Ձեր վստահելի աղբյուրը

ԱԺ տնտեսական հարցերի մշտական հանձնաժողովի նախագահ Բաբկեն Թունյանը տեղին է համարում  գազավորված բոլոր ըմպելիքներ արտադրող ընկերությունների մտահոգությունները։  Նա վիճահարուց է համարում նաև ակցիզային հարկի վերաբերյալ առողջապահական հիմնավորումը։

«Ստացվում է, որ եթե մենք շաքարի փոխարեն շեշտը դնում ենք ըմպելիքի գազավորված լինելու վրա, ապա հնարավոր  է շաքար պարունակող ավելի վնասակար խմիչքը դուրս մնա ակցիզային հարկից։ Առողջապահական առումով դա հիմնավորում չունի, իսկ փոքր և միջին բիզնեսի առումով, համաձայն եմ, որ այն բացասաբար  է ազդելու»,-ԱԺ-ում լրագրողների հետ զրույցում ասաց Թունյանը։

Հիշեցնենք,  որ Հարկային օրենսգրքում նախատեսված փոփոխության հետևանքով, ըստ այդ ընկերությունների, առաջանելու են ֆինանսական լուրջ խնդիրներ, իսկ որոշ արտադրողներ էլ կարող են անգամ դադարեցնել գործունեությունը: Ակցիզային հարկը սահմանվում է 30 դրամ մեկ լիտրի համար։

«Իմ քայլը» խմբակցության պատգամավորը կարծում է, որ փոփոխության հետևանքով առավել շատ տուժելու են ցածր գնային սեգմենտում աշխատողները։

«Օրինակ, 100 դրամանոց լիմոնադի համար 30 դրամը նշանակում է 30 տոկոս,  200 դրամանոցի դեպքում՝ 15 տոկոս։  Տոկոսային հարաբերակցությունը երբ համամետում ենք, ապա շուկայում խոշորները կարող են կլանել փոքրերին»,-հնարավոր հետևանքներից մեկը թվարկեց Թունյանը։

Նա նշեց, հարցի վերաբերյալ քննարկումներ եղել են, տնտեսվարողներն էլ հանդիպել են գործադիրի ներկայացուցիչների հետ, չի բացառվում, որ Ազգային Ժողով նախագիծը հասնի արդեն փոփոխված։