Ձեր վստահելի աղբյուրը

Կազմակերպության նոր գլխավոր քարտուղարի ընտրության հարցի շուրջ տարաձայնությունները ՀԱՊԿ օպերատիվ ղեկավարման մեջ վակուում չեն առաջացրել։ Ռիա նովոստիի հաղորդմամբ, հայտարարել է ՌԴ նախագահի մամուլի քարտուղար Դմիտրի Պեսկովը։

«Ոչ Կրեմլը, ոչ էլ ՀԱՊԿ այլ անդամներ հուսախաբ չեն, ՀԱՊԿ օպերատիվ ղեկավարման գործում վակուում չկա, քանի որ այնտեղ աշխատում է գլխավոր քարտուղարի պաշտոնակատարը, որը կշարունակի կատարել պարտականությունները: Նա օտար մարդ չէ, որը կշարունակի կատարել իր պարտականությունները մինչև պարզվի նոր գլխավոր քարտուղարի շուրջ իրավիճակը»,- ասել է Պեսկովը։

Նա նշել է, որ իրականում անդամների մեջ որոշակի  տարաձայնություններ կան, որոնք ներկա պահին կարգավորվում են, այդ գործընթացը շարունակվում է։

ՀԱՊԿ գլխավոր քարտուղարի նշանակման ընթացակարգը ներկայումս հետաձգվում է:
ՀԱՊԿ գլխավոր քարտուղարի պաշտոնը թափուր է մնացել այն բանից հետո, երբ Հայաստանի ներկայացուցիչ Յուրի Խաչատուրովը 2018 թվականին  ազատվել է այդ պաշտոնից իր հայրենիքում քրեական հետապնդման պատճառով։ ՀԱՊԿ գլխավոր քարտուղարի պարտականությունները դրվել են գլխավոր քարտուղարի տեղակալ Վալերի Սեմերիկովի վրա։ Հայաստանը պնդում է, որ մինչև 2020 թվականը այդ պաշտոնում պետք է լինի Երևանի ներկայացուցիչը։ Բայց և այնպես, ինչպես ավելի վաղ հայտարարել էր Ղազախստանի նախագահ Նուրսութան Նազարբաևը, նոյեմբերի 8-ին Աստանայում կայացած գագաթաժողովում որոշվել է, որ այժմ ՀԱՊԿ գլխավոր քարտուղարի պաշտոնը պետք է զբաղեցնի Բելառուսի ներկայացուցիչը։ Բելառուսի կողմից առաջադրված թեկնածուն Ստանիսլավ Զասն է։  Նրա թեկնածությունը հաստատել են  ՀԱՊԿ անդամ վեց երկրներից հինգը՝ Բելառուսը, Ղազախստանը, Ղրղզստանը, Ռուսաստանը, Տաջիկստանը։ Նրան չի ընդունել միայն Հայաստանի վարչապետ Նիկոլ Փաշինյանը։