Ձեր վստահելի աղբյուրը

«Ասացինք այն, ինչ-որ պատրաստել էինք խոսելու՝ կապված հիմնավոր կասկածի հետ, անձեռնմխելիության հետ, անվտանգության հարցերի, առաջադրված մեղադրանքի, միջնորդության հետ, որը վերաբերում է կալանքի ժամկետը երկարացնելուն»,- լրագրողների հետ զրույցում այս մասին ասաց ՀՀ երկրորդ նախագահ Ռոբերտ Քոչարյանի փաստաբան Ռուբեն Սահակյանը։

Լրագրողի հարցին, թե անվտանգության հարցերի հետ կապված ի՞նչ են ասել դատարանում , նա պատասխանեց․ «Ասում են՝ Պաշտպանության բանակը իրավունք չունի խառնվելու ներքին հարցերին, անվտանգության հարցերը միայն սահմաններին պետք է լինի․ դա կատարյալ անգրագիտություն է, ովքեր այդպես են ասում։ Եթե ասում են, թող հղումներ կատարեն օրենքներին, մենք հղում ենք կատարում օրենքներին և ասում ենք, որ դա ներքին հարց է, մենք հղումներ ենք կատարում միջազգային փաստաթղթերին»։

Լրագրողի ճշտող հարցին, թե Սահմանադրությամբ չի՞ նշվում, որ բանակը չպետք է մասնակցի ներքին քաղաքական զարգացումներին, փաստաբանը արձագանքեց. «Իսկ ո՞վ ասաց, որ մասնակցել է քաղաքական զարգացումներին, քննչական մարմինն ասաց, Սասուն Խաչատրյանն ասաց, ես չեմ հավատում նրանց։  Նրանց ասածը ջուր է, ես ասում եմ՝ 0038 հրամանը իր մեջ որևէ հանցավոր բան չի պարունակում։ Դրա բացատրությունն ավելի լավ, քան տվել է Սեյրան Օհանյանը, ոչ ոք չի կարող տալ։ Ես հիմնվում եմ մասնագետների կարծիքների վրա։ Խնդրում եմ՝ կարդացեք Սեյրան Օհանյանին և ընդունեք որպես հիմք»։

Անդրադառնալով ՀՔԾ պետ Սասուն Խաչատրյանի հայտարարությանը, թե այդ օրերին զինվորներին վարձկաններ էին սարքել և որոշ օլիգարխներ վճարում էին, որպեսզի իրենց տները հսկեին, Սահակյանը պատասխանեց․ «Նման հայտարարություն կարող է անել մարդը, որը որ նենգափոխում է գործի փաստերը։ Մի հավատացեք, նա սուտասան է, ահավոր սուտասան մարդ է։ Ես քրեական գործն եմ կարդում»։

Փաստաբանի կարծիքով՝ Ռոբերտ Քոչարյանն այսօր ելույթով հանդես կգա. «Ելույթով կարծում եմ, որ հանդես կգա, առաջին իսկ օրվանից, առաջին իսկ նիստում, ես լավ հիշում եմ՝ նա մի չքնաղ ելույթ ունեցավ։ Կգա ժամանակը՝ ինչ-որ մեկը կտա ձեզ գործի նյութերի մի մասը։ Օրինակ, ինքը ճիշտ է եղել, երբ հրավիրել է խորհրդակցություն՝ հաղորդագրություն ստանալով Ազգային անվտանգության ղեկավարի կողմից, որ բանակին փորձում են ներգրավել քաղաքական գործընթացների մեջ, որ երկրապահը ոտքի է կանգնել, փորձում են միանալ ժողովրդին, մարդիկ զինված են, լսած կլինեք, որ խոսքը գնում է գեներալ Մանվելի, գեներալ Մելքոնյանի մասին։ Վերջերս նրա մի ելույթը լսեցի, որտեղ ասում է՝ հատուկ գնդի ութսուն տոկոսը միացել էր ցուցարարներին, ի՞նչ է նշանակում, զինվորականները միացե՞լ էին ցուցարաներին, ի՞նչ իրավունքով, որ նրանք դուրս են քաղաքական գործընթացներից։ Այս առումով է, որ Ռոբերտ Քոչարյանն ասում է՝ ես ժողով եմ արել և ասել եմ՝ բանակը մի ներքաշեք։ Եթե արտակարգ դրություն չմտցներ, շատ եմ ցավում, որ մենք ունեցել ենք 10 զոհ, եթե ավելին լինեին, կասեին՝ Ռոբերտ Քոչարյանը անգործության մատնվեց, ինչքան զոհ ունեցանք»։