Ձեր վստահելի աղբյուրը

Արդարադատության նախարար Արտակ Զեյնալյանի ձևակերպմամբ՝ փոխնախարարներ Արթուր Հովհաննիսյանը և Սուրեն Քրմոյանը աշխատանքից ազատվեցին քաղաքական որոշման արդյունքում։ Ըստ նախարարի՝ նրանց աշխատանքից գոհ և բավարարված են, և վերջիններս բարձր մասնագիտացում ունեն, բայց կառավարության քաղաքական որոշման արդյունքում նրանք ազատվեցին։

«Այլընտրանքային նախագծեր»-ի անդամ Էլինար Վարդանյանի մոտ նախարարի այս հայտարարությունները մի քանի հարցեր են առաջացրել։

«Այդ քանի՞ բարձր պրոֆեսիոնալ ունեք, որ եղածներին էլ ազատում եք,
Ձեր քաղաքական որոշումների տրամաբանությունը ինչո՞վ են տարբերվում ՀՀՇ-ի և ՀՀԿ-ի որոշումներից,
իսկ նախարար Զեյնալյանը որտե՞ղ էր որոշման ժամանակ, իր նախորդները իրենց որակյալ տեղակալների համար կռիվ կտային:

Նման վարքագիծը կլիներ իսկական քաղաքական որոշում, իսկական քաղաքացու օր։

Փաստորեն քաղաքական որոշումների փիլիսոփայության մեջ բան չի փոխվել. նախարարից մինչև պահակ պետք է կուսակցական լինեն կամ գոնե կուսակցության «համակիրներ», կամ գոնե ինչ-որ մեկի «գանձը»։

Ես գիտեմ, որ շատերը կփորձեն հիմնավորել, որ քաղաքական պաշտոնների վերաբերյալ քաղաքական որոշումներ են ընդունվում: Բայց կադրային ռեսուրսների առանց այդ էլ սղության պայմաններում բարձր մասնագիտացում ունեցող մասնագետներից ազատվելը մեծագույն սխալ է. այսօրվա ԱԺ որակը դաս չէ՞, «Իմ քայլի» նորանշանակ պաշտոնյաները դաս չե՞ն։

Միակուսակցական այս ճահիճը ի վիճակի է խժռելու ցանկացած լավ գաղափար ու լավ անհատի։ Ներկա իշխանության ղեկավարները նախկիններին քննադատում ու մեղադրում էին նաև այս հարցում։
Ի՞նչ եք ուզում պրոֆեսինալներից. ՔՊ-ացու՞մ։
Ի՞նչ եք ուզում ոչ կուսակցական գործիչների՞ց. ՔՊ-ացու՞մ։
Ի՞նչ եք ուզում երկրում առանց այն էլ սակավ պրոգերսիվ մարդկանցից և շրջանակներից. ՔՊ-ացու՞մ, ձեր անփոխարինելիության ընդունու՞մ։
Ակնհայտ է, որ սա բերելու է լուրջ խնդիրների»,-գրել է նա ֆեյսբուքյան իր էջում։