Ձեր վստահելի աղբյուրը

Միավորված ազգերի կազմակերպության գլխավոր քարտուղար Անտոնիո Գուտերեշը ողջունել է Հայաստանի վարչապետ Նիկոլ Փաշինյանի ու Ադրբեջանի նախագահ Իլհամ Ալիևի միջև նախօրեին Վիեննայում տեղի ունեցած հանդիպումը։ Այս մասին տեղեկանում ենք ՄԱԿ-ի պաշտոնական կայքից։

Գլխավոր քարտուղարը ողջունել է առաջնորդների անդրադարձը խաղաղությանը նպաստող մթնոլորտի ձևավորման և բանակցությունների հաջող ընթացքն ապահովող քայլերի ձեռնարկման հարցում։

Անտոնիո Գուտեր ողջունել է նաև հրադադարի ռեժիմն ամրապնդելու և մարդասիրական հարցեր քննարկելու կողմերի հանձնառությունը։

Գլխավոր քարտուղարը բարձր է գնահատել ԵԱՀԿ Մինսկի խմբի համանախագահների կարևոր միջնորդական առաքելությունը և վերահաստատել ՄԱԿ-ի լիարժեք աջակցությունը նրանց շարունակական ջանքերին։

Հիշեցնենք, որ երեկ Վիեննայում կայացել է  Հայաստանի Հանրապետության վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը, որն առաջին անգամ անցկացվել է  ԵԱՀԿ Մինսկի խմբի համանախագահների հովանու ներքո՝ Իգոր Պոպովի` Ռուսաստան,  Էնդրյու Շոֆերի` ԱՄՆ, Ստեֆան Վիսկոնտիի` Ֆրանսիա և ԵԱՀԿ գործող նախագահի անձնական ներկայացուցիչ Անջեյ Կասպրչիկի մասնակցությամբ։ Հանդիպմանը մասնակցում էին նաև արտաքին գործերի նախարարներ Զոհրաբ Մնացականյանն ու Էլմար Մամեդյարովը: Հանդիպմանը մասնակցում էր նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը: Հանդիպումից հետո ԵԱՀԿ Մինսկի խմբի համանախագահները հանդես են եկել հայտարարությամբ, որում ասվում է, որ հանդիպումը տեղի ունեցավ դրական և կառուցողական մթնոլորտում և հնարավորություն տվեց երկու առաջնորդներին պարզաբանել իրենց դիրքորոշումները: