալական նպաստներից զրկվելու հեռանկարը շատ մարդկանց հետ է պահում սեզոնային աշխատանքում ներգրավվելու հեռանկարից, ինչը տնտեսության մեջ պրոբլեմներ է ստեղծում»,- նշեց նա:
Վարչապետը աշխատանքի և սոցիալական հարցերի նախարարին հանձնարարեց Տնտեսական զարգացման և ներդրումների նախարարության հետ լուծել այս հարցերը:
«Մենք պետք է շատ արագ ստեղծենք մեխանիզմ: Ռեալ ընտանեկան և սոցիալական նպաստ ստացող մարդը չպետք է զրկվի աշխատելու հնարավորությունից: Բացի այն դեպքերից, որ կբացահայտվեն կոռուպցիոն սխեմաներ, ասենք, պարզվի, որ մարդը ամիսը 500 հազար դրամ վարկ է փակում: Ռեալ նպաստ ստացող մարդը»,- ասաց նա:
Նիկոլ Փաշինյանը նաև անդրադարձավ թափուր աշխատատեղերին՝ նշելով, որ հանրապետությունում առկա բոլոր թափուր աշխատատեղերի վերաբերյալ պետք է ունենալ ամփոփ պատկերացում:
«Մեզ ոչ միայն թիվ է պետք, այլ թիվ, հասցե աշխատավարձ, և այս տեղեկությունը պետք է հանրությանը հասանելի լինի՝ որտեղ ինչ աշխատատեղ կա, ինչ աշխատավարձով»,-նշեց վարչապետը:
Նա նաև հայտնեց, որ պետք է լրջորեն մտածել քաղաքացիների աշխատանքային իրավունքների պաշտպանության մասին:
Կառավարության նիստում վարչապետ Նիկոլ Փաշինյանը հանձնարարեց իրագործել և զարգացնել մսի և կենդանի գլխաքանակի արտահանման մեխանիզմները։
Վարչապետը հիշեցրեց՝ նախորդ տարի հավաստիացում էին ստացել, որ Հայաստանն ունի մանր եղջերավոր կենդանիների, այդ թվում՝ գառան և ոչխարի մսի արտահանման հսկայական պոտենցիալ, բայց այսօր մեր գյուղատնտեսությունն ի վիճակի չէ սպասարկել այդ պոտենցիալը:
«Մեր գործարարները ստիպված են երրորդ երկրներից ներկրել անասուններին և արտահանել»,- նշեց նա:
Վարչապետը հետաքրքվեց, թե իրականում այդքան պոտենցիալ ունի՞ մեր երկիրը, վարչապետի խորհրդական Արամ Ղարիբյանը հայտնեց, որ իրականում նման պահանջարկ կա, դա հաստատվել է նաև տնտեսվարողների կողմից և այդ պահանջարկն ամիսը կազմում է 50 հազարից ավելի գլուխ մանր եղջերավոր կենդանի: Ըստ նրա՝ տնտեսավորողները պատրաստ են արտահանել, եթե Հայաստանում նման քանակությամբ մանր եղջերավոր կենդանի լինի և մթերվի: Ընդ որում, գները 2800-ից 2900 դրամ մեկ կիլոգրամի համար կոնկրետ գյուղացուն կվճարվի:
«Յուրաքանչյուր ամիս 50 հազարից ավելի գլուխ գառ պատրաստ են արտահանել Հայաստանից, եթե կլինի նման քանակի մատակարարում»,- ասաց նա:
Վարչապետը հարցրեց, թե դրա որ մասն է այսօր Հայաստանում բուծվում, արտադրվում, Արման Ղարիբյանը նշեց. «Ընդհանուր գլխաքանակը 650-ից 700 հազար գլուխ է եթե չեմ սխալվում, դա նշանակում է մոտ 400-500 հազար գառի պոտենցիալ արտադրություն կարող է լինել, բայց նաև հայտնի է, որ վերջին տարիներին գյուղացիները որաշակի մասը պահում են և ընդլայնում իրենց արտադրությունը: Հետևաբար, կարծում ենք, որ առաջիկա տարիներին իրատեսական կլինի նման քանակի գառ արտահանել: Բայց հիմա կա դիֆիցիտ, որն ինչպես նշեցիք աշխատանքներ են տարվում երրորդ երկրներից ներկրելու և վերարտահանելու Իրանի Հանրապետություն»:
Նիկոլ Փաշինյանն ասաց, որ սա նույնպես կարևոր թեմա է և հանձնարարեց քննարկել նաև այս ուղղությունը վարկավորելու հնարավորությունները, որպեսզի քաջալերեն գյուղացիներին, մասնավորապես, զարգացնելու ոչխարաբուծությունը:
Վարչապետը նաև հանձնարարեց պատրաստվել պտուղ բանջարեղենի արտահանման սեզոնին, համոզվել գործող մեխազնիմների գործունակության մեջ և նոր պոտենցիալ արտահանողների համար շուկայի հասանելիության երաշխիքներ ստեղծել:
Նա փոխվարչապետ Տիգրան Ավինյանին ասաց, որ Տնտեսական զարգացման և ներդրումների և ապագա էկոնոմիկայի նախարարության հետ այս թեման քննարկեն:
Տիգրան Ավինյանն էլ նշեց, որ արդեն իսկ վարչապետի հետ քննարկել են թափուր աշխատատեղերի և կենտրոնների զարգացման հարցը, արդեն իսկ ծրագիրը մշակման փուլում է և մյուս շաբաթ ունենալու են քննարկում նախնական կոնցեպտի վերաբերյալ, որը կոչվելու է «Աշխատիր Հայաստան»:
«Այստեղ կցանկանայի նաև նշել, որ հարցը կոմպլեքս լուծում է ստանալու, մի քանի կետերով, որոնք Դուք նշեցիք, դրանք վերաբերվում էին թափուր աշխատատեղերի ընդհանուր տեղեկատվական կենտրոնին, կարողությունների զարգացման կենտրոններին: Դրանք իրականացվելու են միասնական մի ծրագրի շրջանակում և ես կարծում եմ, որ այստեղ ունենք լայն հնարավորություններ աշխատելու, որովհետև գործազրկության բարձր մակարդակի հետ համատեղ մենք ունենք բավական մեծ քանակի թափուր աշխատատեղեր և այս համընկնումն է, որ դեռևս չկա և պետք է մոտեցնել, որպեսզի գործազրկության մակարդակը կրճատվի, ինչպես նաև այդ թափուր աշխատատեղերի, դրանք արագ համալրվեն համապատասխան կադրերով: Սա է լինելու մեր նպատակը»,- ասաց փոխվարչապետը:
Հարակից հրապարակումներ`
Լրահոս
Տեսանյութեր
ԱՄՆ-ում հրդեհների հետևանքով մոխրացել է Սահակ-Մեսրոպ հայ քրիստոնյա վարժարանը
