Ձեր վստահելի աղբյուրը

Ա․ Սպենդիարյանի անվան օպերայի և բալետի ազգային ակադեմիական թատրոնում հավաքվել է թատրոնի անձնակազմը՝ քննարկելու մշակույթի նախարարի պաշտոնակատար Նազենի Ղարիբյանի հրամանով թատրոնի տնօրեն Կոնստանտին Օրբելյանի ազատման հարցը:

«Մարդիկ,  ովքեր գտնվում են բարձր մակարդակի վրա, Նազենի Ղարիբյաններն  ու նրա նմաններն իրավունք չունեն անգամ ձեռք տալ, մոտիկանալ»,- հայտարարեց ռեժիսոր Նարինե Ստեփանյանը։

Նրա կարծիքով, այս հարցը չպետք է հասնի դատարան, այլ արվեստագետներով, հայ ժողովրդով միասին պետք է ոտքի կանգնեն ու  մեկ օր առաջ հարցը լուծեն։

«Մենք ենք տերը մեր օպերային թատրոնի, առանց մեզ հետ խոսելու  ոչ մեկ իրավունք չունի այսպիսի անդրարություն, խայտառակություն անել»,- նշեց ռեժիսորը։

Հիշեցնենք,  որ մշակույթի նախարարի պարտականությունները կատարող Նազենի Ղարիբյանի  2019 թ. մարտի 28-ի  հրամանով Կոնստանտին Օրբելյանն ազատվել է Ալեքսանդր Սպենդիարյանի անվան օպերայի և բալետի ազգային ակադեմիական թատրոնի տնօրենի պաշտոնից։

Մշակույթի նախարարությունը որպես ազատման հիմք ընդունել է Պետական ոչ առևտրային կազմակերպությունների մասին օրենքի 15-րդ հոդվածը, ըստ որի՝  ՊՈԱԿ-ի տնօրենը չի կարող զբաղեցնել այլ պաշտոն կամ կատարել վճարովի այլ աշխատանք, բացի գիտական, մանկավարժական և ստեղծագործական աշխատանքից, մինչդեռ Կոնստանտին Օրբելյանը բացի Ալեքսանդր Սպենդիարյանի անվան օպերայի և բալետի ազգային ակադեմիական թատրոնի տնօրենից նաև գեղարվեստական ղեկավարի պաշտոնն էր զբաղեցնում։
Նախօրեին Ն. Ղարիբյանն ասել, որ պարզել են՝ գեղարվեստական ղեկավարը ղեկավար պաշտոն է, ոչ թե ստեղծագործական. «Թյուրիմացաբար մինչև հիմա ընկալվել է այնպես, որ ստեղծագործական է, բայց օրենքում գրված է, որ ղեկավար պաշտոն է»։

Թատրոնի իրավաբանն ասաց, որ  մշակույթի նախկին նախարար Լիլիթ Մակունցն է որոշել, որ գեղարվեստական ղեկավարը ստեղծագործական աշխատանք չէ, մինչդեռ օրենքներով ստեղծագործական աշխատանք է, իրենք ապացուցել են։

«Խնդիրը լուծումը տեսնում ենք՝ ստեղծել աշխատանքային խումբ ու քննարկել՝ արդյոք նախարարի պաշտոնակատարը ճիշտ է իրավանաբանորեն։ Միանշանակ, մենք դատարանում հաղթելու ենք, բայց դա կտևի մեկ տարի, լավ չէ, մեծ աղմուկ կբարձրանա։ Առաջարկում ենք նախօրոք քննարկենք, տեսնենք, եթե իրենք ճիշտ են, մտածենք ելքների մասին, բայց համոզված ենք, որ ճիշտ չեն, այդ դեպքում հարցը կլուծվի»,- նշեց իրավաբանը։

Օպերային երգիչ, տենոր Լիպարիտ Ավետիսյանն ասաց, որ մշակույթի նախարարի պարտականությունները կատարողն իրենց չի ճանաչում, հետևաբար իրենք էլ այդ կնոջը չեն ճանաչում։

«Եթե մեզ չի ճանաչում, մենք էլ իրեն չենք ճանաչում, ընդհանրապես չենք ընդունում իր կարծիքը, հրամանը  մեզ համար  ոչինչ է»,- նշեց նա։

Կոմպոզիտորների միության նախագահ Արամ Սաթյանի խոսքով, Կոնստանտին Օրբելյանը նվիրյալ է, նվիրյալներին պետք է բարձրացնել, այլ ոչ թե փորձել ինչ-որ մի բանով խանգարել։

«Մարդ, որը թողել է իր բարեկեցիկ կյանքն ու հնարավորությունները, եկել է Հայաստան, ուզում է օգտակար լինել և օգտակար է մեր մշակույթին։ Կարծում եմ, որ մենք պետք է հասկանանք՝ արդյոք այն մարդը, որը չի ճանաչում իր նվիրյալներին, նա իրավունք ունի՞ լինել նախարար, և նա որոշի կենսագրությունն այն արվեստագետների, որոնք իրենց արվեստով բարձրացնում են հայ ազգին», - նշեց Արամ Սաթյանը։

Մարտիրոս Սարյանի տուն թանգարանի տնօրեն Ռուզան Սարյսնն ասաց, որ այս ահավոր որոշումը համաշխարհային երաժշտական հասարակության առաջ Հայաստանի խայտառակ անող որոշում է։

«Եթե չեղյալ չահամարվի այս որոշումը, համարում եմ, որ մենք շատ վատ տեսքով ենք ներկայանում աշխարհի առաջ»,- ընդծեց նա։

Հանդիպման վերջում բեմ բարձրացավ Կոնստանտին Օրբելյանը։ Նրան ներկաները ողջունեցին հոտնկայս և ծափահարություններով։ Նա հուզված էր։

«Ես սիրում եմ Հայաստանը։ Ես փաստաբան չեմ, իրավաբան չեմ, քաղաքական գործիչ չեմ, ինձ հետաքրքրում է միայն մի բան՝ հայկական միակ օպերային և բալետի թատրոնի զարգացումը, հաջողություններն ու համաշխարհային ճանաչումը»,- ասաց Կ. Օրբելյանը։  

Նա ընդգծեց, որ մեծ ծրագրեր ունի թատրոնի հետ կապված, ցավալի կլինի, այդ ամենը երկուշաբթի «կտրել», դադարեցնել այն անհավատալի տեմպը, որն իրենք վերցրել են, այն հաջողություները, որոնք թատրոն ունի ամբողջ աշխարհում։

«Շնորհակալություն բոլորին, ողջ անձնակազմին և բոլորին, որոնք այստեղ են»,- ասաց մաեստրո Օրբելյանը։

Անձնակազմը որոշեց երկուշաբթի ժամը 10-ին հավաքվել կառավարության մոտ և նամակ հանձնել կառավարությանը՝ իրենց խնդիր-պահանջով։