Ձեր վստահելի աղբյուրը

Քաղաքագետ Հրանտ Մելիք-Շահնազարյանը բաց նամակ է հղել ԵՊՀ հոգաբարձուների խորհրդի անդամներին։ Ֆեյսբուքյան նրա  էջում հրապարակված նամակում ասված է.

«ԵՊՀ հոգաբարձուների խորհրդի հարգելի անդամներ, վաղը չափազանց կարևոր օր է լինելու Մայր բուհի համար։ Համալսարանի շուրջ տեղի ունեցող վերջին շրջանի զարգացումները որևէ կասկածի տեղ չեն թողնում` ԵՊՀ-ն կանգնած է նոր մարտահրավերի առջև, որը սպառնում է ոչ միայն բուհին, այլև կրթությանն ընդհանրապես։ Վստահ եմ` հստակ գիտակցում եք, որ էության մեջ վաղը դուք քննարկելու եք ոչ թե ռեկտոր Արամ Սիմոնյանի հետագա պաշտոնավարման, այլ ԵՊՀ-ն գերության հանձնելու հարցը։ Դա է ձեզանից պահանջում այն ուժը, որը մեր երկրում իսկական պատերազմ է սկսել մեր իսկ արժեքների դեմ։

Այս կռվում, ցավոք, շատ ամրոցներ ընկան։ Բայց ԵՊՀ-ն պետք է կանգուն մնա։ Խնդրում և պահանջում եմ` ամրոցի դռները ներսից չբացեք։ Նման դավաճանությունը չի ներվի երբեք։ Դրա մասին կպատմվի սերնդե սերունդ, դա կհիշվի որպես մեծագույն խայտառակություն ու ամոթ։

ԵՊՀ հոգաբարձուների խորհրդի հարգելի անդամներ, ես և ինձ պես հազարավոր համալսարանականներ կանգնած ենք ԵՊՀ-ի և նրա նվիրյալների կողքին։ Հիշե՛ք դա քվեարկության պահին և չընկրկեք ոչ մի իշխանավորի և/կամ այլ հանգամանքի առջև։ Արեք այդ քայլը և ստացեք իրական հնարավորություն լուծելու Մայր բուհի բոլոր խնդիրները՝ մինչև անգամ ռելտորի փոփոխոխություն, եթե դրա կարիքն իրապես կա։ Բայց դա հաջորդ խնդիրն է։ Այսօր դուք ուղղակի պարտավոր եք փրկել համալսարանն ու հայկական դպրոցը օտար ազդեցություններից։ Այդ առաքելությունը ձեր ուսերին է։ Չերկնչե՛ք։ Թող հաջորդ սերնդները ստիպված չլինեն վերանվաճել Մայր բուհը»։