Ձեր վստահելի աղբյուրը

Դատարանի որոշումն այդքան էլ անսպասելի չէր՝ հաշվի առնելով այն ճնշումները, որոնք գոյություն ունեն դատարանների նկատմամբ ՝ հատկապես Ռոբերտ Քոչարյանի գործի հետ կապված։ Այս մասին այսօր հրավիրված ասուլիսում  ասաց ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանն՝ անդրադառնալով խափանման միջոց կալանավորումը ևս երկու ամիս ժամանակով երկարացնելու վերաբերյալ՝ դատարանի մարտի 15-ի որոշմանը։

Միաժամանակ փաստաբանը նշեց, որ այս դեպքում իրենք մի փոքր ավելի շատ սպասելիքներ ունեին՝ հաշվի առնելով այն, որ  քրեական գործի բոլոր նյութերն իրենց ձեռքի տակ էին։

«Եթե մինչ այդ ենթադրությունների մակարդակով կարելի էր ասել, հիմա հստակ կարելի է ասել՝ այն ամենը, ինչ ներկայացված է, իրականում ջուր է։ Դա գնալով ավելի ու ավելի ակնհայտ է դառնում բոլոր նրանց համար, որոնք այս գործի հետ առնչվում են»,- ասաց Հայկ Ալումյանը։

Հարցին, թե ինչից ելնելով են այդ  հետևության հանգել, որ դատարանի նկատմամբ կան  ճնշումներ, փաստաբանը նշեց, նման հետևության եկել են և գաղտնալսումների արդյունքում, և վարչապետի կողմից  հրապարակայնորեն դատավորների հասցեին արտահայտած  սպառնալիքներից։

«Տեսաք քանի դատավար ինքնաբացարկ հայտնեց՝  չուզենալով Ռոբերտ Քոչարյանի կալանավորման հարցով զբաղվել։ Իսկ ինչո՞ւ չեն ուզում գործ ունենալ այդ գործի հետ, որովհետև մի կողմից կալանավորման ոչ հիմքերն են առկա, ոչ՝ պայմանները, մյուս կողմից՝ չկալանավորել  չեն կարող, քանի որ այն, ինչ արվեց դատավոր Ազարյանի նկատմամբ, նրանք պատկերացնում են, որ ազատ արձակելով պարոն Քոչարյանին դառնում են թիրախ, թիրախ վարչապետի և իշխանության կողմից»,- ընդգծեց նա։

Հայկ Ալումյանը հիշեցրեց, որ երբ օգոստոսի 13-ին Ռոբերտ Քոչարյանն ազատ արձակվեց, չորս օր հետո Հանրապետության հրապարակում տեղի ունեցած հանրահավաքի ժամանակ ատելության խոսք հնչեց այդ դատավորի նկատմամբ, թեև նրա անունը չնշվեց, բայց, ըստ փաստաբանի, պարզ էր, թե ում մասին էր խոսքը։

«Հիշո՞ւմ եք, որ վարչապետն ասում էր՝ էդ որ դատավորն է, որ կարող է չկատարել իմ ասածը։ Դրանից հետո էլ վարչապետը մի քանի անգամ տարբեր առիթներով ուղիղ կամ անուղղակի ատելության խոսք հնչեցրեց այն դատավորների հասցեին, որոնք կհամարձակվեն Ռոբերտ Քոչարյանի օգտին դատական ակտ կայացնել։ Այս ամենը չի կարող ազդեցություն չունենալ այն դատավորների վրա, որոնք այս կամ այն կերպ առնչվում են Քոչարյանի գործի հետ։ Բայց այդքանով հանդերձ, ահռելի ճնշման պայմաններում, դատավոր Բեկթաշյանը, նույնիսկ այդ ամենը հաշվի առնելով, երբ Քոչարանի դեմ անօրինական որոշում կայացվեց, ստիպված եղավ արձանագրել, որ կաշառքի դրվագով ամենանվազագույն շեմը հաղթահարող կասկածն անգամ բացակայում է»,- ընդգծեց Հայկ Ալումյանը։

Փաստաբանը նշեց, որ իրենց վերլուծության համաձայն, կաշառքի դրվագը Ռոբերտ Քոչարյանի մեղադրանքի մեջ հայտնվել է միմիայն այն նպատակով, որ 300.1 հոդվածով Քոչարյանն ակնհայտորեն անձեռնմխելի է. «Այն, ինչ-որ վերագրում են այդ հոդվածով, այդ գործողությունները բխում են նրա պաշտոնական պարտականություններից։ Եւ որպեսզի նրա անձեռնմխելիության խնդիրը փակվի, ապա անհրաժեշտ էր մեղսագրել մի հանցագործություն, որը նրա պաշտոնական գործունեության հետ կապ չունի, որը նա ի պաշտոնե չի կատարել: Այդ պատճառով էլ ծնվեց ակնհայտ անհիմն 2-րդ մեղադրանքը՝ կապված կաշառքի հետ»։