Ձեր վստահելի աղբյուրը

2018 թվականին Զինված ուժերում մահացել է 63 զինծառայող։ Այս մասին այսօր «Մարդու իրավունքների խախտումները բանակում և դրանց կանխարգելման մեխանիզմները» թեմայով քննարկման ժամանակ ասաց իրավապաշտպան Ժաննա Ալեքսանյանը։

«Թեև մեր երկրում հեղափոխություն է տեղի ունեցել, բայց  2018 թվականին բանակում, վիճակագրական տվյալներով, 11 ինքնասպանության դեպք է եղել, ընդհանուր առմամբ՝ 63 մահվան դեպք։ Այստեղ մեծ թիվ են կազմում վթարները, որոնց վերաբերյալ,  չգիտես ինչու, զինվորական դատախազությունը  հայտարարել էր, որ դրանք  կապված չեն ծառայության հետ»,-  նշեց իրավապաշտպանը։

Նրա ներկայացրած տվյալների համաձայն՝ 2017 թվականին ԶՈւ-ում գրանցվել է 72 մահվան դեպք, որից 10-ը եղել է ինքնասպանություն։

Ժաննա Ալեքսանյանի խոսքով՝ ինքնասպանությունները վկայում են այն մասին, որ զորամասերում առկա է բռնի մթնոլորտ։ «Ակնհայտ է, որ կա բռնի մթնոլորտ։ Մեր կազմակերպությունը՝ «Լրագրողներ հանուն մարդու իրավունքների» ՀԿ-ն, շատ ահազանգեր է ստանում և կատարում ենք փաստահավաք աշխատանք ՊՆ-ի տարածած դեպքերի մասով»,- ընդգծեց նա։

Իրավապաշտպանը ներկայացրեց նաև օրինակներ. «Օրինակ՝ Յուրիկ Բրոյանի գործը, որը բռնության է ենթարկվել, հետո՝ ինքնավնասում, հետո կորցրել է խոսելու ունակությունը: Մենք մեկ ամսից  ավելի զբաղվում ենք այդ գործով և կարողացանք հասնել նրան, որ տղան հիմա արդեն խոսում է, բայց մինչ այդ ՊՆ-ն երկու հայտարարություն տարածեց, թե նա սիմուլյանտ է, սակայն երբ մենք  նրան տեսանք, նա անօգնական վիճակում էր։ Հիմա Բրոյանը հոգեբուժարանում դատահոգեբուժական փորձաքննության է ենթարկվում և նրան ասում են, որ նորից պետք է տեղափոխեն ՌՈ, մինչդեռ նա ցնցումների մեջ է, ձեռքերը դողում են։ Ոնց կարելի էր մտածել, որ նա սիմուլյանտ է»։

Նրա խոսքով՝ Պաշտպանության նախարարությունը պետք է վերլուծի իրավիճակը: Հրամանատարն, ըստ նրա, չի կարող անձեռնմխելի լինել։ «Այս դեպքերով մենք չենք տեսնում հրամանատարական կազմից որևէ մեկը պատասխանատվության ենթարկվի, չկա այդպիսի բան։ Չկա սպա, որը պատասխանատվության է ենթարկվում, կա միայն պատասխանատվության ենթարկվող շարքային զինծառայող։ Հավատացեք, շատ եմ ուզում, որ այդ ամենը փոխվի։ Չգիտեմ ինչու, մտածում են, որ մենք հակաբանակային ենք, ես չեմ պատկերացնում, թե ինչպես կարելի է անտարբեր մնալ»,- ասաց  իրավապաշտպանը։