Ձեր վստահելի աղբյուրը

Արցախը՝ բանակցային սեղան վերադարձնելու հարցի հետ կապված որևէ  ակնարկ չկա ԵԱՀԿ Մինսկի խմբի համանախագահների երեկվա հայտարարության մեջ։ Ֆեյսբուքյան ուղիղ եթերով ասաց ՀՀԿ փոխնախագահ Արմեն Աշոտյանը՝ վերլուծելով նախօրեին Վիեննայում կայացած Փաշինյան-Ալիև հանդիպումն ու դրանից հետո համանախագահների տարածած հայտարարությունը։ 

«Վարչապետ Նիկոլ Փաշինյանը Ստեփանակերտում հերթական անգամ խոսել էր Արցախը բանակցային սեղան վերադարձնելու իր մտադրության և օրակարգային հարց դարձնելու մասին։
Երբ համեմատում ենք համանախագահների և արտգործնախարարների համատեղ հայտարարությունը փաշինյանական այս պնդման հետ, հերթական անգամ տեսնում ենք, որ նման հարցերի քննարկման որևէ ակնարկ չկա։

Չեմ բացառում, որ Նիկոլ Փաշինյանը խոսակցության մեջ գուցե բարձրացրել է այս թեման, սակայն փաստը մնում է  փաստ, որ անգամ հնարավոր բարձրաձայնման դեպքում այդ առաջարկությունը, փաշինյանական այդ պնդումը, ղարաբաղյան քաղաքականության մեջ իր անկյունքարային խոստումը, համանախագահների հայտարարությունում որևէ արձագանք չի գտել։

Հակառակը՝ Ալիևը հանդիպումից  անմիջապես պնդեց, որ բանակցային ձևաչափի փոփոխություն Ադրբեջանը չի ընդունելու»,-  նշեց Արմեն Աշոտյանը։

Նրա խոսքով, անգամ եթե Փաշինյանը բարձրաձայնել է  այս խոստման մասին, ապա Ալիևի հարցազրույցից, համանախագահների հայտարարություններից ակնհայտ է դառնում, որ այս խոստումը կյանքի կոչելու որևէ հեռանկար գոնե այս փուլում չունի։

ՀՀԿ-ական գործիչն ասաց, որ Նիկոլ Փաշինյանի կողմից Ստեփանակերտում բարձրաձայնված մեկ այլ օրակարգային հարց է կարգավորման երեք հիմնական սկզբունքների և վեց բազային էլեմենտների շուրջ կողմերի մեկնաբանությունների հստակեցումը։

«Մամուլի հաղորդագրության մեջ տեսնում ենք, որ նման տեսակի հարցադրումների վերաբերյալ որևէ կոնկրետ ձևակերպում չկա։

Այսինքն, Ստեփանակերտում հնչեցված փաշինյանական երկրորդ պնդումը, որ երեք պլյուս վեց  կարգավորման բանաձևի հստակեցման խնդիր կա, որևէ կերպ իր արձանագրումը չի գտել այս հայտարարության մեջ։ Կարելի է ենթադրել, որ այսպիսի քաղաքական հարցադրումը կամ եղել է  ընթացիկ զրույցի թեմաներից մեկը, կամ հետին պլան է մղվել տարբեր պատճառաբանություններով»,- նշեց նա։

Ա. Աշոտյանի գնահատմամբ. մտահոգիչ է, որ ԵԱՀԿ Մինսկի խմբի համանախագահների հայտարարության մեջ կարգավորման սկզբունքների մասին որևէ հիշատակում չկա։ 

Նա նշեց, որ այս հայտարարության մեջ որևէ արձանագրում, անգամ ակնարկ չկա Վիեննայի, Սանկտ Պետերբուրգի, Ժնևի հանդիպումների օրակարգը վերականգնելու մասին, ինչի մասին խոսել էր Նիկոլ Փաշինյանը Ստեփանակերտում կայացած Հայաստանի և Արցախի Անվտանգության խորհրդի համանտեղ նիստում։

«Ստեփանակերտյան ուղերձի երեք հիմնարար կետերը Մինսկի խմբի համանախագհներիի և Հայաստանի ու Ադրբեջանի արտգործնախարարների համատեղ հայտարարության մեջ չկան՝ ոչ Արցախի վերադարձի, ոչ կարգավորման սկզբունքների, ոչ էլ Վիեննայի, Սանկտ-Պետերբուրգի, Ժնևի պայմանավորվածությունների կարտարման հետ կապված։

Կարելի է ցավով արձանագրել, որ երեկվա հանդիպումը  հայկական քաղաքական օրակարգի հետ  ղարաբաղյան հակամարտության կարգավորման հետ կապված որևէ աղերս չունեցավ»,- ասաց Արմեն Աշոտյանը։ 

Նա նշեց, որ ՀՀ կառավարության աշխատակամզը երեկ հանդիպումից հետո համանախագահների հայտարարությանը զուգահեռ տարածեց սեփական հաղորդագրությունը։

Արմեն Աշոտյանի խոսքով, այդ հայտարարություններում երկու բովանդակային տարբերություն կա։