Ձեր վստահելի աղբյուրը

«Ապրիլյան պատերազմը ցույց  տվեց, որ Հայաստանն ու Արցախը  պատրաստ են և կարող են հակառակորդին պարտադրել հրադադար, զինադադար, պատրատ են հակառակորդին դուրս շպրտել ելման դիրքից»,- լրագրողների հետ հանդիպմանն ասաց ապրիլյան պատերազմի մասնակից  Հրանտ Սարկիսովը։

Նրա կարծիքով, ապրիլյան պատերազմից հետո հակառակորդը, թեև շարունակում է ագրեսիվ հռետորաբանությունը, հետևություններ է արել, որ հայկական զորքը տարածաշրջանում ամենամարտունակն է, պատրաստ է ցանկացած ագրեսիվ գործողությունների համապատասխան պատասխան տալ։ Հ. Սարկիսովն ասաց, որ իրենց համար կարևոր էր այդ օրերին թիկունքում մայրերի, քույրերի, բարեկամների, ողջ սփյուռքի օժանդակությունը։

Ապրիլյանի մասնակից Ժորա Աֆրիկյանի  գնահատմամբ, քառօրյա պատերազմը Հայաստանի նորագույն պատմության հերթական էջերից է, որտեղ  հայ ժողովուրդն ունեցել է ցավ,  վերք, կորուստներ։

«Միաժամանակ հստակ նշենք, որ այդ ամենին միահյուսված է  հպարտությունը,  ազգային արժանապատվությունը։ Ապրիլյան պատերազմը դարձավ մեր նորագույն պատմության փառահեղ էջերից, որտեղ հայ զինվորը, սպան, բանակը ևս մեկ անգամ ապացուցեց, որ զենքի ուժով իր հետ չեն կարող խոսել։ Ադրբեջանի կողմից երկար տարիներ մտածված, գծված ռազմական պլանը հայ զինվորը տապալեց։ Այստեղ է հենց հայ զինվորի սխրանքը,  որ  ադրբեջանական բանակի՝ թե նոր սպառազինությունները, ավելի փորձառու զինվորականների կողմից մշակված ռազմական պլանը հայ զինվորը տապալեց»,- ասաց Ժ. Աֆրիկյանը։

Ապրիլյան պատերազմի մասնակից  Հայկ Թորոսյանի խոսքով,   քառօրյան սթափեցրեցի մեր ազգին, որ թվացյալ խաղաղությունը մշտական չի կարող լինել, ստիպեց մեզ պատրաստ լինել, մտածել այն ուղղությամբ, որ  մենք միշտ էլ թշնամու կողքին ենք ապրում, պետք չէ վստահել թշնամուն, մտածել, որ կփոխի իր բնույթը։

«Ապրիլյանը նաև հույս տվեց, որ մեր բանակը մարտունակ է, հայ զինվորը պատրաստ է պաշտպանել մեր երկիրը»,- ասաց նա։

Հ. Սարկիոսվն ընդգծեց, որ հակառակորդը ապրիլի 1 լույս 2-ի գիշեր սկսեց լայնածավալ հարձակում՝ նպատակ ունենալով գրավել Ստեփանակերտը։

«Սակայն մեր զինվորներն այդ ամենը տապալեցին, կայծակնային պատերազմը չստացվեց»,- ընդգծեց նա։

Հ. Սարկիոսվի կարծիքով, Արցախի հիմնահարցն այսօր  սպառել է  դիվանագիտական բոլոր լուծումները. «20 տարի հայկական կողմը փրոձում է  բոլոր օրինական ճանապարհներով լուծել խնդիրը, բայց չի կարգավորվում, լինում են վիրավորներ, զոհեր։ Այդպես շարունակել չի կարելի՝ կամ պետք է  հստակ վերջակետ դնել, կամ, եթե անհրաժեշտ է, անցնել ռազմական գործողությունների»։