Ձեր վստահելի աղբյուրը

«Շատ են ասում, որ մենք ՀԱՊԿ-ում ձախողել ենք։ Ինչո՞վ ենք ձախողել։ Ես կարծում եմ, որ ՀԱՊԿ-ում մենք հաջողել ենք»,-ԱԺ-ում հայտարարեց  վարչապետ Նիկոլ Փաշինյանը։

Նա նշեց, այսօր ՀԱՊԿ-ում Հայաստանի ձայնը լսելի է, «մենք ասում ենք մեր ասելիքը, և մեր նկատմամբ, թույլ տվեք ասել, հարգանքը մեծացել է»։

Փաշինյանն ասաց, իր համար գնահատման չափանիշները բոլորովին այլ են, ոչ թե կազմակերպության գլխավոր քարտուղարի պաշտոնը մի ամիս ավել է զբաղեցրել, թե պակաս։

Ինչ վերաբերում  է Սիրիա մասնագետների խումբ ուղարկելուն, ապա երկրի ղեկավարը բանաձևեց. «Սիրիա գնացել ենք մեր ինքնիշխանության ու մեր պատմական առաքելության նկատառումներով»։

Նրա խոսքով, եթե այնտեղ գտնվող հայ բժիշկը փրկել է մի մարդու կյանք, ով 1915 թվին  Ցեղասպանությունից մազապուրծ եղած մեր հայրենակցին մի կտոր հաց է տվել կամ մի բաժակ ջուր, ապա համարում է, որ դրանով պատմական պարտքը վերադարձնում են Սիրիայի ժողովրդին։

«Իմիջիայլով, այդ ականազերծվող տարածքներում երեխաներ են վազվզում և խաղում։ Եթե այսօր մեր մասնագետները 100 քմ տարածք են բացում են մարդկանց թոռների համար, ովքեր Ցեղասպանությունից մազապուրծ մեր հայրենակիցներին , ես համարում եմ, որ սա պատմական առաքելություն է, որ իրականացնում ենք Սիրիայում»,-ասաց նա։

Նա չբացառեց, որ առաքելությունն ունի ռիսկեր, համոզմունք հայտնեց, որ մեծացնում է  Հայաստանի ինքնիշխանությունը, համարում է, որ ճիշտ առաքելություն է։