Ձեր վստահելի աղբյուրը

Կառավարության հետ հարցուպատասխանի ժամանակ «Բարգավաճ Հայաստան» կուսկացության պատգամավոր Գևորգ Պետրոսյանը դիմելով վարչապետ Նիկոլ Փաշինյանին՝ ասաց. «Հարգելի վարչապետ, եթե չեմ սխալվում Ձեզ են պատկանում այս խոսքերը՝ «մեզ պետք չեն այնպիսի ռեկտորներ, ովքեր ուսանողների առաջ դուռ են փակում»։ Այսօր նույնպես, ինչպես և նախկինում մի քանի անգամ Դուք հատուկ ընդգծեցիք Ձեր ղեկավարած կառավարության կողմից աշխատանքի խրախուսման քաղաքականությունը։ Ինձ մոտ հարց է առաջանում, արդյոք ՀՀ-ում ռեկտորների, բուհերի այլ ղեկավարների աշխատանքի գնահատման չափանիշը դռներ փակելու կամ բացելու մեջ է։ Չկա՞ն այլ չափանիշներ։ Սա բացարձակապես որևէ ռեկտորի անձի պաշտպանություն չէ, առավել ևս համալսարանի ռեկտորի նկարի մոտ մոմի լույսի տակ չեմ աղոթել»։

Փաշինյանն արձագանքեց, որ ընդհանուր առմամբ պետք է գնահատական տալ այն իրավիճակին, որն առկա է բուհական համակարգում. «Պետք է շատ ուղիղ և հստակ խոստովանենք, որ մեր բուհական համակարգը չի համապատասխանում այն չափանիշներին և մարտահրավերներին, որ այսօր մեր առաջ կա։ Այն, որ ասում եք դռները բաց պահել կամ փակ պահել, համաձայն եմ, որ ինքին այդպիսի չափանիշ դժվար է ձևակերպել, բայց շատ կարևոր բանի նշան է դա։ Այո, այս հեղափոխությունը սկսվել է ԵՊՀ դռները բացելով և ԵՊՀ դռները պետք է բաց մնան։ Այն ռեկտորը, որ չափահաս մարդու առաջ փակում է դուռը, ասում է՝ դուրս չպիտի գաս այս լսարանից, ինքն անելիք չունի ՀՀ-ում, ոնց ուզում եք գանհատեք»։

Պատգամավորն արձագանքեց. «Բոլորս էլ շահագրգռված ենք, որ օրենքը խախտած ոչ միայն ռեկտորները, այլ ցանկացած պաշտոնյա մեկուսացվի ոչ միայն պաշտոնից, այլև գիտամանկավարժական գործունեությունից։ Ողջունում եմ Ձեր մտադրությունը՝ ազատվել օրինականության դեմ քայլեր կատարող պաշտոնյաներից, բայց եթե զարմանում ենք այդպիսի ռեկտորների վրա, ուրեմն հանուն արդարության և հավասարության պետք է զարմանանք, թե նոր Հայաստանում ինչ գործ ունի պատգամավոր, որ ամբիոնից իր գրած տեքստը չի կարողանում կարդալ, մարզպետ լինել մի մարդ, որ կոկորդիլոսը թռչնից չի տարբերում, Պետական վերահսկողական ծառայությունը ղեկավարել մի մարդ, որը խախտում է էթիկայի վարքագծի կանոնները, և երբ հարցնում են՝ չե՞ս վախենում, որ կձերբակալվես, ասում է՝ ես ձերբակալվողի նմա՞ն եմ: «Ձերբակալվողի նման»-ը ո՞րն է, բոլորս էլ կարող ենք, եթե հանցագործության մեջ մեղադրվում ենք, ձերբակալվենք»։

Պետրոսյանը վարչապետին խնդրեց ուշադրություն դարձնել Հայաստանում հավասարության մթնոլորտը անխախտ պահելու հարցին. «Ես լիարժեք կիսում եմ ասվածը, սակայն եթե Դուք վստահ եք, որ Ձեր խմբակցության բոլոր պատգամավորները կարող են Ձեր ուզած չափանիշներին համապատասխան կարդալ տեքստերը, ես հանձնվում եմ Ձեր առաջ»։