Ձեր վստահելի աղբյուրը

2019 թվականի փետրվարին 2018 թ-ի փետրվարի նկատմամբ ՀՀ-ում հիփոթեքային վարկավորման ծավալն աճել է 100 տոկոսով: Այս մասին այսօր հրավիրված ասուլիսում հայտարարեց ՀՀ վարչապետ Նիկոլ Փաշինյանը:

«Մեր կառավարության կողմից իրականացվող ծրագրերի շրջանակներում հիփոթեքային վարկավորման աճը կազմել է 145 տոկոս: Այսօրվա դրությամբ երկրում հիփոթեքային վարկավորման պորտֆելի ծավալն աճել է 30 տոկոսով, ինչը,  մասնագետների գնահատմամբ, ահռելի աճ է»,- նշեց վարչապետը:

Նիկոլ Փաշինյանը նկարագրեց այն շղթան, որով այս թվերը պետք է ազդեցություն ունենան կյանքի վրա:

«Մենք առաջիկայում ունենալու ենք շինարարության պահանջարկ, սա իր հերթին բերելու է նոր աշխատատեղեր ոչ միայն շինարարության, այլև շինանյութերի արտադրության, սպասարկման ոլոտում և այսպես շարունակ: Սա կարևոր ցուցանիշ է, որը բերելու է գործազրկության կրճատման, նոր աշխատատեղերի բացման», - ընդգծեց նա:

Նա տեղեկացրեց նաև, որ այս պահին կառավարության հետ քննարկվում է 89 ներդրումային ծրագիր՝ շուրջ 2.7 մլրդ դոլարի ծավալով: Վարչապետի խոսքով՝  այդ ծրագերից 42-ը՝ 774 մլն ծավալով, գտնվում են իրականացման տարբեր փուլերում:

«Սա նշանակում է, որ երկրում ներդրումային հետաքրքրությունների աճ ունենք»,- ասաց Նիկոլ Փաշինյանը:

Հայաստանը գազի տարանցիկ երկիր դառնալու համար նոր խողովակներ չի կառուցելու

Հայաստանը գազի տարանցիկ երկիր դառնալու համար նոր խողովակներ չի կառուցելու: Այս մասին հայտարարեց վարչապետ Նիկոլ Փաշինյանը՝ պատասխանելով հարցին, թե արդյոք իրանական գազի տարանցման համար նոր խողովակներ չե՞ն կառուցվելու, չէ՞ որ Հայաստան մտնում են գազատարներ, բայց դուրս չեն գալիս:

Վարչապետը նախ կատակեց. «Խողովակներն այդպիսի առանձնահատկություն ունեն՝ համ մտնում են, համ դուրս են գալիս,  դրանք ուղղություն չունեն»:

Այնուհետև ավելացրեց. «Խոսքը նոր գազատարի մասին չէ առնվազն այնքան ժամանակ, քանի դեռ եղած գազատարներով հնարավոր է իրականացնել առկա ծրագրերը»:

Նիկոլ Փաշինյանը նշեց, որ Իրան այցից առաջ հեռախոսազրույցներ է ունեցել Ռուսաստանի, Թուրքմենստանի նախագահների և Վրաստանի վարչապետի հետ, տեղեկացրել է, թե ինչ հարցերի շրջանակ է քննարկվելու Իրանում, քանի որ կարևոր էր նաև նրանց դիրքորոշումը:

«Քննարկումների արդյունքում է որոշվել, որ այս թեման պետք է Իրանում դառնա կարևոր կետերից մեկը: Քննարկումները շարունակվում են, կշարունակվեն, քանի դեռ մենք չենք եկել դրական կամ բացասական եզրակացության»,- նշեց վարչապետը:

Նիկոլ Փաշինյանի խոսքով,  ընդհանուր առմամբ, տրամադրվածությունը պետք է լինի այն, որ Հայաստանը հնարավոր բոլոր ուղղություններով հարաբերությունները զարգացնի թե Իրանի, թե  Վրաստանի, թե  Ռուսաստանի, թե  ԵՄ-ի, թե  ԱՄՆ-ի հետ:

«Այսինքն՝  բոլոր ուղղություններով մենք պետք է նախաձեռնություններ, գաղափարներ ունենանք, թե ինչպես կարող ենք այդ հարաբերությունները զարգացնել:  Կարևոր է արձանագրել, որ նման զարգացումները կարևոր են մեր տարածաշրջանում կայունությունը և ինտեգրացիան ապահովելու առումով: Ուրախ եմ արձանագրել, որ կա հետաքրքրություն, որը միատեսակ և միանման չէ: Իհարկե ամենակարևորն այն է, որ մենք այս գործընթացում մեր բոլոր գործընկերների հետ ենք քննարկումներ ունենում, և ամեն ինչ անում ենք, որ մեր օրակարգը, մեր գործողությունները նրանց համար թափանցիկ լինեն»,- ասաց վարչապետը:

Հիշեցնենք, որ վարչապետ Նիկոլ Փաշինյանը Իրանում հայտարարել էր, որ Հայաստանը պատրաստ է Իրանի հետ տարանցման համագործակցություն ծավալել և լինել իրանական գազի տարանցիկ երկիր:

Նախկին պաշտոնյաները ծիծաղելի գներով հողեր են սեփականաշնորհել

Նախկին պաշտոնյաները ծիծաղելի գներով սեփականաշնորհել են Մեղրու ազատ տնտեսական գոտու հողերը: Այս մասին այսօրվա ասուլիսում ասաց ՀՀ վարչապետ Նիկոլ Փաշինյանը:

Նա հիշեցրեց, որ նախորդ տարի այցելել է Մեղրու ազատ տնտեսական գոտի և տեղում արձանագրել է, որ այդ գոտին ընդհանրապես հողատարածք չունի: Ըստ վարչապետի՝ դրանից հետո սկսել են տվյալ հարցով զբաղվել:

«Պարզվեց, որ մի շարք ձեզ հայտնի բարձրաստիճան պաշտոնյաներ Մեղրու ազատ տնտեսական գոտու տարածքի շուրջ եղած ամբողջ հողերը սեփականաշնորհել են՝ որպես կառավարության ներկայացուցիչ իմանալով, որ այդտեղ այդպիսի նախագիծ է իրականացվելու։ Ընդ որում՝ սեփականաշնորհել են ծիծաղելի գներով»,-  նշեց Նիկոլ Փաշինյանը։

Նրա խոսքով՝ առաջին քայլը, որ արել են, դա այն էր, որ ասել են՝ ուղղակի գան և  կամավոր վերադարձնեն այդ հողերը պետությանը: «Խնդրեցինք քաղաքավարի, և  նրանք մերժեցին։ Շատ լավ, մենք ասացինք, որ ավելի մանրամասն կծանոթանանք էդ գործարքների հետ: Ավելի մանրամասն ծանոթացանք և հիմա քրեական գործ է հարուցված, ու կասկած չկա՝  կապացուցվի, որ այդտեղ տեղի է ունեցել չարաշահում»,- ասաց վարչապետը:

Նիկոլ Փաշինյանը նշեց նաև, որ Մանվել Գրիգորյանի դեմ հարուցված քրեական գործի շրջանակներում ՀՔԾ-ն մինչև գործը դատարան ուղարկելը արդեն իսկ բազմաթիվ կեղծ մրցույթների փաստեր է բացահայտել, ու այդ գործերը ուղարկել է տարածքային կառավարման նախարարություն, որպեսզի այդ աճուրդները չեղյալ հայտարարվեն, և այդ բոլոր հողերը վերադարձվեն համայնքներին:

«Ընդհանուր առմամբ, այս գործընթացը  պետք է շարունակվի։ Իհարկե ես չեմ կարող ասել, որ բոլոր սեփականաշնորհված հողերը հետ ենք վերադարձնելու, չեմ կարող նման բան ասել: Կարող ենք ասել, որ բոլոր այն դեպքերում, երբ պարզվի, որ տեղի է ունեցել ապօրինություն, այդ դեպքում, այդ հողերը կվերադարձվեն պետությանը, քանի որ ես համաձայն եմ՝ մենք ունենք հողի խնդիր»,- ասաց Նիկոլ Փաշինյանը:
Նրա խոսքով՝ կան ներդրումային ծրագրեր, որոնք չեն իրականանում այն պատճառով, որ նախկին մի պաշտոնյա սեփականաշնորհել է հողերը և եթե իմանում են, որ ներդրումային հետաքրքրություն կա, այդ պաշտոնյաները հողերի համար տասն անգամ ավելի գին են ներկայացնում:

Նա հիշեցրեց նաև այն դեպքը, երբ Ռանչպար համայնքում պարզել է, որ ավազահանքի սեփականատերերը նախկին և գործող պաշտոնյաներ են։ Նիկոլ Փաշինյանն ասաց, որ վերահսկողական ծառայությանը գործուղել է ստուգելու այդ գործարքի օրինականությունը։
«Երբ ես օգոստոսին խոսում էի անցումային արդարադատության մասին, դա էլի շատ  մեծ աղմուկ էր բարձրացնում, որ Հայաստանում սեփականության վերաբաշխման գործընթաց է։ Հույս ունեմ՝ բոլորդ տեսնում եք, որ ոչ մի սեփականության վերաբաշխման գործընթաց Հայաստանում չկա։ Բայց նաև մենք անհրաժեշտություն ենք ունենալու անցումային արդարադատության գործիքներ կիրառել»,- ընդգծեց Փաշինյանը։

Նրա խոսքով՝  խոսքը բացառապես պաշտոնյաների, նախկին պաշտոնյաների մասին է, որովհետև կարևոր է ներբիզնեսային հարաբերությունների մեջ չընկնելը։ «Բարձրաստիճան պաշտոնյաներին խորհուրդ եմ տալիս կոռուպցիոն ճանապարհով ձեռք բերված հողն ու գույքը, ամեն ինչ, ներկայանալ իրավապահ մարմիններին, տալ խոստովանական ցուցմունքներ և այդ ամեն ինչը վերադարձնել Հայաստանի Հանրապետությանը: Եթե որևէ մեկը մտածում է, որ մենք մոռացել ենք այդ օրակարգի մասին, չենք կարող մոռանալ, բացառված է: Ես ասում եմ, որ մեր իրավապահներն այս ուղղությամբ պետք է առավել արդյունավետ գործեն: Եթե այստեղ ես չտեսնեմ ռեալ փոփոխություններ, ուրեմն ես պետք է գնամ կոնկրետ քայլերի, քանի որ որևէ մեկը հույս թող չունենա, որ մենք այդ օրակարգը կմոռանանք»,- ընդգծեց Նիկոլ Փաշինյանը: