Ձեր վստահելի աղբյուրը

Երևանի ընդհանուր իրավասության դատարանի Շենգավիթի նստավայրում այսօր ընթացավ  ՊՊԾ գնդի գրավման գործով «Սասնա ծռեր» խմբի 10 անդամի գործով դատական նիստը։

Նիստը նախագահող դատավոր Մեսրոպ Մակյանը նշեց, որ գործով պետք է հանրային պաշտպաններ ներգրավեն, քանի որ վճարովի մոտ տասնյակ պաշտպանները նիստերին չեն ներկայանում, միայն Զարուհի Փոստանջյանն է, որ մասնակցում է դատական նիստերին։

«Գործի քննությանը պետք է ներգրավվեն հանրային պաշտպաններ, գործի քննությունն իրավաչափ անցկացնելու, կողմերին համաչափ ներկայացնելու, ամբաստյալների իրավունքների պաշտպանությունը երաշխավորելու նպատակով»,-ասաց դատավորը։

Դատարան էին ներկայացել գործով տուժող ճանաչված ոստիկանության երեքաշխատակիցներ էին: Նրանցից Փայլակ Մնացականյանը հրազենային վիրավորում էր ստացել հուլիսի 29-ին՝ Սարի թաղի դեպքերի ժամանակ։

«Լուսաձայնային միջոցների կիրառումից հետո ժողովուրդը ցրվեց։ Դրանից հետո ժամը 22։30-ի սահմաններում հետ էինք վերադառնում դեպի Խորենացի փողոց։ Այդ ժամանակ գնդի տարածքից լսվում էին կրակոցներ։ Այդ ժամանակ մեզ զգուշացվեց, կրակոցներ են լսվում, հարկավոր է զգույշ լինել։ Անցնում էինք փոքր խմբերով, արագ վազքոց։ Այդ հատվածն անցնելուց կրակոցի ձայն լսեցի, ցավ զգացի որովայնի ու ոտքի հատվածում, բայց վազքս չդադարեցրեցի»,-պատմեց ոստիկանն ու նշեց, որ օգնություն է խնդրել ոստիկաններից։

Այդ ժամանակ իրեն մոտեցել են վաշտի հրամանատար Նազարեթ Գևորգյանը ու գնդապետ Լեռնիկ Երանոսյանը, մոտեցրել են շտապօգնության մեքենային, տեղափոխել են «էրեբունի» ԲԿ։ Կատարված վիրահատության արդյունքում պարզվել է՝ վնասվել է հաստ աղիքը, որի միջից հանվել է փամփուշտի գնդակը։

Գործով մեկ այլ տուժող Մայիս Հովհաննիսյանը, որ աշխատել է ոստիկանության Էրեբունու բաժնում, դատարանին հայտնեց, որ ՊՊԾ գնդի հարակից տարածքում իր կողմից շահագործվոց 2106 մակնիշի ծառայողական ավտոմեքենան այրել են, ինչի հետևանքով շահագործման ենթակա չէ։ Նա պահանջում է գույքային վնասի փոխհատուցում։

«Թե ում կողմից այրվեց, տեղյակ չեմ։ դեպքի վայրում աշխատում էին ԱԻՆ աշխատակիցները։ Գույքային վնասը կազմում է 750 հազար դրամ»,-ասաց նա։

ՊՊԾ գնդի աշխատակից Հրայր Հայրապետյանն հայտարարեց, որ իր դարակում եղած 336.000 ՀՀ դրամը գողացել են: Հայրապետյանը պարզաբանեց, որ դա շուրջ 96 աշխատակիցների 3500-ական դրամն է եղել, որը նախատեսված է 02 թերթի հրատարակման համար։

«Դարակում գումարը չկար, զարմանալի է, որ իմ աշխատասենյակում գտնվող երկաթյա պահարանը տեղում չէր։ Դրա մեջ եղել են փաստաթղթեր, իսկ ներքևի մասում իմ անվանական ատրճանական ու Կոբրա տեսակի լապտերը»,-մանրամասնեց տուժողը, ավելացնելով, որ հաջորդ օրը գտել են ատրճանական ու լապտերը։

Դատական նիստը հետաձգվեց: Քրեական գործի քննությունը կշարունակվի մարտի 27-ին: Դատավորը հույս հայտնեց, որ տուժողների հարցաքննությունը կեզրափակեն, կանցնեն վկաների հարցաքննությանը։

«Բայց մինչ այդ մենք որոշել էինք, որ կվերարտադրենք Վահրամ Տեփանոսյանի կողմից դատարանին տրամադրած տեսանյութը, որպեսզի հասկանանք, թե ինչ տեղեկություններ է հայտնում գործի նյութերի վերաբերյալ։ Եթե կլինեն բավարար հիմքեր, նրան կներառենք դատակոչի ցուցակում, կհրավիրենք հարցաքննության, որից հետո նոր կսկսենք վկաների հարցաքննությունը»,-ասաց դատավորը։

Հիշեցնենք, որ Վահրամ Տեփանոսյանը սպանված ոստիկան Յուրի Տեփանոսյանի հայրն է։ Նա Panorama.am-ի հետ զրույցում ավելի վաղ պնդել է, որ որդուն սպանել են ոչ թե ՊՊԾ գունդը գրաված խմբի անդամները, այլ ոստիկանները։