Ձեր վստահելի աղբյուրը

Այս տարի լրանում է Եղիշե Չարենցի տուն-թանգարանի հիմնադրման 55-ամյակը: Տուն-թանգարանի տնօրեն Անահիտ Ասատրյանից Panorama.am-ը տեղեկացավ, որ տարվա ընթացքում անպայման 55-ամյակին նվիրված հոբելյանական միջոցառում կազմակերպվելու է,  սակայն դեռ պարզ չէ, թե ինչպիսի ֆորմատով այն կլինի, կախված կլինի գումարից։

Ինչ մինչ այդ՝ մարտի 13-ին, նշելու են մեծ բանաստեղծի 122-ամյակը։  Ա. Ասատրյանը հայտնեց, որ այդ օրվա միջոցառումները մեկնարկելու են  Եղիշե Չարենցի հուշարձանի մոտ, այնուհետև արդեն շարունակվելու են տուն-թանգարանում։

Նա նաև ասաց, որ տարեցտարի ավելանում են տուն-թանգարանի այցելուների քանակը։ Ա. Ասատրյանը կարևորեց այն, որ այցելուներն ավելի տեղեկացված են Չարենցի կյանքի, գործունեության մասին,  հետաքրքիր ու խորքային հարցեր են տալիս։

Եղիշե Չարենցի տուն-թանգարանը հիմնադրվել է 1964 թվականի փետրվարի 8-ին` Խորհրդային Հայաստանի նախարարների խորհրդի որոշմամբ: Այն իր դռները բացել է ժողովրդի առջև 1975թ. հունվարին: 1987-ին Չարենցի ծննդյան 90-ամյա հոբելյանի առթիվ շենքը ենթարկվել է մասնակի փոփոխության և Հայաստանի կառավարության որոշմամբ թանգարանի տարածքն ընդլայնվել է: Այսօր թանգարանն ընդգրկում է 626.3 քմ տարածք, վերականգնված է (հուշատուն) մեմորիալ մասը, իսկ մյուս երեք հարկաբաժինները զբաղեցնում է հիմնական ցուցադրությունը: Բնակարանը կահավորված է արևելյան ու եվրոպական իրերի համադրումով: 

Տուն-թանգարանում պահպանվում և ցուցադրվում են բանաստեղծի անձնական իրերը, ձեռագրերը, փաստաթղթերը, գրքերը, լուսանկարները և այլ նմուշներ: Այն բանաստեղծի կյանքի, գրական-մշակութային, հասարակական-քաղաքական գործունեության ուսումնասիրության գիտական կենտրոն է։

Չարենցն այդ տանն ապրել է 1935-1937 թվականներին։