ԵՄ-ն պատրաստ է աջակցել Հայաստանին, բայց պատրաստ չէ ծրագրերը ֆինանսավորել 100 տոկոսով. վարչապետ
Եվրամիությունը լիարժեք պատրաստ է աջակցել Հայաստանին բարեփոխումների օրակարգում: Այս մասին այսօր կառավարության նիստում հայտարարեց վարչապետ Նիկոլ Փաշինյանն՝ անդրադառնալով Բրյուսել կատարած այցի արդյունքներին:
«Կարող ենք արձանագրել, որ Եվրամիության հետ Համապարփակ և ընդլայնված համաձայնագրի իրականացման փուլ ենք թևակոխում։ Այս առումով, Բրյուսելում տեղի է ունեցել արձանագրում, որ ԵՄ-ն լիարժեք պատրաստ է մեզ աջակցել բարեփոխումների և ընդհանրապես Հայաստանում զարգացման ծրագրեր իրականացնելու օրակարգում»,- ընդգծեց վարչապետը։
Նիկոլ Փաշինյանը նշեց, որ կարևոր է արձանագրել՝ այս համագործակցության մեջ և ԵՄ-ի, և Հայաստանի կողմից չկա աշխարհաքաղաքական որևէ օրակարգ, ինչը կարևոր է տվյալ հանգամանքում։
«Բայց այստեղ կա մի նրբություն, որ պետք է առաջիկայում կարևոր որոշումներ կայացնենք։ Այդ թեմային երեկ նաև անդրադարձել եմ Ազգային ժողովում։ Խնդիրը հետևյալում է.այսօր ԵՄ-ի հետ մի քանի մեծ մեգանախագծեր ենք քննարկել, որոնց առաջին խումբը վերաբերում է ճանապարհներին և ենթակառուցվածքներին, և մեր նպատակադրումն է Հայաստանում ավտոճանապարհները բերվեն եվրոպական ստանդարտների, ինչպես նաև Հյուսիս-Հարավ ծրագրի վերաբերյալ պետք է կարևոր որոշումներ կայացնենք»,- նշեց վարչապետը։
Հաջորդ մեծ նախագիծն, ըստ նրա, վերաբերում է Հայաստանում ջրամբարաշինության մեծ ծրագրի իրականացմանը, ինչպես նաև ջրերի կառավարման նոր համակարգի ներդրմանը։ Նիկոլ Փաշինյանի խոսքով՝ այս համատեքստում չափազանց կարևոր է Սևանա լճի շուրջ և Հրազդան գետի երկայնքով ջրերի մաքրման կայաններ կամ ջրերի մաքրման համակարգ ստեղծելը։
Հաջորդը խնդիրը դպրոցաշինություն իրականացնելն է, հատկապես սեյսմիկ պաշտպանության առումով. «Այդ ծրագիրն արդեն իրականացնում ենք, բայց կարիք ունենք լրջորեն ընդլայնել դրա շրջանակը, որպեսզի նախ՝ այդ դպրոցները սեյսմիկ բոլոր պահանջներին համապատասխանեն և համապատասխանեն նաև կրթական, բովանդակային, ժամանակակից պահանջներին և չափանիշներին՝ ոչ միայն շենքային, այլև գույքային առումով»,- ընդգծեց վարչապետը։
Նա նշեց, որ նաև խնդիր ունենք՝ արդարադատության ոլորտում լուրջ ծրագրեր իրականացնելու. «Եվրամիության գործընկերների հետ խոսելիս ես ասեցի, որ այն բանտային պայմանները, որոնցում պահվում են Հայաստանում կալանավորված ու դատապարտված անձինք, չեն կարող հարիր համարվել նոր Հայաստանի չափանիշներին: Մենք դատական համակարգում էլ խնդիրներ ունենք. ինձ համար զարմանալի էր, որ ունենք դեպքեր, երբ դատական նիստերը, այսպես ասած, միջանցքային պայմաններում են իրականացվում, ու դա արդեն ձևով խաթարում է արդարադատության բովանդակությունը»։
Նիկոլ Փաշինյանի խոսքով՝ այս բոլոր ծրագրերի իրականացման գործում ստացել են Եվրամիության գործընկերների աջակցության պատրաստակամությունը: Սակայն, ըստ նրա, այստեղ կա մի խնդիր, որ Եվրամիությունը, բնականաբար, պատրաստ լինելով աջակցել, պատրաստ չէ այդ ծրագրերի ֆինանսավորումն իրականացնել 100 տոկոսով և ակնկալում է, որ այդ ծրագրերում լուրջ մասնակցություն ունենա նաև Հայաստանի Հանրապետությունը:
«Այս առումով մեր առաջնային խնդիրն է պետական եկամուտների ավելացումը՝ վարչարարության միջոցով և տնտեսական զարգացումների միջոցով: Բայց այս համատեքստում կարևորվում է նաև արտաքին միջոցների ներգրավումը, և կառավարության ծրագրում մենք գրել ենք, որ արտաքին միջոցների ներգրավման առաջնային թիրախ ենք համարում ենթակառուցվածքները: Այստեղ մենք պետք է քաղաքական որոշում կայացնենք, թե ինչպես ենք վերաբերվում այս հարցին, որովհետև մենք նաև որոշակի օրենսդրական սահմանափակումներ ունենք ՀՆԱ-պետական պարտք հարաբերակցության վերաբերյալ»,- ընդգծեց վարչապետը։
Նիկոլ Փաշինյանը խոստովանեց, որ իր պատգամավորական ողջ գործունեության ընթացքում առանց բացառության բոլոր վարկային համաձայնագրերին դեմ է քվեարկել, և դա ունեցել է շատ կոնկրետ քաղաքական հիմնավորում. «Ես ասել եմ, որ եթե կառավարությանը համարում եմ կոռումպացված, չեմ կարող այդ կառավարությանը վստահել որևէ միջոցի, առավել ևս վարկային միջոցի ծախսումը, և ցավոք, այս ընթացքում մեր ուսումնասիրություններն այդ քաղաքական դիրքորոշման արդարացվածությունը հիմնավորում են առնվազն մի քանի խոշոր ծրագրերի առումով»։
Վարչապետի խոսքով՝ այսօր պետք է պատասխանեն երկու հարցի՝ արդյոք կարողանո՞ւմ են ստեղծել համակարգային երաշխիքներ, որ ընդհանրապես պետական միջոցները և վարկային միջոցներն առավել ևս ծախսվեն նպատակային և եթե կարողանում ենք, արդյոք ո՞րն է այն պայմանը և սահմանագիծը, չափաբաժինը, որտեղ կարող են պետական պարտքի մակարդակը պահել կառավարելի, առանց հավելյալ վտանգների, այսինքն՝ դա իրականում Հայաստանին բերի օգուտներ և երբեք որևէ վնաս:
«Մենք արդեն ունենք նախնական պայմանավորվածություն, որ մեկ ամսվա ընթացքում այս թեմայով Կենտրոնական բանկի հետ համատեղ քննարկում ենք ունենալու: Այդ քննարկման արդյունքում որևէ եզրակացության կգանք և այդ եզրակացության վերաբերյալ, իհարկե, քննարկումներ կունենանք, նաև հանրային քննարկումներ, կունենանք նաև քննարկումներ Ազգային ժողովում և այս հարցի վերաբերյալ նաև պետք է կարողանանք գալ ընդհանուր եզրակացության: Ընդհանուր ասելով նկատի ունեմ կառավարություն, Ազգային ժողով և, իհարկե, հանրություն: Ես ձեր ուշադրությունը հրավիրեցի այս խնդրի վրա՝ որպես առաջիկա ամսվա ընթացքում և գուցե դրանից հետո էլ մեր մտորումների և համատեղ քննարկումների կարևոր նյութ»,- եզրափակելով խոսքն՝ ասաց Նիկոլ Փաշինյանը։
Լրահոս
Տեսանյութեր
Թշնամnւ հրահանգները մեր կյանք տեղափոխողները Հայաստանի թշնամիներն են. Բագրատ Սրբազան
