Ձեր վստահելի աղբյուրը

«Եվրատեսիլի»  կազմակերպիչները զգուշացրել են Ուկրաինային չքաղաքականացնել երաժշտական մրցույթը։  Գազետա.ռու-ի հաղորդմամբ, մրցույթի պրոդյուսեր Իոն Օլա Սանդը ասել է, որ կազմկոմիտեն ստացել է բազմաթիվ նամակներ Maruv երգչուհու վրա ճնշումների մասին, որին քննադատել են Ռուսաստանում համերգների համար։

«Դա միգուցե խնդիր է Ուկրաինայի և ուկրաինական պատվիրակների համար»,- ասել է նա։ Պրոդյուսերը հիշեցրել է, որ «Եվրատեսիլը» քաղաքական մրցույթ չէ. «Մենք գնահատում ենք ձայնը, երաժշտությունը, այլ ոչ թե արտիստների գաղափարը սցենարից դուրս»։

Իոն Օլա Սանդի խոսքով, Maruv-ի շուրջ իրավիճակը այժմ «քննարկում են գործընկերների հետ»։

Նշենք, որ Ուկրաինայում «Եվրատեսիլի» ազգային ընտրական փուլն անցած երգչուհի Mаruv-ին արգելել են հյուրախաղերի գնալ Ռուսաստան։  Ուկրաինայի հանրային հեռուստառադիոընկերությունը երգչուհուն պայմանագիր է փոխանցել, որի մեջ Ռուսաստանում հյուրախաղերով հանդես գալն արգելող կետ կա։

Նշենք, որ «Եվրատեսիլ 2019» երգի միջազգային մրցույթն անցկացվելու է Թել-Ավիվում մայիսի 14-ին և 16-ին, եզրափակիչը՝ մայիսի 18-ին։  64-րդ մրցույթին մասնակցելու է 42 պետություն, այդ թվում նաև Հայաստանը։ Հայաստանը «Եվրատեսիլ 2019» երգի միջազգային մրցույթում ներկայացնելու է Սրբուկը։