Ձեր վստահելի աղբյուրը

SarGallery Երևանյան պատկերասրահում արդեն մի քանի օր է  բացվել է «Նուրբ տեսանկյուն» խորագրով ցուցահանդեսը։  Կանանց տոներին նվիրված բարեգործական ցուցահանդեսում ներկայացված են տարբեր ժամանակաշրջաններում գործունեության ծավալած հայ նկարչուհիների աշխատանքներ։

Պատկերասրահի տնօրեն Արմինե Սահակյանը Panorama.am-ին ասաց, որ ցուցահանդեսում ներկայացված է քսանից ավելի նկարչուհիների աշխատանքներ՝ Քնարիկ Հովհաննիսյան, Արմինե Կալենց, Մարիամ Ասլամազյան,. Գայանե Խաչատուրյան, Ժենյա Հարությունյան, Պարուհի Թեփելիկյան,  Հայկանուշ Պարոնյան, Սահականուշ Մատինյան,  Գոհար Ֆերմանյան, Լավինիա Բաժբեուկ-Մելիքյան,  Զուլեյկա Բաժբեուկ-Մելիքյան,  Ելենա (Հեղինե) Աբրահամյան,.Քնարիկ Վարդանյան, Վարդիթեր Կարապետյան, -ամանակակիցներից՝  Զառա Մանուչարյան, Աննա Սողոմոնյան,  Մարո Սարգսյան, Նաիրա Ահարոնյան , Գոհար Հարությունյան,  Արմինե Թումանյան,  Արաքս Պողոսյան,  Հասմիկ Ավետիսյան, Լիանա Ասատրյան։

«Ներկայացված բոլոր աշխատանքները բնօրինակներն են։ Դրանց մի մասը մեր պատկերասրահի սեփականությունն են, մի մասը տրամադրվել են նկարիչների ընտանիքների կողմից»,- ասաց նա։

Ցուցահանդեսը կրում է բարեգործական բնույթ։ Հասույթից որոշակի մաս ուղղվելու է «Մենք ենք» բարեգործական հիմնադրամին։ Ա. Սահակյանն ասաց, որ հետաքրքրվողներ եղել են, այս պահին խորհրդակցում են։

Ցուցահանդեսը շարունակվելու է մինչև ապրիլի 7-ը։

SarGallery Երևանյան պատկերասրահը բացվել է մոտ 8 ամիս առաջ Մոսկվայում գործող SarGallery պատկերասրահի հովանու ներքո։

«Պատկերասրահը ստանձնել է «Ազգային արժեքների վերադարձ դեպի երկիր» ծրագրի կատարումը։ Մեզ մոտ ներկայացվելու են դրսի մեր նկարիչների աշխատանքները, հայ նկարիչների աշխատանքների ցուցահանդեսներն էլ կազմակերպելու ենք դրսում»,- ասաց  պատկերասրահի տնօրենը։