Ձեր վստահելի աղբյուրը

Ապրիլի 4-5-ը Հայաստանի Հանրապետության Սահմանադրական դատարանի հրավերով, պաշտոնական այցով Հայաստանում է Գերմանիայի Դաշնային Հանրապետության Սահմանադրական Դատարանի նախագահ Անդրեաս Ֆոսկուլեի գլխավորած պատվիրակությունը: Պատվիրակության կազմում են Դատարանի նախագահի տեղակալ և առաջին Սենատի նախագահ Շտեֆան Հարբարթը, Դատարանի դատավորներ, Դատարանի աշխատակազմի ղեկավարը:
Այցի նպատակն է երկկողմ իրավական համագործակցության հետագա ամրապնդումն ու սահմանադրական արդարադատության իրականացման ոլորտում փորձի փոխանակումը: Այցի ընթացքում նախատեսված են պաշտոնական և աշխատանքային հանդիպումներ։

Պատվիրակության հետ հանդիպումից հետո լրագրողներին հարցին, թե երբեմն խոսվում է Գերմանիայի հետ Հայաստանի իրավական համակարգի նմանություների մասին՝  երբեմն գովասանքով, երբեմն մեղադրանքով, համաձա՞յն եք այդ կարծիքներին,  Հրայր Թովմասյանը պատասխանեց, որ լավագույն երկրի փորձի ցանկացած մեխանիկական վերարտադրություն խնդրահարույց է։

«Եթե նայենք ԱՄՆ  կառավարման ձևը, որը կրկնօրինակված  է Լատինական  Ամերիկայի գրեթե բոլոր երկրներում, չի տալիս այն արդյունքը, ինչ կա ԱՄՆ-ում։ Նույնը վերաբերում է պառլամենտական կառավարման ձևին։ Գերմանական փորձագետները երբեք մեզ իրենց մոդելը վերջնական ճշմարտությամբ չեն մատուցել, քաջածանոթ են եղել մեր խնդիրներին և մեզ հետ միասին լուծումները են գտել։

Կարող եմ տասնյակ տարբերություններ նշել թե կառավարման ձևի, թե սահմանադրական  արդարադատության, թե մյուս ոլորտների, որոնք տարբերվում են իրենցից։ Այս առումով այդ գերմանիզացիան այդքան էլ մեծ չէ։ Ընդհանուր փիլիսոփայության մեջ,  անշուշտ, մենք նման ենք, մոտ ենք կառավարման ձևով, մասնագիտացած սահմանադրական արդարադատության համակարգի առումով, բայց նաև էականորեն տարբեր ենք հաշվի առնելով մեր առանձնահատկությունները»,-ասաց նա։

Պատասխանելով Սահմանադրական դատարանի դատավորի նոր թեկնածուի մասին հարցին, այդ թվում՝  արդյո՞ք ունեք նախընտրած թեկնածու, ՍԴ նախագահն ասաց.  «Ես չեմ որոշում, թե ում հետ աշխատել, որոշում է Հայաստանի նախագահը, կառավարությունը, Դատավորների ընդհանուր ժողովը և վերջնականապես նրանց ընտրում է Ազգային ժողովը: Այս առումով Սահմանադրական դատարանը նախընտրելի թեկնածու ունենալու իրավունք չունի կամ դա իր խնդիրը չէ»։

Սահմանադրական դատարանի նախագահ Հրայր Թովմասյանը նաև վստահեցրեց, որ այս պահին Սահմանադրական դատարանի վրա որևէ քաղաքական ճնշման նշույլ անգամ գոյություն չունի։

«Վստահեցնում եմ 100 տոկոսով՝ նման բան գոյություն չունի, Սահմանադրական դատարանի  արդյունավետ գործունեության համար առաջին նախապայմանն է։ Այսինքն՝ 0 կաշկանդվածություն ցանկացած երևույթից, ցանկացած անձից»,- ասաց նա։

Մանրամասները՝ տեսանյութում։