Ձեր վստահելի աղբյուրը

Ռուսաստանը փակել է իր օդային տարածքը Boeing 737 Max ինքնաթիռների թռիչքների համար: Այս մասին  հայտնել է «Ռոսավիացիա»-ի ղեկավար Ալեքսանդր Ներադկոն, գրում է ՌԻԱ Նովոստին:

«Ռոսավիացիան  NOTAM-ին ծանուցում է ուղարկել այն մասին, որ Ռուսաստանի Դաշնության օդային տարածությունում այդ մոդելի ինքնաթիռների թռիչքներն արգելված են մինչև հատուկ ծանուցում: Ոչ երեկ, ոչ դրա նախորդ օրը այդ օդանավերը Ռուսաստանի տարածքով թռիչքներ չեն իրականացրել: Մենք իրավիճակի մոնիտորինգ ենք իրականացնում: Այնպես որ, քաղաքացիները  կարող են  հանգիստ լինել», - հայտարարել է Ալեքսանդր Ներադկոն:

Վարչության պետը նաև հավելել է, որ արգելքի վերացման մասին որոշումը կկատարվի ԱՄՆ կառավարության և «Boeing» ընկերության կողմից ներկայացվող ուղեցույցների և հաղորդագրությունների վերլուծության արդյունքում:

Հիշեցնենք, որ ՀՀ քաղաքացիական ավիացիայի կոմիտեն ևս որոշում է կայացրել արգելել Boeing B-737-MAX 8 և Boeing B-737-MAX 9 տեսակի օդանավերի շահագործումը ՀՀ օդային տարածքում:

Նշենք, որ մարտի 10-ին Եթովպիայում տեղի ունեցած ավիավթարից հետո մի շարք պետություններ և ավիաընկերություններ կասեցրել են Boeing 737 Max-ի թռիչքները: Ինքնաթիռը կործանվել է մարտի 10-ի առավոտյան, Ադիս-Աբեբայի օդանավակայանից օդ բարձրանալուց 6 րոպե անց։ Ինքնաթիռը թռչում էր Քենիայի մայրաքաղաք Նայորբի։  Զոհվել են 149 ուղևորն ու անձնակազմի 8 անդամը։ Զոհերը 35 երկրի քաղաքացի են։