Զոհրաբ Մնացականյան. ԵԱՀԿ տարածաշրջանում չեն կարող լինել գորշ գոտիներ
Հայաստանում գտնվող Սլովակիայի ԱԳ նախարար, ԵԱՀԿ գործող նախագահ Միրոսլավ Լայչակը ՀՀ ԱԳ նախարար Զոհրաբ Մնացականյանի հետ հանդիպումից հետո հանդես եկան համատեղ հայտարարություններով։
Զոհրաբ Մնացականյանը նշեց, որ վերջին երեք տարիներին սա ԵԱՀԿ գործող նախագահի առաջին այցն է տարածաշրջան, որը կարևոր ազդակ է այն պայմաններում, երբ կազմակերպությունում կունսենսուսի չարաշահման արդյունքում տարածաշրջանում փակվել են դաշտային առաքելությունները և նվազագույնի է հասցվել Հարավային Կովկասում ԵԱՀԿ ներկայացվածությունը։
ՀՀ ԱԳ նախարարը նշեց, որ հանձնառու են շարունակել միջազգային կառույցների հետ համագործակցությունը բարեփոխումների ու ձեռքբերումների ամրապնդման ուղղությամբ։ ՀՀ-ն պատրաստակամ է համագործակցել ԵԱՀԿ-ում Սլովակիայի հետ նախագահության օրակարգային հարցերի շուրջ։ ՀՀ-ն աջակցում է Սլովակիայի առաջնահերթություններին, հակամարտությունների հասցեագրման, անվտանգ ապագայի կառուցման հարցում։
Մնացականյանը նշեց, որ կարևոր է այն, որ մարդը գտնվում է ԵԱՀԿ գործուներության կենտրոնում։ ԵԱՀԿ-ն իսկապես մարդկանց մասին է, որոնք արժանի են խաղաղությաղ ու անվտանգ ապրելու հնարավորությանը։
«ԵԱՀԿ տարածաշրջանում չեն կարող լինել գորշ գոտիներ, որոնք հասանելի չեն մարդու իրավունքներով զբաղվող միջազգային կառույցներին»,-ասաց ՀՀ ԱԳ նախարարը։
Նշվեց, որ քննարկվել են ռազմաքաղաքական հարցեր, սպառազինությունների վերահսկման, սպառազինության մրցավազքից խուսափելու հարցերը։
Լեռնային Ղարաբաղի հակամարտության հետ կապված՝ ԱԳ նախարարը նշեց, որ հիմնահարցը պետք է կարգավորվի բացառապես խաղաղ եղանակով՝ հիմնված միջազգային իրավունքի հիմնարար սկզբունքների, մասնավորապես ժողովուրդների ինքնորոշման իրավունքի իրագործման վրա։
«ԼՂ հիմնահարցի կարգավորման շրջանակում Արցախի անվտանգության ապահովումն ու կարգավիճակը Հայաստանի համար եղել և մնում են բացարձակ գերակայություններ։ Կրկնեցի այն մոտեցումը, որ վերաբերում է ԼՂ որոշիչ ձայնին ու ներգրավվածության ապահովմանը։ ԼՂ հիմնախնդրի առանցքում ընկած է Արցախի ժողովրդի մարդու իրավունքների ու հիմնարար ազատությունների, սեփական հայրենիքում իր ճակատագիրը ազատ տնօրինելու իրավունքը։ Այն վերաբերում է Արցախի 150 հազար բնակչության ֆիզիկական անվտանգությանը՝ կյանքի անվտանգությանը»,- ասաց Մնացականյանը։
Մնացականյանը նշեց, որ այս օրերին Ադրբեջանի կողմից հարձակողական բնույթի լայնածավալ զորավարժությունների իրականացումը չի նպաստում տարածաշրջանային անվտանգության ու վստահության մթնոլորտի ամրապնդմանը։
Լրահոս
Տեսանյութեր
Աշխարհի առաջնությունից առաջ ինձ «подножка տվեց» Սիմոն Մարտիրոսյանը. Փաշիկ Ալավերդյան
