Ձեր վստահելի աղբյուրը

«Կմասնակցի՞  ԵՊՀ ռեկտոր Արամ Սիմոնյանը ԵՊՀ 100-ամյակին նվիրված միջոցառումներին, թե՞ ոչ, համալսարանի որոշելիքն է»,- այսօր կառավարությունում լրագրողների հետ զրույցում ասաց ՀՀ կրթության և գիտության նախարար Արայիկ Հարությունյանն՝ անդրադառնալով ԵՊՀ ռեկտոր Արամ Սիմոնյանի հայտարարությանը, թե նախարարի կողմից եղել է իր հրաժարականի պահանջ, բացի այդ, ԵՊՀ 100-ամյակին նվիրված միջոցառումների կառավարական հանձնաժողով չի ստեղծվում, քանի որ չեն ցանկանում իր հետ նշել այդ տոնը:

«Այս տարվա հունվարի սկզբին Արամ Սիմոնյանի հետ խոսելուց հետո եկել եմ վարչապետի մոտ ու նրան ներկայացրել եմ, որ ԵՊՀ 100-ամյակը պետք է նշենք։ Վարչապետից հատուկ հանձնարարական եմ ստացել 100-ամյակը մեծ շուքով նշելու վերաբերյալ: Այս պահին այն ստեղծված չէ, քանի որ ղեկավարում եմ Թումանյանի 150-ամյակի և Կոմիտասի 150-ամյակի հոբելյանական հանձնաժողովները: Արամ Սիմոնյանի հետ զրույցը եղել է անցած շաբաթ, եթե մարդը մտահոգություն ուներ դրա հետ կապված, կարծում եմ՝ գիտխորհրդին ավելի շուտ պետք է ասեր դրա մասին: Նա ակնհայտ սուտ է ասել, որ նման պայման է իր առջև դրվել, թե 100-ամյակը  չի լինելու, որովհետև ռեկտոր է, իսկ նման հապճեպություն ու խուճապ է նրա մոտ առաջացել, քանի որ նախորդ օրն, ըստ երևույթի, նրան հայտնի է դարձել քրեական գործեր են հարուցվելու»,- ասաց Արայիկ Հարությունյանը:

Հարցին, այնուամենայնիվ, իր կողմից Արամ Սիմոնյանին հրաժարական տալու հորդոր եղե՞լ է, Արայիկ Հարությունյանը պատասխանեց. «Դա եղել է երկար խոսակցության արդյունք, մոտ 1,5 ժամ է այդ խոսակցությունը տևել, ինչպես և հայտնի հոգևորականի հետ զրույցն ավարտվել է ձեռքսեղմումով և միմյանց հաջողություն մաղթելով։ Ես կարծում եմ, որ պարոն ռեկտորն այստեղ շատ ակնհայտ մանիպուլյացիաների է դիմում իր ղեկավարման տարիների հետ կապված հարուցված քրգործերն ինչ-որ ձևով քաղաքականացնելու համար։ Բուհերն ապաքաղաքական են ու քաղաքական որևէ ճնշումներ լինել չեն կարող»։

Նրա խոսքով՝  ԿԳ նախարարության աշխատակազմի ղեկավարը, բացի այդ, կան վարչության պետեր, որոնք ՀՀԿ անդամ են ու նրանց հետո շատ նորմալ ու շատ լավ աշխատում են: Այսինքն, ըստ նախարարի, եթե այստեղ քաղաքական խնդիր լիներ, նրանք վաղուց չէին աշխատի:
Դիտարկմանը՝  Արամ Սիմոնյանի հրաժարականի պահանջ կա՞, նախարարը պատասխանեց.  «ԵՊՀ-ն  թող որոշի՝ ուզո՞ւմ է ունենալ այդպիսի ռեկտոր»:

Արայիկ Հարություննյանը նաև անդրադարձավ Դսեղում Հովհաննես Թումանյանի 150-ամյակին նվիրված միջոցառման ժամանակ նրա քառյակներից մեկը թղթից կարդալուն, որը քննադատությունների արժանացավ. «Ես որևէ բան անգիր չեմ սիրում հիշել։ Ինձ համար տարօրինակ է, որ այդ ամբողջ հրաշալի կազմակերպված միջոցառումից  թերթից կարդալը խնդիր է առաջացրել: Կան մարդիկ, որոնք անգիր չեն սիրում ասել կամ չեն հիշում»:

Նա միաժամանակ ասաց, որ ունի ռուսական կրթություն և հիմա պայքարում է ազգային դպրոցի ու հայալեզու կրթության համար, որովհետև իր դպրոցում շատ վատ է  դասավանդվել հայ գրականությունն ու հայոց լեզուն: «Դրա համար եմ հիմա հայալեզու դպրոցների համար պայքարում, որպեսզի ապագայում մեր աշակերտներն անգիր ասելուց այլևս խնդիր չունենան»,- ընդգծեց նա: