Ձեր վստահելի աղբյուրը

Հեղափոխական ժողովրդի ակնկալիքները շատ ավելի քիչ ու թույլ ձևով են արտահայտված կառավարության ծրագրի բոլոր ոլորտներում՝ ներառյալ նաև դատաիրավական ու մարդու իրավունքներին վերաբերող հատվածներում։  Նման կարծիք  հայտնեց «Իրավունքների պաշտպանություն առանց սահմանների» ՀԿ նախագահ Հայկուհի Հարությունյանը՝  «Ինչպե՞ս ապահովել դատարանների անկախությունը և մարդու իրավունքների արդյունավետ պաշտպանությունը» թեմայով քննարկման ժամանակ։

«Այն իրականությունը, որ մենք ունեինք 2018-ի ապրիլից հետո, ճիշտ ձևով տեղ չի գտել կառավարության ծրագրում, այն ոչ թե դեպի առաջ, ժողովրդավարական զարգացման միտում ունեցող ծրագիր է, այլ կարծես թե նախկին վիճակը հաստատելու և ամրագրելուն ուղղված ծրագիր է»,-ասաց նա։

Որպես քաղհասարակության ներկայացուցիչ՝ Հայկուհի Հարությունյանի համար զարմանալի է եղել փաստը, որ նախագիծը չի քննարկվել, չի ապահովել ներառականություն։ Նա հույս ունի, որ այդ բացը կշտկվի ծրագիրը կյանքի կոչելու գործողությունների պլանը մշակելիս։

«Ծրագիրն ունի անհամաչափություն։ Մի կողմից  նշվում է դատարանների վրա քաղաքական հրահանգավորումների բացակայության կարևորությունը, մյուս կողմից ինստիտուցիոնալ լուծումներ խնդրի վերաբերյալ չի նշում։ Արձանագրելով հանդերձ, որ դատավորները գործել են գործադիր իշխանության հրահանգավորմամբ, կառավարությունն իր ծրագրում չի ասում, թե ինչ պետք է արվի արդեն գործող դատավորների հետ, որոնք այդ կերպ որոշումներ են կայացվել»,-ասաց նա։