Մյունխենգլադբախի «Բորուսիայի» սանը` «Ալաշկերտի» ֆուտբոլիստ

Սպորտ 18:47 05/03/2019 Հայաստան

«Ալաշկերտը» վերջին ձեռքբերումն է կատարել ձմեռային տրանսֆերային պատուհանի ընթացքում: Ակումբի ղեկավարությունը պայմանագիր է ստորագրել Ֆրանսիան ներկայացնող կոտդիվուարցի կիսապաշտպան Ջոել Դամահուի հետ: Փորձառու ֆուտբոլիստը Մյունխենգլադբախի «Բորուսիայի» սան է, երկու մրցաշրջան է անցկացրել գերմանական ակումբի երկրորդ թիմում:

Այնուհետև Դամահուն խաղացել է Իսրայելի «Բնեի Սահնին» և «Մաքաբի» (Հայֆա) թիմերում, հունգարական «Դեբրեցենում», ֆրանսիական «Տուրում», Կիպրոսը ներկայացնող «Պաֆոսում» և «Նեա Սալամինայում», հունական «Տրիկալայում», Քուվեյթի «Ալ Արաբիում»: «Նեա Սալամինայում» Ջոելը հանդիսացել է «Ալաշկերտի» և Հայաստանի հավաքականի պաշտպան Տարոն Ոսկանյանի թիմակիցը:

«Ալաշկերտի» նորեկի նախորդ ակումբը Իսրայելի «Հապոել Ակրեն» էր, որի կազմում նա 17 հանդիպման է մասնակցել ընթացիկ մրցաշրջանում: Ջոել Դամահուն արդեն միացել է «Ալաշկերտին» և իր առաջին մարզումն է անցկացրել թիմի կազմում, որից հետո կիսվել է իր տպավորություններով և պատմել է նպատակների մասին.

«Շատ ուրախ եմ, որ միացել եմ «Ալաշկերտին»: Վերջին շրջանում հանդես էի գալիս Իսրայելում, սակայն ցանկություն ունեի ուժերս փորձել ավելի պատվախնդիր և բարձր նպատակներ հետապնդող թիմում: Արդեն ծանոթացել եմ ակումբի ղեկավարության, մարզչական շտաբի, թիմակիցների և անձնակազմի հետ: Ինձ շատ ջերմ են ընդունել այստեղ, հիանալի տպավորություններ ունեմ:

Բացի այդ, այստեղ է հանդես գալիս նաև իմ նախկին ակումբակից Տարոն Ոսկանյանը: «Ալաշկերտում» իմ նպատակներն ավելի քան պարզ են. չեմպիոնություն և հաջող ելույթներ եվրագավաթներում: Երկրպագուներին հրավիրում եմ մարզադաշտ` միասին նոր հաղթանակներ կերտելու»,- նշել է Դամահուն:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: