Ձեր վստահելի աղբյուրը

Երևանի ընդհանուր իրավասության դատարանի Շենգավիթի նստավայրում շարունակվում է «Սասնա ծռեր» խմբի 10 անդամների գործով հերթական դատական նիստը։ Նախորդ նիստի ընթացքում դատարանի նիստերի դահլիճում տեղի ունեցած միջադեպից հետո  նախագահող դատավոր Մեսրոպ Մակյանի որոշմամբ այսուհետ դատական նիստերը փակ են լինելու,  բացառությամբ լրատվամիջոցների ներկայացուցիչների համար։

Դատավորն այսօրվա նիստի սկզբում հայտարարեց, որ նախորդ նիստին տեղի ունեցած միջադեպից հետո, այդ դեպքում ոչ թե նիստերի դահլիճում, արդեն հենց այն հատվածում, որտեղ գտնվում էին ամբաստանյալները, տուժողները,  դատարանը որոշել է դատական սանկցիա կիրաrել տուժող,  Շենգավիթի նախկին ոստիկանապետ Արամ Հովհաննիսյանի, ամբաստանյալներ Գագիկ Եղիազարյանի և Արեգ Կյուրեղյանի նկատմամբ՝ նկատողության ձևով, ովքեր խախտել էին դատարանում սահմանված կարգը և չէին ենթարկվել նախագահող դատավորի իրավաչափ կարգադրություններին  դատական նիստի կարգը պահպանելու վերաբերյալ։

Դատական նիստին զուգահեռ դատարանի բակում բողոքի ակցիա են իրականացնում «Սասնա ծռերի» աջակիցները՝ «Ազատություն ապստամբներին», «Ոչ սաբոտաժին» գրառմամբ պաստառներով։

Հիշեցնենք, որ ՊՊԾ գնդի գրավման գործով «Սասնա Ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը, որոնք մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝  պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։