Ձեր վստահելի աղբյուրը

«Այնպես չէ, որ ինձ բերում են քարտեզը, ես խաչ եմ քաշում այս սրճարանի վրա, այստեղ կանաչով եմ ներկում, մյուսը՝ դեղինով»,- այսօր տեղի ունեցած ասուլիսում ասաց վարչապետ Նիկոլ Փաշինյանն՝ անդրադառնալով հարցին, թե ինչու Օպերայի հարակից տարածքում ապամոնտաժվեց ընդամենը երկու սրճարան, իսկ մյուսները մնացին, որոնցից մեկն էլ,  ըստ տեղեկությունների, պատկանում է գործարար Սամվել Ալեքսանյանի ընտանիքին:

Նրա խոսքով՝  որքան ինքը տեղյակ է՝ այդտեղ  իրավական ձևակերպումների խնդիր է:

«Գիտեմ, որ մի մասի դեպքում, երբ որ պայմանագրերով քաղաքապետարանը հնարավորություն է ունեցել լուծել պայմանագիրը միակողմանի, լուծել է: Այն դեպքում, երբ որոշակի այլ  իրավական ձևակերպումներ կան, դիմել է դատարան: Ես կարող եմ հավաստիացրել, որ բոլոր այն դեպքերում, երբ կլինի հնարավորություն սկսել գործընթաց և տարածքն ազատել սրճարաններից, բոլոր այդ դեպքերում համապատասխան որոշումներ կկայացվեն»,- ընդգծեց նա:

Նիկոլ Փաշինյանը նշեց նաև, որ իր համար բացարձակ տարբերություն չկա, թե ում են պատկանում սրճարանները. «Եթե նույնիսկ այդ սրճարաններից որևէ մեկն  իմ հարազատ եղբորը լիներ, դրանից  իմ վերաբերմունքը չէր փոխվելու»։