Ձեր վստահելի աղբյուրը

«Մեկ Հայաստան» կուսակցության նախագահ Արթուր Ղազինյանն անդրադարձել է Իրանում Փաշինյանի հայտարարության այն հատվածին, որը վերաբերում է Հայաստանի տարածքով իրանական գազի տարանցման հնարավորությանը։

Նա գրել է.

«Հայաստանի տարածքը իրանական գազի տարանցման համար տրամադրելու Փաշինյանի հայտարարությունը առաջին հայացքից բխում է Հայաստանի ազգային և պետական շահից:

Այս շահի գիտակցումը եղել Հայաստանի բոլոր իշխանությունների մոտ,և դրանով էր պայմանավորված Իրան - Հայաստան գազատարի կառուցումը՝ թեկուզ նախատեսվածից առավել փոքր տրամագիծ ունեցող խողովակով:

Սակայն բնական գազի տարանցումը, բացի տնտեսական օգուտներից, հարուցում է անվտանգային լուրջ ռիսկեր:

Եվրոպայի էներգետիկ անվտանգության ապահովման և պաշտպանության համակարգում բնական գազի մատակարարման ճանապարհների դիվերսիֆիկացիան հռչակվել էր որպես Ռուսաստանից գազային կախվածության թուլացման միակ արդյունավետ միջոց:

Ճանապարհների փնտրտուքը, վերջին 20 տարիների ընթացքում, պատճառ է դարձել ծանր և արյունալի պատերազմների: Որպես օրինակ բավարար է նշել Սիրիայի պատերազմը:

Որպեսզի փակենք նաև անվտանգային ռիսկերը, անհրաժեշտ է հավաստիանալ, որ այս հայտարարությունը համաձայնեցված է եղել Ռուսաստանի Դաշնության և Միացյալ նահանգների հետ:

Եթե նշված համաձայնություններն առկա են և ամրապնդված են գործուն երաշխիքներով, ապա Փաշինյանի այս հայտարարությունը կարելի է ճանաչել վերջին 20 տարվա Հայաստանի ամենալուրջ դիվանագիտական հաղթանակ:

Իսկ եթե ոչ, ապա նույնիսկ սարսափում եմ մտածել, թե ինչ հետևանքներ կարող է ունենալ այս հայտարարությունն ու դրա պրակտիկ իրագործումը»։

Հիշեցնենք, որ Իրանի Իսլամական Հանրապետության նախագահ Հասան Ռոհանիի հետ հանդիպման ժամանակ Նիկոլ Փաշինյանը մասնավորապես հայտարարել էր. «Հայաստանը պատրաստ է Իրանի հետ տարանցման համագործակցություն ծավալել և լինել իրանական գազի տարանցիկ երկիր»։