Ձեր վստահելի աղբյուրը

«Ինձ «Մի կաթիլ մեղրի» պատմությունն է հիշեցնում կամ փչացած հեռախոսի»,- լրագրողներին ասաց ՀՀ մշակույթի նախարարի պարտականությունները կատարող Նազենի Ղարիբյանը՝ խոսելով ՀՀ մշակույթի նախարարության ՊՈԱԿ-ների գործունեության վերլուծությանը վերաբերող տեղեկանքի շուրջ ծավալված քննարկումների մասին:

Նա նշեց, որ խոսքը փաստաթղթի մասին չէ, այլ ընդամենը կառավարության հանձնարարականի, նման հանձնարարական ստանում են ամեն օր։

«Հանձնարարականը ստացվել էր ուսումնասիրելու, վերլուծելու մեր գործունեության, ՊՈԱԿ-ների գործունեության դաշտը, վերլուծել, թե ինչպիսին է ՊՈԱԿ-ների առկա վիճակը, տալ որոշակի առաջարկություններ։ Օպտիմալացման գործընթացի հետ է կապված։ Բայց հստակ հանձնարարական կար՝ առաջնորդվել ոչ թե խնայողության, տնտեսական կամ կրճատումների ճանապարհով, այլ պատասխանատվության համախմբման, կենտրոնացման, գործունեության արդյունավետության բարձրացման հրամանայակով շարժվել»,- ասաց  նա։

Ն. Ղարիբյանի խոսքով, նախարարության բոլոր մասնագիտական վարչությունները մասնակցել են աշխատանքին, պատրաստել են ՊՈԱԿ-ների վերաբերյալ  վերլուծություն, այդ  տեղեկանքն իր ժամկետների մեջ ուղարկվել է կառավարություն։ Նա նշեց, որ խոսքը գնում է ընդամենը սևագիր առաջին տեղականքի մասին, այդ պատճառով էլ  չեն հրավիրել ՊՈԱԿ-ների ղեկավարներին քննարկումների։

Ընդամենը սևագիր տեղեկանք է, դա չի նշանակում, որ կառավարությունը պետք է ընդունի ի գիտություն, 100 տոկոսանոց որոշում կայացանի, մենք մարտի 5-ին ստորագրենք»,- ասաց մշակույթի նախարարի պարտականությունները կատարողը։

Ն. Ղարիբյանի խոսքով, եթե անգամ խոսք լինի որևէ ՊՈԱԿ-ի կամ ՊՈԱԿ-ների լուծարման, ՊՈԱԿ հասկացության վերացման  մասին, կլինի միայն այն դեպքում, եթե կառավարությունը կամ մշակույթի նախարարությունն ունենա այլընտրանքային առաջարկելու տարբերակներ։

«Հնարավոր չէ որպեսզի մենք ասենք՝ փակում ենք ՊՈԱԿ-ը, գնացեք ինչ ուզում եք արեք։ Չի կարող նման բան լինել։ Դրա համար մենք զուգահեռաբար աշխատում ենք օրենսդրական դաշտը կարգավորելու ուղղությամբ։

Բացի օրենսդրական դաշտից, մենք նաև պետք է կարողանանք ինքներս հասկանալ, թե ինչպիսի կառուցվածքն է, համագործակցությունն է,  գոյության ինչպիսի ձևն է, առավելագույնս հարմար մեր ստեղծագործական կատարողական կամ մշակութային ժառանգության պահպանման և հանրահռչակման ՊՈԱԿ-ների համար»,- ասաց մշակույթի նախարարի պաշտոնակատարը։

Նա նշեց, որ այն, ինչ իրենց տեղեկանքում է, չի կարող հենց այդպես վերջնական փաստաթղթում լինել բոլորի առումով ու ստորագրվել։

«Հնարավոր է կառավարությունը չընդունի, հետ ուղարկի, ասի՝ գնացեք, նորից վերլուծեք, հիմնավորումները թերի են»,- ասաց Ն. Ղարիբյանը։

Խոսելով կոնկրետ Սոս Սարգսյանի անվան համազգային թատրոնի լուծարման մասին, նա նշեց, որ փակելու մասին որևէ խոսք չկա. «Առաջնորդվելով նույն հանձնարականի առաջադրանքով, խոսքը գնում է միայն պատասխանատվության համախմբման, վարչարարության գուցե ավելի օպտիմալ տարբերակ փնտրելու մասին, քանի որ իրենց իսկ կանոնադրության մեջ կետ կա՝ թարմ ուժեր, երիտասարդական, փորձարարական ներկայացումներ խրախուսելու, այդ պատճառով էլ մասնագետի կողմից հավանաբար այդպես առաջարկ է եղել, որ Կինոյի և թատրոնի ինստիտուտի հետ միասին լինել։ Դա չի նշանակում պետական հոգածությունից պետք է դուրս գալ»։
Նա ընդգծեց, որ այս պահին որևէ պետական մշակութային օջախի պետական հոգածությունից դուրս գալու մասին խոսք չկա, կան վերլուծություններ, դրանց հիման վրա արված առաջարկներ, վերլուծություններնն էլ տարբեր չափանիշներով են արված։

«Խոսք չկա որևէ թատրոն փակելու մասին։ Այո, պետք է մտածել բյուջեի գումարներն ինչպես ավելի արդյունավետ, խնայողաբար օգտագործել, որպեսզի մաքսիմալ արդյունք ստանալ, միաժամանակ չվնասելով, ընդհակառակը, օգնելով բոլոր ստեղծագործական կոլեկտիվներին, որպեսզի կարողանան շատ ավելի լավ աշխատել, արդյունավետ, իրենց լավ զգան։ Դա է մեր առաջին ու միակ մղումը։

Խոսքը չի գնում որևէ ստեղծագործական միավորման ստեղծագործական կոլեկտիվի փակելու մաիսն։ Խոսքը գնում է իրենց հոգսը թեթևացնելու մասին։ Հիմա «Գնումների մասին» օրենք, Հարկային նոր օրենսգիրք են ընդունում, կան դրույթներ, որոնք շատ ՊՈԱԿ-ներ, թատրոններ, ստեղծագորածական միավորներ փաստի առաջ են կանգնելու, չեն կարողանալու անել։ Մտածում ենք՝ ինչպես անել, որ կենտրոնանան իրենց ստեղծագործության վրա, չկենտրոնանալ վարչարարության վրա»,- ասաց Ն. Ղարիբյանը։

Մշակույթի նախարարի ժամանակավոր պաշտոնակատարի խոսքով, բռի, կոպիտ, բռնի ձևով որևէ մեկին չեն կարող ստիպել փակվել կամ լուծարվել, վերակազմակերպվել, եթե իրենք չեն համոզվում, որ դա իրենց համար լավագույն տարբերակն է։
Լրագրողի կոնկրետ հարցին` ո՞ր թատրոն է լուծարվելու, նա պատասխանեց. «Չկա այդպիսի հստակ պատասխան»։