Ձեր վստահելի աղբյուրը

«Մեր ամեն մի զինվորի կյանքը մեզ համար պետք է լինի սրբություն»,- այս մասին այսօր «Մարդու իրավունքների խախտումները բանակում և դրանց կանխարգելման մեխանիզմները» թեմայով քննարկման  ժամանակ ասաց ՀՀ ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը։

Նա նշեց նաև, որ բանակում պետք է ծառայեն միայն առողջ զինվորներ։ «Ես իմացա ու դա սարսափելի է, որ գիշերամիզությունը մտցված է բանակում ծառայելու հիվանդությունների ցանկի մեջ։ Դուք պատկերացնո՞ւմ եք այդ երեխայի ճակատագիրը երկու տարվա ընթացքում, ո՞վ է այս ցանկը կազմել։ Այդ հիվանդությունների ցանկը պետք է լուրջ ուսումնասիրվի, մասնագիտորեն, ընդ որում՝ ներառելով նաև հոգեբանների խմբերի։ Բանակն այսօր ոչ միայն հոգևոր այրերի, նաև հոգեբանների կարիք ունի»,- ասաց պատգամավորը։

Անդրադառնալով բանակում գրանցվող դեպքերին՝ մասնավորապես ինքնասպանություններին, Անդրանիկ Քոչարյանը նշեց, որ բանակում ինքնասպանություն չպետք է լինի։ «Դուք հասկանո՞ւմ եք ինքնասպանությունն ինչ է։  Դա նշանակում է, որ այդ զորամասը լուծարման ենթակա է, ու նորից պետք է հավաքվի։ Անտարբերության մթնոլորտը բանակի ներսում պետք է չլինի՝ սկսած նախարարից մինչև դասակի հրամանատարը»,- նշեց նա։ 

Պատգամավորի խոսքով՝ Պաշտպանության և անվտանգության հարցերի հանձնաժողովը բաց է լինելու քաղաքացիական հասարակության համար, որպեսզի խնդիրները վերհանեն և լուծեն։

«Այսօրվանից հայտարարում եմ՝  մեր հանձնաժողովը բաց է լինելու բոլոր հարթակներում, մեզ դիտեք որպես ձեր գործընկերը։ Ցանկացած դեպքով,  եթե անհրաժեշտ է մեր միջամտությունը, լսումներ կկազմակերպենք։ Եվ ոչ միայն լսումներ։ Մենք հասնելու ենք նրան, որ մեկ զինվորի մահը պետության համար դառնա խնդիր։ Չի լինելու, որ մի զինվոր մահանա, և մեկը փորձի դա կոծկել։ Կոծկելը տեսանք՝ մարտի 1-ին արեցին, կոծկեցին, փչացնելով ամբողջ պետական, ուժային համակարգը։ Կոծկումը ավելի հրեշավոր հանցագործություն է, քան իրական պատկերի վերլուծությունը, իրական  մեղավորներին պատժելը։ Սա իմ մոտեցումն է»,- նշեց Անդրանիկ Քոչարյանը։

Նա միաժամանակ շեշտեց, որ այս ամենին զուգահեռ իրականում ԶՈւ-ն ունի նաև  լուրջ ձեռքբերումներ թե կադրերի պատրաստման, թե սպառազինության առումով։