Ձեր վստահելի աղբյուրը

Փետրվարի 25-ին՝ մեկ շաբաթ առաջ Panorama.am-ի խմբագրությունը գրավոր հարցում էր ուղարկել «Իմ քայլը» հիմնադրամին։  Վկայակոչելով «Տեղեկատվության ազատության մասին» ՀՀ օրենքը՝   հիմնադրամի հիմնադիր Աննա Հակոբյանից խնդրել էինք պատասխանել հետևյալ հարցերին.

1.      «Իմ քայլը»-ը հիմնադրամը ստեղծվել է 2018-ի ամռանը։ Նախորդ տարվա ընթացքում ո՞ր ֆիզիկական ու իրավաբանական անձանց կողմից ի՞նչ նվիրատվություններ են կատարվել հիմնադրամին։ Խնդրում ենք նվիրատվությունների վերաբերյալ տեղեկատվությունը տրամադրել ամբողջությամբ՝ նշելով կոնկրետ անձի կամ կազմակերպության կողմից նվիրաբերած գումարի չափը, նվիրատվություն կատարելու ամսաթիվը։
2.      Այս տարվա ընթացքում՝ մինչև փետրվարի 25-ը ներառյալ ովքե՞ր և ի՞նչ նվիրատվություններ են կատարել հիմնադրամին։
3.      Ընդհանուր առմամբ, ինչքա՞ն գումար է նվիրաբերվել հիմնադրամին մինչև փետրվարի 24-ը ներառյալ։
4.      Հիմնադրամն ինչպե՞ս է տնօրինել այդ գումարները, խնդրում ենք ծախսը ներկայացնել մանրամասն կերպով՝ նշելով ծրագիրը, ամսաթիվը, գումարի չափը և այլն։
5.      Խոստացել էիք, որ հիմնադրամը  գործելու է ««բլոքչեյն» տեխնոլոգիայի միջոցով՝ ապահովելու լիարժեք թափանցիկություն և հաշվետվողականություն»։ Սակայն հիմնադրամի ստեղծումից մոտ 7 ամիս անց հիմնադրամի պաշտոնական էջում նվիրատուների, պատվավոր գործընկերների մասին տեղեկություններ չկան։ Ինչո՞ւ։ Ե՞րբ այդ տեղեկատվությունը կհրապարկվի կայքում։

Այսօր՝ մարտի 4-ին, ՏԱ օրենքով պատասխանի համար սահմանված ժամկետի (առավելագույնը հինգ աշխատանքային օր) խախտմամբ, հիմնադրամից պատասխան ենք ստանում, որի ներքո ստորագրված է՝ «Իմ քայլը» հիմնադրամի թիմ։

1-ին. 2-րդ, 5-րդ հարցերին պատասխանել են երեք տողով. «Ի պատասխան Ձեր հարցմանը տեղեկացնում ենք, որ Հիմնադրամի նոր կայքը, որը պատրաստ կլինի առաջիկա 2-3 շաբաթվա ընթացքում, կունենա «Նվիրատուներ» բաժին։ Նշյալ բաժնում զետեղված կլինի նվիրատուների և նվիրաբերությունների մասին տեղեկատվություն՝ Հայաստանի Հանրապետության օրենսդրությանը համապատասխան»։

Որևէ պատճառ, հիմնավորում, պատասխան, բացատրություն,  թե ինչո՞ւ մինչև հիմնադրամի կայքում հրապարակելը այդ տեղեկությունները չեն տրամադրվում լրատվամիջոցին, չկա։  Ամենայն հավանականությամբ, Աննա Հակոբյանի ղեկավարած հիմնադրամում ցանկանում են «մեր լրահոսի թոփ թեմային հավակնող «մատերիալն»» առաջինը հրապարակել  ու տարածել յուրային համարվող ԶԼՄ-ներում։ Հիշեցնենք, որ Հակոբյանն այդ գրառումն արել էր ֆեյսբուքյան իր էջում։ 

Ինչ վերաբերում է հարցման 3-րդ և 4-րդ կետերին,ապա այս դեպքում էլ որևէ տվյալ  չեն նշել, կցել են Աննա Հակոբյանի մամուլի ասուլիսի տեսանյութի  ու ռեպորտաժի հղումը ու խնդրել ծանոթանալ դրան։  Ի դեպ, հրապարակված նյութին ծանոթ էինք մինչև հղումն ուղարկելը, ասուլիսն էլ լուսաբանել ենք։

Իրականացվող  նախագծերի մասին էլ տեղեկատվությունը գաղտնի է պահվում։ Հիմնադրամից այդ հարցի վերաբերյալ էլ ասացին. «Նոր կայքում ավելի մանրամասն տեղեկություններ կլինեն նաև իրականացվող նախագծերի վերաբերյալ»։

Հիշեցնենք, որ «Հիմնադրամների մասին» ՀՀ օրենքի 39 հոդվածը սահմանում է.

«Յուրաքանչյուր տարի հաշվետու տարվան հաջորդող մարտի 25-ից ոչ ուշ հիմնադրամն http://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում պարտավոր է հրապարակել՝
1) հաշվետվություն իր գործունեության մասին: Հաշվետվությունը պետք է պարունակի տեղեկություններ իրականացված ծրագրերի, ֆինանսավորման աղբյուրների, ֆինանսական տարում օգտագործված միջոցների ընդհանուր չափի և դրանցում կանոնադրական նպատակների իրականացմանն ուղղված ծախսերի չափի, հիմնադրի, հոգաբարձուների խորհրդի անդամների, կառավարչի և հիմնադրամի աշխատակազմում ընդգրկված անձանց անուններն ու ազգանունները, եթե նրանք օգտվել են հիմնադրամի միջոցներից և ծառայություններից հաշվետու տարվա ընթացքում»։