Ձեր վստահելի աղբյուրը

Երևան քաղաքի ընդհանուր իրավասության դատարանն ավարտել է ՀՀ երկրորդ նախագահ Ռոբերտ Քոչարյանի կալանքը ևս 2 ամսով երկարացնելու միջնորդության քննությունը:

Դատական նիստից հետո լրագրողների հետ զրույցում Ռոբերտ Քոչարյանի պաշտպանական թիմի անդամ Հայկ Ալումյանը հայտնեց, որ դատարանի որոշումը կհրապարակվի մարտի 15-ին՝ ժամը 15։00-ին:

Նա նաև նշեց, որ այսօրվա նիստին Ռոբերտ Քոչարյանը բավականին երկար՝ մոտ 40 րոպե,  բացատրություն է տվել:

«Մանրամասն ներկայացրեց, թե ինչ է տեղի ունեցել փետրվարի 19-ից  սկսած մինչև մարտի 2-ը»,- նշեց Հայկ Ալումյանը:

Հարցին, թե առաջադրված նոր մեղադրանքին՝ առանձնապես խոշոր չափի կաշառք ստանալու վերաբերյալ, Ռոբերտ Քոչարյանն անդրադարձել է, պաշտպանը դրական պատասխան տվեց:

«Բացարձակ անհիմն մեղադրանք է, մենք այդ նյութերն էլ վերլուծեցինք, որի հիման վրա նախաքննական մարմինը փորձում է ցույց տալ, թե կա հիմնավոր կասկած, կա ողջամիտ կասկած, որ այդպիսի դեպք է տեղի ունեցել, մանրամասն վերլուծվեց դա: Թե դատարանը մեր և մյուս կողմի փաստարկների վրա ինչ հետևություն կանի, դա վաղը կտեսնենք»,- նշեց նա:

Դիտարկմանը, թե նա կոնկրետ ինչ է ասել կաշառքի վերաբերյալ, Հայկ Ալումյանը պատասխանեց. «Ասաց, որ դա բացարձակապես իրականությանը չի համապատասխանում, այդպիսի բան լինել չէր կարող»: