Ռանչպարի դարդուցավը՝ բանաստեղծությունից դուրս
Երկու օր առաջ վարչապետ Նիկոլ Փաշինյանը չհայտարարված այցով Արարատի մարզի Ռանչպար գյուղում էր։ Այցի մասին վարչապետը տեղեկացրեց իր ֆեյսբուքյան պաշտոնական էջի միջոցով, որով էլ ուղիղ հեռարձակմամբ ներկայացվեց ողջ այցը։
Բացի այն, որ համայնքի բնակիչները տեսնելով Փաշինյանին սկզբում զուտ զրուցում և սելֆի էին անում, գտնվեցին այնպիսի բնակիչներ, որոնք փաստարկված ներկայացրեցին գյուղի խնդիրնրը՝ դրանց լուծում տալու ակնկալիքով։
Այնուհետև վարչապետ Փաշինյանն իր էջում կիսվեց այցից ստացած «ծանր տպավորություններով» և արդյունքում ստացված բանաստեղծությամբ։
Նշենք, որ այցի ժամանակ վարչապետին շտապեց միանալ Արարատի մարզպետ Գարիկ Սարգսյանը և ամեն կերպ փորձում էր հարթել բարձրացված խնդիրերի «սուր անկյունները»։
Քանի որ մարզպետի «համահարթեցման» այս քաղաքականությունը ակնհայտորեն ցույց էր տալիս, որ մարզպետը չի ուզում, որ վարչապետը շատ բան տեսնի, հարց առաջացավ՝ իսկ մարզպետը ինքը տեսնու՞մ է իր մարզի խնդիրները։
Panorama.am-ը Արարատի մարզպետարան հարց ուղղեց, թե ի՞նչ առկա խնդիրներ է ֆիքսել մարզպետը վարչապետի այցի ժամանակ։
Պատասխանը ներկայացնում ենք ամբողջությամբ.
«Նիկոլ Փաշինյանի հետ շրջայցի ժամանակ տարիներով կուտակված խնդիրներ են արձանագրվել: Կան տնամերձ հողամասեր, որտեղ ոռոգման ջրի խնդիր չկա, սակայն հողերն այդպես էլ մշակված չեն: Գովելի կլինի, որ գյուղացին ինքը նախաձեռնող լինի, իր հողը մշակի, բերք ստանա:
Որոշ տեղերում խմելու ջրի խնդիր կա, այսինքն՝ ջուրն արտեզյան է, Գառնու ջուրը գնում են մարդիկ: Ճանապարհների վերանորոգման խնդիրներ կան, համայնք կա, որտեղ մանկապարտեզ չկա. պետք է կառուցել: Ռանչպար, Սիս համայնքներում գազաֆիկացման խնդիրներ կան, թեև արևային մարտկոցներն էլ լավ տարբերակ են, այժմ վարկային հարմար տարբերակներ կան:
Սիսում նույնպես ավտոճանապարհի վերանորոգման խնդիր կա: Վարչապետ Փաշինյանը հանձնարարեց նախահաշիվ ներկայացնել՝ ճանապարհի վերանորոգման հետ կապված: Աշխատանքներ են տարվում արդեն այդ ուղղությամբ, համայնքի միջոցներով նախագիծ-նախահաշիվ է պատվիրվելու»։
Թե ինչպես է գյուղացին, որ աշխատանք չունի, փակելու վարկը՝ մարզպետարանից չմանրամասնեցին։ Ու ընդհանրապես՝ տպավորություն է, որ մարզպետը վարչապետի հետ գյուղացիների օնլայն հեռարձակումը չի նայել, եթե ընդամենը այսքան՝ ընդ որում ընդամենը լուծելի հարցերը ներկայացրեց։
Գուցե Արարատի մարզից պատգամավորնե՞րն են ավելի տեղյակ մարզի խնդիրներից։
Հրատապ լուծում պահանջող խնդիրների մասին Panorama.am-ը խոսեց Ազգային ժողովում մարզը ներկայացնող պատգամավորներ Տաթևիկ Գասպարյանի և Հովիկ Աղազարյանի հետ։
Տաթևիկ Գասպարյանը թվարկեց հետևյալ խնդիրները. «Քանի որ ծնվել և մեծացել եմ գյուղում, հենց մանկուց «բախտ» եմ ունեցել առնչվել գյուղի խնդիրների հետ: Ընդհանուր առմամբ կարելի է ասել, որ խնդիրները բոլոր գյուղերում հիմնականում նույնն են կամ հաճախ կրկնվող, կոնկրետ Ռանչպար գյուղի մասին կկարողանամ հստակ մեկնաբանություններ անել, երբ շուտով անձամբ այցելեմ, լսեմ և տեսնեմ բնակիչների խնդիրները:
Բայց ես կխոսեմ վերջերս այցելած Գետափնյա և Արբաթ գյուղերի խնդիրների մասին: Ամենևին էլ գաղտնիք չէ, որ խնդիրները բազում են` ամենափոքրից մինչև ամենամեծ: Կցանկանայի առանձնացնել դրանցից մի քանիսը. օրինակ` Գետափնյա համայնքի բնակիչները բողոքում էին հոսանքի թույլ լինելուց: Հանդիպումից հետո ես կապ հաստատեցի Էլ. ցանցի տարածքային պատասխանատու գլխավոր ինժեների հետ և ստացա պատասխան, որ այդ խնդրի մասով ունեն պլանավորած ծրագիր, որը պետք է իրականացնեն այս ամռանը: Նաև շատ բողոքներ լսեցի «Վեոլիա Ջուր» ՓԲ ընկերության հետ համագործակցությունից, մասնավորապես` գյուղի բնակիչներն ասում էին, որ Աէրացիա թաղամասի կոյուղաջրերն անցնում են տվյալ համայնքով և տեղումների ժամանակ լցվում են փողոցները, դե իսկ գարշահոտությունն ու վնասաբեր հետևանքներն արդեն իսկ պարզ են»։
Նա շեշտեց, որ բնակիչները բողոքում էին նաև վարկերից, մանկապարտեզ չունենալուց, փողոցներում լուսավորության բացակայությունից:
«Արբաթ համայնքում բնակիչները ոռոգման ջրի խնդիր ունեն, ճանապարհներն էլ անմխիթար վիճակում են: Սակայն, այս համայնքում առաջնային է մնում դեռևս տրանսպորտի խնդիրը: Լինելով քաղաքից 5-6 կմ հեռու՝ Արբաթ համայնքը Երևանի հետ կապող անմիջական տրանսպորտ չունի: Նրանք ունեն ակտիվ ուսանողություն, բազմաթիվ աշխատակիցներ, ովքեր աշխատում են քաղաքում կամ քաղաքից են գալիս իրենց համայնք աշխատանքի»,- ասաց պատգամավորը։
Նա հավելեց, որ այս հարցը պատրաստվում է քննարկել Տրանսպորտի և կապի նախարարության հետ և փորձել գտնել այս խնդրի լուծման հնարավոր ամենաօպտիմալ տարբերակը:
«Մարզի համայնքներում խնդիրները հիմնականում նույնն են, եթե չհաշվենք, որ որոշ գյուղեր իրենց բնակլիմայական պայմաններով և աշխարհագրական դիրքով ունեն որոշ առավելություններ»,- ասաց Հովիկ Աղազարյանը։
Այնուամենայնիվ նա առանձնացրեց երեք հիմնական հարց, որոնք ամենաառաջնային լուծում են պահանջում՝ «Ջրամատակարարում, ճանապարհներ և սոցիալական խնդիրների թիրախավորված լուծում։
«Այնպես չէ, որ այս խնդիրներից տեղեկացված չեն մարզպետը կամ մարզային մակարդակով համապատասխան իշխանությունները, բայց խնդիրների լուծումը ժամանակ է պահանջում։ Անգամ մի համայնք գնալով կարելի է ընդհանրական պատկերացում կազմել և լուծումներ գտնել մյուս համայնքների համար էլ»,- հավելեց նա։
Դե ինչ՝ ինչն է շատ՝ ժամանակը։
Հարակից հրապարակումներ`
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
