Ձեր վստահելի աղբյուրը

Այսօր  աշխարհում նշվում է որպես Թատրոնի միջազգային օրը։ Այն նշվում է 1961 թվականից, երբ ՅՈՒՆԵՍԿՕ-ի Միջազգային թատրոնի ինստիտուտը մարտի 27-ը հռչակեց Թատրոնի միջազգային օր: Առաջին տարին այս տոնը նշել են միայն Ֆրանսիայում, ապա տարածվել է ամբողջ աշխարհում: Այնուհետև տոնը դառնում է ավանդական ու նշվում է աշխարհի մի շարք երկրներում, այդ թվում նաև Հայաստանում:

ՀՀ մշակույթի նախարարության նախաձեռնությամբ  Գ. Սունդուկյանի անվան ազգային ակադեմիական թատրոնի ճեմասրահում /ձմեռային այգում/ կանցկացվի տոնական հանդիսություն, որի ժամանակ ոլորտի մի շարք վաստակաշատ նվիրյալներ կարժանանան նախարարության պարգևների: Մշակույթի նախարարության հաղորդմամբ, հանդիսությունը կուղեկցվի Հայաստանի պետական ջազ-նվագախմբի և հանրապետության անվանի մենակատարների մասնակցությամբ: Միջոցառմանը ներկա կլինեն թատերարվեստի գործիչներ, ժողովրդական արտիստներ, երիտասարդ արվեստագետներ:

Հայաստանի Թատերական Գործիչների Միության նախագահ Հակոբ Ղազանչյանը շնորհավորական ուղերձ է հղել օրվա առիթով, որում ասված է. «Հարգելի գործընկերներ, թատերական աշխարհի մեծարգո նվիրյալներ, սիրելի հանդիսական. Այսօր հերթական անգամ ողջ միջազգային հանրությունը նշում է Թատրոնի միջազգային օրը՝ մեր պրոֆեսիոնալ տոնը։

Թատրոնն իր հազարամյա կենսագրության ընթացքում բազմիցս է ենթարկվել փորձությունների, բազմիցս ապացուցել անհրաժեշտությունը հասարակության զարգացման, պետության կայացման գործում և անցած տարին այդ առումով բացառություն չէր: Եղան ցնցումներ, եղավ լարված իրավիճակ, բայց բարեբախտաբար այդ ամենն արդեն անցյալ է, և հուսանք, որ դա մեծ թյուրիմացություն էր, և որ այսուհետ ավելի հանգիստ կարող ենք մտածել վաղվա օրվա, մեր պրոֆեսիոնալ գործունեության մասին։

Ասածիս վառ ապացույցը կարելի է համարել Համազգային թատրոնի նոր շենքի հիմնարկեքի արարողությունը, որն իրականացավ ՀՀ վարչապետ Նիկոլ Փաշինյանի մասնակցությամբ։ Հուսով եմ, որ մոտ ապագայում վերջապես կլուծվի Մնջախաղի թատրոնի նոր շենքի հարցը, և իհարկե, առաջիկայում կնդունվի «Թատրոնի մասին» վաղուց սպասված օրենքը:

Կարծում եմ, որ թատրոնի առջև ծառացած բազմաթիվ խնդիրներ, որոնք միանշանակ կան, ժամանակի ընթացքում լուծում կստանան, և ես կասկած չունեմ, որ մենք՝ թատրոնի նվիրյալներս, կշարունակենք ծառայել մեր գործին, կշարունակենք ծառայել դարերի պատմություն ունեցող հայ թատրոնին»։