Ձեր վստահելի աղբյուրը

«Վարչապետ Նիկոլ Փաշինյանի՝ Բրյուսել կատարած այցը պարտադիր էր, լավ է, որ եղել է։ Եթե վերցնենք կոնկրետ Հայաստան-Եվրամիություն օրակարգը, կա ոգևորություն, բայց  պետք է հասկանանք, որ մեծ տնային աշխատանք ունենք անելու»,- լրագրողների հետ հանդիպմանն ասաց Հայաստանի նախագահի խորհրդական, Մարդկային զարգացման միջազգային կենտրոնի ղեկավար Թևան Պողոսյանը։

Նա հարցադրում արեց՝ արդյո՞ք ԵՄ-ում ընտրություններից հետո իրավիճակ է փոխվելու, թե ոչ. «Ասում ենք, որ ամեն ինչ լավ է: Եկեք հիշենք, որ 2013 թվականի սեպտեմբերի 5-ին Հայաստանն ասաց՝ պատրաստ եմ քաղաքական բաղադրիչը ստորագրել հենց այսօր, բայց ԵՄ-ն ասաց՝ ոչ, «կամ, կամ»: Սակայն մեկուկես տարի անց ընտրություններ տեղի ունեցան ԵՄ-ում, և ԵՄ-ն ասեց՝ լավ, ոնց որ թե «և, և»-ն էլ է աշխատում, և մենք ունեցանք CEPA-ն (ՀՀ-ԵՄ համապարփակ և ընդլայնված գործընկերության համաձայնագիր)»:

Թ. Պողոսյանի խոսքով, Հայաստանի իշխանությունները պետք է ուշադիր հետևեն, թե ինչ են լինելու ընտրություններում, ինչ արդյունք է գրանցվելու:

«Կարող է այնպիսի արդյունք  գրանցվի, որ որևէ բան չփոխվի, կամ հակառակը՝ շատ գործեր ավելի արագ տեմպերով գնան: Բայց կարող է և ունենանք փոփոխություններ, որոնց պետք է պատրաստ լինենք և հասկանանք՝ հետո ինչպես ենք աշխատելու, որ այս պայմանավորվածություններն առնվազն իրագործվեն մեզ ցանկալի տեմպերի մեջ: Այստեղ մենք ունենք մեծ տնային աշխատանք»,- ասաց Թևան Պողոսյանը:

Խոսելով վիզների ազատականացման մասին՝ նա նշեց, որ քաղաքական հայտարարությունների համար գեղեցիկ ժամանակահատված է, բայց պետք է իրականությունը դիտարկել  ու չոգևորվել։ Թ. Պողոսյանն ասաց, որ վիզաների ազատականացման պրոցեդուրան մի քանի փուլով է։ Առաջին փուլը քաղաքական որոշումն է, երբ Եվրամիության բոլոր երկրները կամ  Եվրոպական խորհուրդը ընդունում է  քաղաքական որոշում և հանձնարարում է Եվրոպական հանձնաժողովին  սկսել  տեխնիկական բանակցությունները։ 

«Հայաստանը մի քանի բան արդեն  իրականացրել է, եղել է իսկապես ձգձգվածություն եվրոպական կողմից։ Դադաղ է գնացել, հասկանալի է՝ ինչու. մարդիկ նայել են Հայաստանում փոխոխություն է եղել, սպասումներ են ունեցել, կան օբյեկտիվ, սուբյեկտիվ գնահատականներ։ Պետք է հանգիստ նայենք այդ գործընթացին և հակառակը՝ պետք է ինչ -որ չափով նպաստենք»,- ասաց Թ. Պողոսյանը։

Տեխնիկական բանակցություններից փուլին հաջորդում են արդեն բանակցություններն իսկական  որոշման հիման վրա, որը,  նրա խոսքով,   առնվազն 4 տարվա տեխնիկական փաթեթ է։ Դրանից հետո կրկին գալու է քաղաքական որոշման փուլը։

«Այսօրվա դրությամբ հասկանալի է, որ CEPA-ի ամբողջական վավերացումն այլևս չի լինելու մինչև մայիս, այս երկու ամսում իրատեսական չէ, բայց դրա հետ միասին պետք է հասկանանք, որ մեծ բաժին աշխատանք կա անելու  ներսում»,- ընդգծեց բանախոսը։