Ձեր վստահելի աղբյուրը

Գործադիրն այսօրվա նիստում հաստատեց Կառավարության կառուցվածքի մասին օրինագծերում փոփոխություններ կատարելու նախագիծը։

Կառավարությունը կազմված է լինելու վարչապետից, երկու փոխվարչապետներից և նախարարներից: Ըստ նախագծի՝ առաջին փոխվարչապետի պաշտոնը կկրճատվի։

Այսպիսով, նախատեսվում է նաև 17 նախարարությունը կրճատել և դարձնել 12:
Կառավարության  կառուցվածքում ընդգրկվում են հետևյալ նախարարությունները.

1) աշխատանքի և սոցիալական հարցերի նախարարությունը,
2) առողջապահության նախարարությունը,
3) արդարադատության նախարարությունը,
4) արտակարգ իրավիճակների նախարարությունը,
5) արտաքին գործերի նախարարությունը,
6) կրթության, գիտության, մշակույթի և սպորտի նախարարությունը,
7) շրջակա միջավայրի նախարարությունը,
8) պաշտպանության նախարարությունը,
9) տարածքային կառավարման և ենթակառուցվածքների նախարարությունը,
10) բարձր տեխնոլոգիաների արդյունաբերության նախարարությունը,
11) էկոնոմիկայի նախարարությունը,
12) ֆինանսների նախարարությունը:

Նախագծի համաձայն՝ Ափյուռքի նախարարությունը վերակազմակերպվելու և միանալու է վարչապետի աշխատակազմին՝ ստեղծելով Սփյուռքի գործերի գլխավոր հանձնակատարի գրասենյակ:

Հարցը զեկուցող ՀՀ արդարադատության նախարար Արտակ Զեյնալյանը նշեց, որ Գյուղատնտեսության նախարարությունն ու Տնտեսական զարգացման և ներդրումների նախարարությունը կմիաձուլվեն՝ ստեղծելով Էկոնոմիկայի նախարարության։
Էներգետիկ ենթակառուցվածքների և բնական պաշարների նախարարությունն ու Տարածքային կառավարման և զարգացման նախարարությունը կմիաձուլվեն՝ ստեղծելով Տարածքային կառավարման և ենթակառուցվածքների նախարարություն: Վերջինիս կփոխանցվեն նաև Տրանսպորտի, կապի և տեղեկատվական տեխնոլոգիաների նախարարության՝ տրանսպորտի ոլորտին վերաբերող բոլոր լիազորությունները և գործառույթները:

Օրենքների նախագծերի փաթեթի ընդունումից հետո նախատեսվում է Կառավարության որոշմամբ այս նախարարության ենթակայությանը հանձնել ոչ միայն միավորման արդյունքում համատեղ ենթակայությանը փոխանցված Ջրային կոմիտեն և Քաղաքացիական ավիացիայի կոմիտեն, այլև Պետական գույքի կառավարման կոմիտեն: Նախատեսվում է, որ Ջրային կոմիտեի և Պետական գույքի կառավարման կոմիտեի կազմում պետք է  ներառված լինեն միայն մասնագիտական կառուցվածքային ստորաբաժանումներ:

Տրանսպորտի, կապի և տեղեկատվական տեխնոլոգիաների նախարարությունն էլ կվերանվանվի Բարձր տեխնոլոգիաների արդյունաբերության նախարարության՝ կրճատելով նախարարության՝ տրանսպորտի (այդ թվում՝ ճանապարհների) ոլորտի բոլոր լիազորությունները և գործառույթները:

Նախատեսվում է նախարարության լիազորությունների ցանկում ավելացնել նաև թվայնացման գործընթացների և ռազմարդյունաբերության հետ կապված լիազորություններ, քանի որ օրենքի ընունումից հետո Կառավարության որոշմամբ ռազմարդյունաբերական կոմիտեի ենակայությունը հանձնվելու է Բարձր տեխնոլոգիաների արդյունաբերության նախարարությանը:

Նախատեսվող փոփոխությունների համաձայն՝ վարչապետի որոշմամբ կառավարության նիստերը կլինեն ոչ միայն մի մասը, այլ ամբողջությամբ՝ դռնբաց։

Արտակ Զեյլնալյանը նաև նշեց, որ նախարարությունների վերակազմակերպման փուլում կրճատվող աշխատատեղերը հիմնականում վերաբերում են քաղաքական և հայեցողական պաշտոններին՝ նախարարներին, նրանց տեղեկալներին, օգնականներին, խորհրդականներին, մամուլի քարտուղարներին, նախարարների տեղակալների օգնականներին, ինչպես նաև քաղաքացիական ծառայության ղեկավար պաշտոններից գլխավոր քարտուղարներին և նրանց տեղակալներին:

Նախարարությունների վերակազմակերպման գործընթացի սկզբնական արդյունքում թվաքանակի այլ փոփոխություն չի նախատեսվում և միաձուլվող նախարարություններն իրենց բոլոր հաստիքներով տեղափոխվելու են նոր ստեղծվող նախարարության կազմ, բացառությամբ վերը թվարկված պաշտոնների, ինչպես նաև՝ կրկնվող (աջակցող) ստորաբաժանումների ղեկավար հաստիքների, որոնց պարագայում ակնկալվում է նախատեսել այլ՝ ավելի ցածր մակարդակի հաստիք, քանի որ երկու կամ երեք ստորաբաժանման ղեկավար հնարավոր չէ նախատեսել:

Արձագանքելով նախագծին` վարչապետ Նիկոլ Փաշինյանն ասաց, որ սա մի նախագիծ է, որը շատ վաղուց քննարկվում է և կարող են արձանագրել՝ հիմնականում նախագիծը ընկալված է հանրության շրջանում:

«Մեր հիմնական խնդիրը պետական կառավարման արդյունավետությունը բարձրացնելը, այդ թվում՝ Սփյուռքի հետ հարաբերութունների արդյունավետությունը բարձրացնելը, քանի որ այսօր արդեն լուրջ խոցեր ենք տեսնում երկու ուղղությամբ: Բայց այս ուղղությամբ գնալու ենք հավասարակշռված, հանդարտ ճանապարհով։ Ուզում եմ ասել, որ մենք կադրային ջարդ չենք իրականացնելու, կոնսոլիդացվելու են նախարարության հաստիքները, ինչը չի նշանակում, որ այդպես շարունակելու է մնալ։ Այո, կրճատումներ լինելու են, բայց դրանք էվոլյուցիոն տրամաբանությամբ են լինելու և յուրաքանչյուր պետականծառայող  իր շանսն է ստանալու», - ընդգծեց վարչապետը՝ հավելելով, որ մաքսիմալ օբյեկտիվ պետք է տեղի ունենա մարդկանց աշխատանքի գնահատումը՝ առանց հարակից պրոցեսների։

Նիկոլ Փաշինյանն ասաց, որ պետք է լինեն մաքսիմալ շրջահայաց՝ պետական կառավարման արդյունավետության բարձրացման նպատակին հասնելու համար: Ուստի, ըստ նրա, սա միջանկյալ լուծում է, կրճատումների խնդիրը չեն կարող լուծել փակ աչքերով:
«Հետևաբար, յուրաքանչյուր աշխատակցի առաջ դրվում է կոնկրետ խնդիր՝ վերանայել ընդհանրապես սեփական աշխատանքի որակը, վարչության բաժնի աշխատանքի որակը։ Մենք առաջիկայում նաև ոչ պոպուլյար խնդիր պետք է լուծենք, որ պետական կառավարման համակարգում աշխատեն բարձր որակավորված կադրեր: Այսօր ունենք մի իրավիճակ, որ պետական կառավարման համակարգը մեծ հաշվով գրավիչ չէ բարձր որակավորում ունեցողների համար և այսպես կոչված պարգևավճարների սկանդալները ծագում են հենց այստեղից, որևէ այլ տեղ պրոբլեմ չկա», - նշեց Նիկոլ Փաշինյանը։

Նրա խոսքով՝ այսօր պետական համակարգից տեղի է ունենում արտահոսք, սա պետք է շատ հստակ արձանագրել, որովհետև նախկինում եղել են այլընտրանքային վճարումների տարբերակներ, բայց, բնականաբար, այսօր չեն կարող գնալ այդ ճանապարհով։
Ըստ Փաշինյանի՝ այն, ինչ եկամուտ դե ֆակտո ստանում է պետական ծառայողը, պետք է դե յուրե արձանագրված լինի:

«Հետևաբար, քանի որ հեղափոխությունից հետո այդ այլընտրանքային վճարման մեխանիզմները դադարել են գործել՝ խնդիր է առաջացել այդ աշխատող մարդկանց դրան համարժեք վճարումներ իրականացնել: Հետևաբար, այստեղից են ծագում, այսպես կոչված, պարգևավճարային սկանդալները, և լավ է, որ ծագել են, քանի որ դա շատ կարևոր առիթ է շատ կարևոր խոսակցություն ունենալու համար: Ո՞վքեր են մեր պետական կառավարման համակարգի աշխատողները, մենք ի՞նչ պահանջներ ենք դնում նրանց առաջ, արդյոք պետական ծառայությունը պե՞տք է նշանակի երկրորդ, երրորդ, չորրորդ կարգի աշխատանք, թե դա պետք է նշանակի առաջին կամ երկրորդ կարգի աշխատանք: Ես կոչ եմ անում բոլորիս, հանրությանը, մեր բոլոր հայրենակիցներին, որպեսզի այս թեմաները... առավելագույնս բաց, առավելագույնս թափանցիկ մենք քննարկենք, բայց պետք է համբերատար քննարկենք»,- նշեց Նիկոլ Փաշինյանը։

Նիստի ժամանակ Տնտեսական զարգացման և ներդրումների նախարար Տիգրան Խաչատրյանն առաջարկեց Բարձր տեխնոլոգիաների արդյունաբերության նախարարության անվանումից հանել «արդյունաբերություն» բառն ու դրա փոխարեն կիրառել «զարգացում» բառը։ Սակայն Տրանսպորտի, կապի և ՏՏ նախարար Հակոբ Արշակյանը, որը պետք է ղեկավարի Բարձր տեխնոլոգիաների արդյունաբերության նախարարությունը, առարկեց:

«Բայց հարգելի գործընկերներ, էս 3 ամիս է, եթե ոչ 4-5, քննարկում ենք։ Հիմա եկել ենք կառավարության նիստին՝ պարզվում է՝ դեռ էլի պետք է քննարկենք։ Ինչո՞ւ չեք քննարկել մինչև հիմա»,- ասաց Նիկոլ Փաշինյանը։

Որոշվեց ընդունել ներկա տարբերակը, սակայն քննարկումները կշարունակվեն: