Ձեր վստահելի աղբյուրը

Կառավարության շենքի դիմաց այս պահին բողոքի ակցիա են իրականացնում գրավատների ու արտարժույթի փոխանակման կետերի աշխատակիցները: Նրանց բողոքն ուղղված է  «Պետական տուրքի մասին» ՀՀ օրենքում փոփոխություններ և լրացումներ կատարելու մասին» օրենքի նախագծի դեմ։

Նշենք, որ փոփոխությունների համաձայն, 60 անգամ, մոտ 6000 %-ով նախատեսվում է ավելացնել նշյալ ոլորտների պետական տուրքը, ըստ որի՝ գրավատների համար ներկայիս 100 000 դրամի փոխարեն կսահմանվի 6 000 000, իսկ տարադրամի փոխանակման կետերի համար՝ 50 000-ի փոխարեն 3 000 000 դրամ պետական տուրք: Առաջարկվում է գրավատների համար ներկայիս 100 000 դրամի փոխարեն սահմանել 6 մլն տուրք, փոխանակման կետերի համար՝ 50 000-ի փոխարեն 3 մլն:

Գրավատների սեփականատերերի խոսքով՝ հարկային նման բեռի պայմաններում գրավատները կփակվեն, որի արդյունքում, ավելի քան 1 300 աշխատակից կմնա առանց աշխատանք: Նրանց խոսքով՝ այս ամենի արդյունքում հիմնականում շահելու են խոշոր և միջին բանկերը:

«Ով է տեսել 60 անգամ պետական տուրք բարձրացնել, դա անտրամաբանական է, կարծում ենք, որ կառավարությունն էլ երևի չի պատկերացնում, թե ինչ են անում: Բանկերի պետտուրքը ավելացրել են 2,5 անգամ, իսկ մերը՝ 60 անգամ, մի հատ հաշվարկ արեք էլի: Ոնց կարելի է նման անպատասխանատու քայլի գնալ: Տրամաբանությունը որն է, որ արտարժույթի փոխանակման կետերի համար տարեկան պետտուրքը 50 հազար դրամից դառնում է 3 միլիոն դրամ, գրավատների՝ ներկայիս 100 հազար դրամը՝ 6 միլիոն դրամ, իսկ վարկային կազմակերպություների պարագայում գործող 3 մլն դրամի փոխարեն կգանձվի 7 մլն դրամ: Լավագույն դեպքում փոխանակման կետերի տուրքը պետք է բարձրանար 0,5 տոկոսով»,- ասացին աշխատակիցները:

«Առաջին անգամ մեր սրտով ընտրություն արեցինք, իշխանություն փոխվեց, խորհրդարան ընտրվեց, բայց սա էինք ուզո՞ւմ: Վարչապետն ամեն օր ասում է՝ մենք ժողովրդի կառավարությունն ենք, դե հիմա թող գա ու լսի էդ ժողովրդին, հասկանա, թե ինչ են մարդիկ ուզում: Իսկ մեր ուզածը մեծ բան չէ, ընդամենն ուզում ենք հասկանալ, թե ոնց են այդ հաշվարկներն արել: Ինչու պետք է փոխանակման կետը, որն իրականացնում է ընդամենը մեկ գործառույթ, 3 մլն-ի տուրք վճարի, իսկ վարկային կազմակերպությունները 15-20 գործառույթի համար՝ 7 մլն դրամ»,- նշեցին փոխանակման կետերի աշխատակիցները: