Ձեր վստահելի աղբյուրը

Շենգավիթի ընդհանուր իրավասության դատարանը չի բավարարել  ԱԺ նախկին պատգամավոր, գեներալ Մանվել Գրիգորյանին գրավով ազատ արձակելու միջնորդությունը։  Որոշման  հրապարակումից հետո լրագրողներին Մ.Գրիգորյանի փաստաբան Արսեն Մկրտչյանն ասաց, որ իրենք կրկին միջնորդություններ կներկայացնեն։

«Պեպսի-Կոլյայի» պես՝ կրկին փորձիր, մինչև...»,- նշեց նա։  

Մ. Գրիգորյանին մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:
Նա կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել է։

Նշենք, որ արդեն մի քանի օր է Մանվել Գրիգորյանը գտնվում է «Նաիրի» բժշկական կենտրոնում՝ ստացիոնար բուժման։