Ձեր վստահելի աղբյուրը

Իրավական ակտերի նախագծերի միասնական հարթակում հրապարակված «Կառավարության կառուցվածքի և գործունեության մասին» ՀՀ օրենքում փոփոխություններ ու լրացումներ կատարելու մասին  օրենքի և հարակից օրենքների նախագծերի փաթեթին դեմ է քվեարկել 130 մարդ կամ քվեարկածների 90 տոկոսը։ Կողմ է քվեարկել 14 մարդ։  Փետրվարի 12-ին հրապարակված նախագիծը դիտել է 1044 մարդ, ներկայացվել է 10 առաջարկություն։



Հիշեցնենք, որ նախագծերի փաթեթով առաջարկվում է պետական կառավարման համակարգի արդյունավետության բարձրացման նպատակով կրճատել պետական կառավարման համակարգի մարմինների թիվը: Առաջարկվում է նաև վերացնել առաջին փոխվարչապետի ինստիտուտը՝ կրճատելով այդ պաշտոնը:

«Հիմնավորում» բաժնում ներկայացված չեն փոփոխությունների պատճառներն ու անկնկալվող արդյունքը։ Նախագծի ներքո դիտողություն, մեկնաբանություն, գնահատական, առաջարկություն թողած քաղաքացիներն ու մասնագետները ևս նշում են, որ այն հիմնազուրկ է։

«Նախագիծը զուրկ է որևէ հստակ հիմնավորումից։ Մասնավորապես, պարզ չէ, թե որքանով նոր համակարգն առավել արդյունավետ կլինի գործողի համեմատ, որքան աշխատողներ կկրճատվեն, որքան միջոցներ կտնտեսվեն, ինչպես կանդրադառնա նախատեսված փոփոխությունը պետական համակարգի գործունեության վրա և այլն։ Ստացվում է, որ որոշումը կայացվում է քաղաքական կամքի դրսևորման ու բարի երազների իրականացման համար, սակայն հաշվի չառնելով ներկայիս իրականությունը։ Առաջարկում եմ ուսումնասիրել և հստակ հաշվարկել նման որոշման կայացման բոլոր դրական ու բացասական ազդեցությունները և միայն հստակ հաշվարկների ու փաստերի վրա կայացնել համապատասխան որոշում»,-գրել է  Գևորգ Նազարյան անունով քաղաքացին։

Մեկ այլ քաղաքացի՝ Գևորգ Հարությունյանը, որը ևս չի նշել, թե ինչ կառույց կամ կազմակերպություն է ներկայացնում, մասնավորապես գրել է. «Գյուղատնտեսության նախարարությունը միացնել որևէ այլ նախարարությանը  պարզապես անմտություն է և պետական կառավարումից չհասկանալու արդյունք: Գյուղատնտեսությունը ամենախոշոր և խնդրահարույց ոլորտներից մեկն է, որն ունի մեկ միլիոնից ավելի ուղղակի շահառու (գյուղական բնակչություն), իսկ եթե ավելի խորը մտածենք, Հայաստանի ամբողջ բնակչությունը հանդիսանում է այդ ոլորտի շահառուն, քանի որ գյուղատնտեսական արտադրանքն է կերակրում բնակչությանը: Գյուղատնտեսության ոլորտի ճիշտ կառավարումը լուծում է մի շարք խնդիրներ, ինչպիսիք են պայքարը սովի և աղքատության դեմ, գյուղական բնակչության զբաղվածությունը, արտագաղթը, նույնիսկ առողջապահական և շատ այլ կարևոր խնդիրներ։ Այն կարծիքը, որ գյուղատնտեսության նախարարությունը զբաղվում է արտահանմամբ և կրկնում նախագծով առաջարկվող էկոնոմիկայի նախարարության գործառույթը, մեղմ ասած անհեթեթություն է:

Կառավարության առաջարկվող կառուցվածքը նայելիս տպավորություն է ստեղծվում, որ Հայաստանի Հանրապետությունում գյուղատնտեսության և գյուղ չկա... Պետք չէ քանդել ստեղծվածը, եթե կարող եք զարգացրեք: Հետագայում նորը ստեղծելու համար շատ ավելի մեծ ջանքեր ու միջոցներ կպահանջվեն, իսկ որ տարիներ հետո նորից գյուղատնտեսության նախարարություն ստեղծելու անհրաժեշտություն կառաջանա, դա միանշանակ է»։
Սամսոն Զատիկյանն իր առարկություններն է ներկայացրել ջրամբարների վերաբերյալ, նկատել՝ «սա չհիմնավորված, անհեռանկար և կործանարար նախագիծ է»։

Միջազգային զարգացման, հանրային քաղաքականության և կառավարման ոլորտի անկախ հետազոտող և խորհրդատու Արտակ Քյուրումյանն ընդգծել է. «Հիմնավորումների բացակայության պատճառով այս միացումները խիստ մեխանիկական տպավորություն են թողնում: Չի բացատրվում, թե արդյոք այս միացնումներում կա որևէ սիներգիա (synergy), ինչի արդյունքում, միավորված նախարարությունների ստեղծած արդյունքն ավելին է լինելու, քան առանձին նախարարություններինը: Խնդրում եմ բացատրել, թե ինչպիսի սիներգիա գոյություն ունի միացող նախարարությունների գործառույթների և գործընթացների միջև:

Տպավորություն եմ ստանում, որ այն մարդը կամ մարդիկ, որ առաջարկել են այս մոդելը, փորձում են բիզնես միջավայրի մոդելը, որտեղ ճգնաժամային պայմաններում արդյունավետության տակ նաև կարող են հասկանալ որոշ միջոցների խնայողություն (չնայած արդյունավետությունն ավելի խորը և ընդգրկուն հասկացություն է), կիրառել հանրային կառավարման ոլորտում: Սակայն սրանք իրարից էականորեն տարբերվող կառավարման մոդելներ են և բիզնես կառավարման տրամաբանությունը հանրային կառավարման ոլորտում կիրառելը ցանկալի չէ։

Մեկնաբանություն թողած հաջորդ քաղաքացին՝ Արտեմ Պետրոսյանն էլ նկատել է. «Նախագծով առաջարկվում է միացնել իրար տարածքային կառավարման և զարգացման, տարանսպորտի, պետական գույքի կառավարման, էներգետիկայի և բնական պաշարների, ջրային ռեսուրսների բնագավառները իրար և արդյունքում ստանալ տարածքային կառավարման և ենթակառուցվածքների բնագավառ.... նախ և առաջ ի՞նչ կապ ունեն իրար հետ վերոնշյալ բնագավառները որևէ տեղ հիմնավորված չէ, արդյոք երկրի տնտեսության ողնաշարը համարվող էներգետիկայի բնագավառը որևէ կերպ առնչվում է պետական գույքի կառավարման հետ, կամ տրանսպոտրի հետ»։

Հիշեցնենք, որ նախագծերի փաթեթով առաջարկվում է պետական կառավարման համակարգի արդյունավետության բարձրացման նպատակով կրճատել պետական կառավարման համակարգի մարմինների թիվը, մասնավորապես՝ նախատեսվում է.

1. Մշակույթի, Սպորտի և երիտասարդության հարցերի նախարարությունները միացնել Կրթության և գիտության նախարարությանը՝ վերջինս վերանվանելով Կրթության, գիտության և մշակույթի նախարարության:
2. Գյուղատնտեսության նախարարությունը միացնել Տնտեսական զարգացման և ներդրումների նախարարությանը՝ վերջինս վերանվանելով Էկոնոմիկայի նախարարություն,
3. Էներգետիկ ենթակառուցվածքների և բնական պաշարների նախարարությունը միացնել Տարածքային կառավարման և զարգացման նախարարությանը ՝ վերջինս վերանվանելով Տարածքային կառավարման և ենթակառուցվածքների նախարարություն, որին փոխանցվում են նաև Տրանսպորտի, կապի և տեղեկատվական տեխնոլոգիաների նախարարության կողմից իրականացվող տրանսպորտի (այդ թվում՝ ճանապարհների) ոլորտին առնչվող բոլոր լիազորությունները և գործառույթները: Օրենքի ընդունումից հետո Կառավարության որոշմամբ այս նախարարության ենթակայությանը կհանձնվեն Պետական գույքի կառավարման կոմիտեն և Ջրային կոմիտեն, որոնք իրենց կազմում կունենան միայն մասնագիտական կառուցվածքային ստորաբաժանումներ և չեն ունենա աջակցող կառուցվածքային ստորաբաժանումներ և գլխավոր քարտուղար: Այդ գործառույթները կիրականացվեն Տարածքային կառավարման և ենթակառուցվածքների նախարարության կողմից:
4. Տրանսպորտի, կապի և տեղեկատվական տեխնոլոգիաների նախարարությունը վերանվանել Բարձր տեխնոլոգիաների արդյունաբերության նախարարության՝ կրճատելով նախարարության բոլոր լիազորությունները և գործառույթները, որոնք առնչվում են տրանսպորտի (այդ թվում՝ ճանապարհների) ոլորտին, միաժամանակ ավելացնելով թվայնացման գործընթացների և ռազմարդյունաբերության հետ կապված լիազորություններ, քանի որ օրենքի ընունումից հետո Կառավարության որոշմամբ ռազմարդյունաբերական կոմիտեի ենակայությունը կհանձնվի Բարձր տեխնոլոգիաների արդյունաբերության նախարարությանը:
5. Սփյուռքի նախարարությունը միավորել Վարչապետի աշխատակազմին՝ ստեղծելով Սփյուռքի գործերով գլխավոր հանձնակատարի ինստիտուտը, որը համակարգելու է սփյուռքի հարցերին առնչվող ծրագրերը՝ ունենալով գրասենյակ նշված աշխատանքների արդյունավետ իրականացման նպատակով: