Ձեր վստահելի աղբյուրը

Լեռնային Ղարաբաղի հարցում ԵՄ-ն օժանդակում է Մինսկի խնբի համանախագահների ջանքերին։ Այսօր մամուլի ասուլիսի ժամանակ ասաց Հայաստանում Եվրամիության դեսպան Պյոտր Սվիտալսկին։

Դեսպանը նշեց, որ գիտեն մարտահրավերներ, բայց կան մի քանի դրական քայլեր, որից է հենց իրավիճակը՝ աննախադեպ ցածր մակարդակի պատահարներ, հրադադարի ռեժիմի քիչ խախտումներ։

«Բայց, իհարկե, գործընթացը շատ դժվար է ու երբեմն շատ փխրուն։ Ինչ կարող ենք մենք անել հետևյալն է, որ վստահենք Մինսկի խմբի համանախագահների ջանքներին։ Բայց նաև քննարկում ենք Մինսկի խմբի համանախագահների հետ մեր հավանական ներդրումը, եթե զարգացումները միտված լինեն դեպի դրական ելք։ Սատարում ենք նաև 2 երկրներում քաղհասարակության ներկայացուցիչների միջև շփումներին։ ԵՄ-ն պատրաստ կլինի նպաստել տարածաշրջանի վերականգնմանը, երբ խաղաղություն լինի»,-ասաց Սվիտալսկին։

Խոսելով մարտի սկզբին ՀՀ վարչապետ Նիկոլ Փաշինյանի՝ Բրյուսել կատարելիք այցի մասին՝ դեսպանը նշեց, որ ամենաբարձր մակարդակի քննարկումները գերազանց հնարավորություն են ուղեգծելու համագործակցության շրջանակները։ ԵՄ առաջնորդների հետ Փաշինյանը քննարկելու է տարբեր ակնկալիքներն ու կարիքները, որ ունի ՀՀ-ն ընտրություններից հետո։

Խոսելով իշխանափոխությունից հետո այն մտավախության մասին, որ ԵՄ ֆինանսական աջակցության 110մլն եվրոն չի ծախսվել՝ ՀՀ կողմից ծրագրեր չներկայացնելու պատճառով, ասաց, որ չակտիվացված գումարների հետ կապված քննարկումներ են ընթանում։

«Որպես օրինակ, Երևանում կան բազմամիլիոնանոց ծրագրեր, որ կանգ են առել կամ ձգձգվել են նախկինում քաղաքապետի ընտրություններից առաջ։ Հիմա ունենք արագ արձագանքող հաղորդակից քաղաքապետարանում, թե ինչպես առաջ տանենք այս ծրագիրը»,-ասաց դեսպանը։

Դեսպանը նշեց, որ արդեն կան հատկացված գումարներ, դրանք կարող են ու պետք է օգտագործվեն։ Քննարկում են հարցերը, երբեմն խնդիրները բավական բարդ են իրենց բնույթով, ոչ թե հիմնված են  քաղաքական կամքի բացակայության վրա, այլ  գործնական խնդիրների ինքնահոսի պատճառով են, ծրագրերի դանդաղ իրականացման պատճառով։

«Եթե արդեն հատկացված գումարները չեն ծախսվում, ապա դրանք հետ են կանչվում ու այլևս չեն կարող օգտագործվել։ Բյուջետային հատկացումներն այսպես են իրականացվում։ Մենք աջակցում ենք, որ միջոցները չկորսվեն»,-ասաց Սվիտալսկին։

Անդրադառնալով ԵՄ ֆինանսական աջակցության մեծացմանը, Սվիտալսկին նշեց, որ 2018թ.-ի գործողությունների ծրագիրը ցույց է տալիս 20-25 տոկոս ֆինանսական ավելացում։ Կարևորեց Հայաստանի ներգրավումը «Հովանոցային ֆոնդում», որտեղից ՀՀ-ն նախորդ տարի ստացել է 10մլն եվրո։

«Սա քաղաքական ազդակ է։ Հովանոցային ֆոնդի անդամ լինելն ավելի կարևոր է, քան ստացած գումարի չափը, քանի որ այս ֆոնդը քաղաքական միջոց է, որն առաջարկվում է այն դեպքում, երբ ճանաչվում է, որ երկիրն առաջընթաց է արձանագրել քաղաքական բարեփոխումների ճանապարհին»,-ասաց Սվիտալսկին՝ հիշեցնելով հանձնակատար Յոհաննես Հանի հայտարարությունը Երևանում, որ կլինի էական ֆինանսական ավելացում Հովանոցային ֆոնդից 2019-ի համար, որը ևս ազդակ է, որ ԵՄ-ն բարձր է գնահատում փոփոխությունները, նաև ընտրությունները։

Դեսպանն այս տարին վճռորոշ անվանեց, քանի որ այս տարի է որոշվելու հանձնառությունները առաջիկա 7 տարիներին՝ 2021թ.-ից հետո։

«Եթե Հայաստանը առաջ շարժվի բարեփոխումների ճանապարհին ու ցույց տա միջոցների նպատակային ծախսը, կարող է հույս ունենալ ֆինանսական միջոցների ավելացման»,-ասաց Սվիտալսկին։