Ձեր վստահելի աղբյուրը

Կառավարությունը դադարեցրել է մատչելի գնով դիզվառելիքի, պարարտանյութի և սերմացուի սուբսիդավորման ծրագիրը,  քանի որ դրանք արդյունավետ չեն: Այս մասին Panorama.am-ի թղթակցի հետ զրույցում ասաց ՀՀ գյուղատնտեսության փոխնախարար Գառնիկ Պետրոսյանը:

Նրա խոսքով՝ հանրապետությունում իրականացվող պետական աջակցության ծրագրի շրջանակներում  հողօգտագործողներին  գյուղատնտեսական աշխատանքների նպատակով մատչելի գներով տրամադրվում էին պարարտանյութեր, սերմացու, դիզելային վառելիք, սակայն ուսումնասիրությունները ցույց են տվել, որ այդ ծրագրերն առանձնապես մեծ արդյունք չեն տվել, մինչդեռ տարիներ շարունակ պետբյուջեից հատկացվել են հսկայական միջոցներ:

Նա  հիշեցրեց, որ դիզվառելիքի, սերմացուների և պարարտանյութերի բաշխման գործընթացում չարաշահումներ են բացահայտվել և դրանցով պայմանավորված հարուցվել են  քրեական գործեր:

Ըստ Գառնիկ Պետրոսյանի՝ այժմ ավելի հասցեական կլինի պետության աջակցությունը: Մասնավորապես, ցորենի, գարու և կերակրային մշակաբույսերի գարնանացան կատարելու համար սահմանապահ  37 բնակավայրերի հողօգտագործողներին  մեկ հեկտար ցանքի համար անհատույց կհատկացվի  60 հազար դրամ:

«Այստեղ կա սահմանափակում: Աջակցությունը տրամադրվում է մինչև 7 հա-ի համար, որ դրանից կարողանան օգտվել ոչ թե խոշոր ֆերմերները, այլ փոքր ու միջին գյուղացիական տնտեսությունները»,- ասաց փոխնախարարը:

Բացի այդ, ըստ Գառնիկ Պետրոսյանի, արդեն մշակվել և շրջանառության մեջ է դրվել տեղական սերմնաբուծության ու սերմնարտադրության զարգացման ծրագիրը: Դրա  նպատակն է Հայաստանում զարգացնել սերմնաբուծությունը, և ոչ թե  գումարներ հատկացնել թանկ սերմացուների ներկրման համար:

«Համեմատության համար ասեմ, որ աշնանացան ցորենի էլիտար սերմացուն (1 կգ) գյուղացիները կարող են ձեռք բերել 180-200 դրամով , մինչդեռ առաջին վերարտադրության սերմացուն Հայաստան է ներմուծվել 380 դրամով: Մենք այս ծրագրով խնդիր ենք դնում ընդարձակել սերմադաշտերի տարածքները: Այն սերմաբուծները, որոնք մեծ փորձ ունեն և կբավարարեն ներկայացված պահանջներին, նրանց կաջակցենք զբաղվել սերմերի արտադրությամբ: Եւ սուբսիդիան կուղղվի տեղական սերմարտադրողներին, դա էլ շղթայական ազդեցություն կունենա և արդյունքում թե սերմերի քանակը կավելանա, թե գներն ավելի մատչելի կդառնան»,- ասաց փոխնախարարը:

Անդրադառնալով պարարտանյութերի ներկրման ծրագրին, Գառնիկ Պետրոսյանը նշեց, որ ազոտական պարարտանյութերի սուբսիդավորումը դադարեցվել էր դեռևս 2018 թվականի տարեսկզբին, արդյունքում շուկան ազատականացվել է, հայտնվել են մեծ թվով խաղացողներ: Այսօր գյուղացիական տնտեսություններին  1 պարկ (50 կգ) պարարտանյութը հասանելի է 6600-6700  դրամով։ Մինչդեռ, ըստ նրա,  2015-2016 թթ-ին պետական օժանդակության ծրագրերի շրջանակում ձեռքբերված 1 պարկ ազոտական պարարտանյութի գինը կազմել է 9000-9200 դրամ և դրա սուդսիդավորման համար պետբյուջեից  տրամադրվել է 2700-ից մինչև 3200 դրամ:

«Հիմա  շուկան ազատականացվել է և մեծ թվով ներկրողներ են խաղի մեջ մտել, ինչի հետևանքով  գինը նվազել է: Այսօր վրացական արտադրության պարարտանյութը մատակարարում են 6600-6700 դրամով: Հիմա  այդ սուբսիդիաները կուղղենք այլ նպատակների համար»,- ասաց Գառնիկ Պետրոսյանը:

Ներկայացնելով որոշ տվյալներ էլ դիզվառելիքի ծրագրից՝ փոխնախարարը նշեց, որ նախորդ տարի այդ  ծրագրից 317 հազար գյուղացիական տնտեսություններից օգտվել է ընդամենը 1,6%-ը, այսինքն՝ 5000 հազարից ավելի տնտեսություն: Ուստի, ըստ նրա, ծրագիր անել միայն այդքան շահառուի համար, անիմաստ և անտրամաբանական է: Նա նաև ասաց, որ պարարտանյութերի ծրագրից էլ  լավագույն տարիներին օգտվել է շահառուների մոտ 20 տոկոսը:

«Պետք է առանց այն էլ սուղ միջոցներն առավել նպատակային օգտագործել, իսկ գյուղոլորտում մեծ ներդրումների անհրաժեշտություն կա, տարեցտարի գյուղացու սոցիալական վիճակն ավելի է վատթարացել, բայց հույսը, լավատեսությունը կա, որ ինչ-որ բան պետք է փոխվի, դրական փոփոխություններ կլինեն»,- նշեց Գառնիկ Պետրոսյանը: