Ձեր վստահելի աղբյուրը

Խորհրդարանում կառավարության ծրագրի ընթացքի և արդյունքների մասին զեկույցը ներկայացնող վարչապետ Նիկոլ Փաշինյանից «Բարգավաճ Հայաստան» կուսակցության պատգամավոր Տիգրան Ուրիխանյանը հետաքրքրվեց արտաքին պարտքի սպասարկումից։

«Մեր իրականության մեջ կան դառը դրվագներ, որոնք կարող են լավագույն զարգացումների համար խոչընդոտ հանդիսանալ։ Այս տարվա կտրվածքով ՀՀ-ն պիտի սպասարկի 400 մլն-ից ավելի արտաքին պարտքի ակումուլացիա։ Հաջորդ տարվա որոշակի ժամանակային կտրվածքով 800 մլն-ից ավելի չափով, այսինքն ընդհանուր առմամբ կարճ ժամանակի մեջ 1 մլրդ 200 մլն դոլարից ավելի պարտքի ակումուլացիա պետք է սպասարկի ՀՀ-ն, որի պետական բյուջեն շուրջ 3 մլրդ 55 մլն է կազմում։ Ի՞նչ հետևանքներ սա կարող է առաջացնել մեզ համար, եթե չկարողանանք  հասնել»,- հարցրեց պատգամավորը։

Փաշինյանն ասաց. «Պարոն Ուրիխանյան, չգիտեմ ինչու եք այդպիսի թախծոտ ձայնով հարցը տալիս, քանի որ նորություն չի, այսօր չի ծագել դա։ Որևէ սպառնալիք ՀՀ համար չկա։ Ուզում  եմ հավաստիացնել, որ արտաքին պարտքի սպասարկումը ինստիտուցիոնալ հիմքերի վրա է դրված և տարիներ առաջ պլանավորված է, թե ինչպես ենք սպասարկելու»։

Պատգամավորն արձագանքեց. «Պարոն վարչապետ, Դուք լավ գիտեք իմ հարգալից վերաբերմունքը, հարցը տալիս եմ ահռելի պարտքի մասին՝ ժպտում եք, հետո ասում եք՝ թախծոտ ձայնով, ԱԺ կանոնակարգ օրենքը չի կանոնակարգում պատգամավորի ձայնի ելևէջները։ Բա պարտքից եմ հարցնում, բյուջեի կեսի չափ պարտք ունենք մարելու, բա թախիծ է, բա ինչ է: Այո, ես մտահոգ եմ և թախծոտ հարցեր տվել եմ բոլոր իշխանություններին, որոնց հանդիպել եմ այս դահլիճում, մենք Ձեզ հետ միասին ենք դա արել»։

Փաշինյանն էլ ասաց. «Կներեք, եթե իմ խոսքի մեջ որևէ ոչ պատեհ բան նկատեցիք, որևէ նման բան նկատի չունեի, ընդամենը Ձեր տրամադրությունն էի ուզում փոխել»։

«Լուսավոր Հայաստան» խմբակցության պատգամավոր Անի Սամսոնյանն էլ վարչապետից հետաքրքրվեց՝ բարելավվե՞լ է արդյոք Հայաստանում հերթ կանգնելու մշակույթը։

Նա հիշեցրեց,  որ նման կետ կար կառավարության ծրագրում:

«Բոլոր այն հիմնարկներում, որտեղ այդպիսի խնդիր կա շատ հստակ հրահանգ է դրվել, որ քաղաքացիներին հերթագրող ապարատներ տեղադրեն։ Կանոնակարգված հերթագրումը կարևոր է նաև անվտանգության տեսանկյունից:  Քրեակատարողական հիմնարկում գտնվելու բերումով, գիտեմ, որ շատ դեպքերում սա նաև հանցագործության նախապատրաստման ինֆորմացիայի աղբյուր է։ Որովհետև մեկը գալիս է կանգնում, իբր հերթ է սպասում, ու տեսնում է, թե ով գրպանից ինչքան փող հանեց, ինչքան փող ստացավ հետո զանգում է, դրսում սպասում են, հետևից տուն են գնում և այդպես շարունակ։ Եվ այո, հերթ կանգնելու կուլտուրան շատ կարևոր ենք համարում, ղեկին ծխել-չծխելու կուլտուրան շատ կարևոր ենք համարում, սիգնալ տալու-չտալու կուլտուրան շատ կարևոր ենք համարում, փողոցում «ճռիկներ» անել-չանելու կուլտուրան շատ կարևոր ենք համարում, որովհետև դա վերաբերմունք է ուրիշների նկատմամբ։ Եվ մենք ասում ենք, այո, մեր քաղաքական խնդիրն այն է, որ ամեն քաղաքացի պետք է իմանա, որ ինքն ուրիշ քաղաքացու նկատմամբ պետք է ունենա շատ կոնկրետ վերաբերմունք, որը կարող եմ բնորոշել մեկ բառով՝ հարգալից», -  պատասխանեց  Փաշինյանը: