Ձեր վստահելի աղբյուրը

«2018 թվականի օգոստոսի 1-ից տնտեսված միջոցների հաշվին 25-30 տոկոսով ավելացվել է ամբուլատոր բուժհաստատությունների աշխատակիցների աշխատավարձերը, ինչը շարունակական բնույթ է կրում»,- այս մասին այսօր ՀՀ Ազգային ժողովի առողջապահության և սոցիալական հարցերի մշտական հանձնաժողովի նիստում ասաց առողջապահության նախարարի տեղակալ Արսեն Դավթյանը՝ ներկայացնելով նախարարության նախորդ տարվա կատարողականը:

Նրա խոսքով՝ 2019 թվականի հունվարի 1-ից բյուջեով հաստատված միջոցների շրջանակներում տեղի են ունեցել աշխատավարձի ավելացումներ ևս 15 տոկոսով։

Հանձնաժողովի նախագահ Նարեկ Զեյնալյանն անդրադառնալով պոլիկլինիկաներում թերակատարումներին, նշեց, որ պետք է դրանց տնօրեններն աշխատանքն այնպես կազմակերպեն, որ արդյունավետությունը բարձրանա։

«Սա խոսում է այն մասին, որ պոլիկլինիկաների տնօրենների կողմից վատ մենեջմենթ է իրականացվում և այստեղ ընկնում է նաև առաջնային օղակի արդյունավետությունը»,- ասաց նա:

Փոխնախարարն արձագանքեց՝ պոլիկլինիկաների հիմնական թերակատարումները հիմնականում կապված են մարզերում մասնագետների բացակայությամբ:

Նիստին ներկա փոխնախարար Լենա Նանուշյանը հայտնեց, որ մարզերում առկա բժիշկների բացը լրացնելու նպատակով ՀՀ Առողջապահության նախարարությունը պետական պատվերի շրջանակում օրդինատուրա անցնող ուսանողների հետ պայմանագիր է կնքում, որպեսզի նրանք ուսումն ավարտելուց հետո հինգ տարի ժամկետով աշխատանքի անցնեն մարզերում:

«Այս պահին մարզերում 200 մասնագետի թափուր տեղ ունենք: Հիմնականում մարզերում բացակայում են անեսթեզիոլոգները: ԿԳՆ-ից 49 տեղ նախորդ տարի տրամադրվել է մեզ, մենք օրդինատորի հետ պայմանագիր ենք կնքել: Մեխանիզմն այն է, որ նրանք օրդինատուրա անցնելուց հետո ուղեգրվում են այն մարզը, որտեղ առկա է իրենց մասնագիտությամբ թափուր տեղ»,- ասաց փոխնախարարը:

Փոխնախարարը հայտնեց, որ այս տարի ևս մեկ ծրագիր են նախաձեռնում, համաձայն որի՝ մարզեր ուղեգրելու են նաև երևանյան ԲԿ-ների բժիշկներին՝ երեք ամիս ժամկետով:

«Իմ քայլը» խմբակցության պատգամավոր Արփի Դավոյանը պատմեց իրենց դիմած քաղաքացուց։ Վերջինը հայտնել է, որ պոլիկլինիկայում ատամնաբույժը հրաժարվել է պետպատվերով սպասարկել երեխային, և քաղաքացին երեխային տարել է այլ տեղ և վճարովի ծառայություն  ստացել։

Նույն խմբակցության պատգամավոր Լուսինե Բադալյանը շարունակելով գործընկերոջ բարձրացրած հարցը՝ նշեց, որ, ոչ մեկի համար գաղտնիք չէ, որ անվճար մատուցվող բժշկական ծառայությունները որակապես զիջում են վճարովի ծառայություններին. «Այս խնդիրն ունենք բժշկության ամբողջ ոլորտում: Սա լուծելու համար որևէ քայլ ձեռնարկու՞մ ենք: Այսպիսի արտահայտություն էր առաջացել, որ ավելի լավ է վճարովի բուժվել, քան անվճար մեռնել»։

Փոխնախարար Դավթյանը պատասխանեց, որ այդ ամենը կախված է պետական բյուջեից առողջապահությանը հատկացվող միջոցների ցածր մակարդակից. «Պետական պատվերի շրջանակներում մատուցվող ծառայությունների գները շուրջ երեք անգամ պակաս են, վճարովի հիմունքներով իրականացվող ծառայությունների գներից»։

Ինչ վերաբերում է հարցի լուծմանը՝ նա նշեց, որ ներկայում նախարարությունն աշխատանքներ է իրականացնում՝ առողջության համապարփակ ապահովագրության ուղղությամբ. «Դրա շրջանակներում մենք կարող ենք ինչ-որ չափով կարգավորել հարցեր, կամ պետբյուջեով մի քանի անգամ ավելացնել առողջապահական ծախսերը, որը, կարծում եմ, մոտ ապագայում դժվար լինի»։